¹ ومرة ثاني ، مشي يسوع للهيكل وكان به هونك رجُل يدُهُ يابسة ² . وكان به من الناس الموجودين (بعضهم) يشتوا أي حاجه يمسكوها على المسيح ، فجلسوا يراقبوه من شأن يشوفوا انه بيعالج يوم السبت . ³ وبعدين قال يسوع للرجُل اللي يدهُ يابسة : "وقف في الوسط." ⁴ وبعدين قال لهم: "هو(هل) يصلح يوم السبت واحد يعمل عمل خير أو يعمل عمل شر؟ يحيي نفس أو يميته؟" فجلسوا ساكتين . ⁵ فالفت لعندهم وهو زعلا وحزين على قلوبهم القاسية . وبعدين قال للرجُل: "افتح يدك." ففتحه ، فيده شفيت تمام فخرجوا ⁶ فقهاء اليهود ، واتفقوا مع الهيرودسيين من شأن يقتلوا يسوع . ⁷ ومشي يسوع مع التلاميذ لعند البحيرة ، ولحقه ناس كثير من ناحية الجليل . ⁸ ويهوذا والقدس وأدومية وشرق الأردن ، وصُور وصيدا ، جاءوا لعنده لأنهم سمعوا عن الحاجات اللي يسويها . ⁹ فكل التلاميذ يجهزوا له قارب من شأن الناس مايزاحموه . ¹⁰ لإنه عالج ناس كثير ، فاللي كان بينه مرض كان يزاحمه من شأن يلمسه . ¹¹ فكانت الشياطين ، لما تشوفه ، تخرج قُدامه وتصيح: "أنت ابن الله." ¹² فكان يقلهم مايتكلموش علوه . (فكان يحذرهم ويقلهم لايفضحوش . ¹³ وبعدين طلع الجبل ، ودعي للي يشتيهم ، فمشوا لعنده . ¹⁴ فاختار اثنا عشر واحد وسماهم تلاميذ ، من شأن يكونوا اصحابه ، ويُرسلهم من شأن يبشروا ، ¹⁵ ويكون لهم قدره يخرجوا الشياطين . ¹⁶ وهاذوه الاثنا عشر هُم: سمعان اللي سماه بطرس ، ¹⁷ ويعقوب بن زبدي ، ويوحنا أخوه وسماهم بوانرجس اللي يعني ابني الرعد ¹⁸ وأندراوس ، وفيلبس ، وبرتلمي ، ومتى ، وتوما ، ويعقوب بن حلفي ، وتداوس ، وسمعان القانوني ، ¹⁹ ويهوذا الإسخريوطي اللي خانه . ²⁰ وبعده مشي لبيت ، والناس تجمعوا مرة ثانية وماقدرش يسوع والتلاميذ حتى يأكلوا . ²¹ ولما سمعوا أهله ، جاءوا لعنده من شأن يأخذوه ، لإنهم قالوا إنه قده مجنون . ²² أما فقهاء اليهود اللي جاءوا من القدس قالوا: "إنه بينه بعلزبول وهو يخرج الشياطين برئيس الشياطين." ²³ فدعي لهم وقلهم بالأمثال: "كيف يقدر شيطان يخرج شيطان ²⁴ لو انقسمت دولة على نفسها ، ماتقدرش تجلس . ²⁵ ولو انقسمت عائلة على نفسها ، ماتقدرش تجلس . ²⁶ والشيطان لوعمل ضد نفسه واقتسم، مايقدرش يجلس شينتهي حاله . ²⁷ مايقدرش واحد يدخل بيت رجل قوي ويسرق بيته إلا بعد مايقيد صاحب البيت القوي أول حاجة ، وبعده شيقدر يسرق بيته . ²⁸ شأقولكم الصدق ، كل ذنوب الناس تغفر لهم ، حتى الكفر اللي يكفرونه . ²⁹ بس اللي يكفر بالروح القدس ، لايغفر له ابداً ، بايجلس ذنبه للأبد." ³⁰ وبهاذه يسوع جوب على اللي يقولوا فيبه شيطان . ³¹ وبعدين جاءت أمه وإخوانه ، ووقفوا خارج البيت ، ورسلوا لعنده من شأن يجي . ³² والناس اللي كانوا جالسين عنده ، كلموه: "أمك وإخوانك خارج البيت يشتوك." ³³ فقلهم: "أين(من) أمي وإخواني؟" ³⁴ فالفت للناس اللي عنده وقلهم: "هاذوه هُم أمي وإخواني! ³⁵ لإنه اللي يعمل اللي يقله الله ، هو أخي وأختي وأمي ."