^{1 2} 1 ನಾನು ನಿಂಗುಲ್ನು ಒಪ್ಪಿಸ್ರ ನಾಂಗ್ಲ ಸಹೋದರಿಯಾನ ಪೊಯಿಬೆಯಾನ ಪ್ರೀತಿಯಿಂಡು ಅಂಗಿಕರ್ಸಾಂಗೂ ಅದು ಕಂಕ್ರೆಯಾತ್ಕುರುಯಿಕ್ರ ಸಭೆಯಾ ಸೇವಕಳಾಯಿದ್ದು 2 ನಿಂಗ ಅಕೆನ ಪರಿಶುದ್ಧತೆಕು ಸರಿಯಾನ್ಕಾನಿ ಕರ್ತನ್ಕುರು ಅಂಗಿಕರಿಸ್ಕೊಂಡು ಅಕೆಯ ಪಾನಿಕೂರು ಅತ್ತುಗೂ ಅವಸ್ಯಕವಾನ ಸಹಾಯನ ಸೈಯ್ಯೊಂಗೂ ಅದು ನನ್ನು ಬೇರೆಲ್ಯುಕಿ ಸಹಾಯಸೇದಿದ್ದು. ^{3 4 5} 3 ಕ್ರಿಸ್ತ ಯೆಸಕುರು ನನ್ನ ಸಹಾಯಕರಾಯಿಕ್ರ ಪ್ರಿಸ್ನಿಲ್ಲಕು ಅಕ್ವಿಲನಿಗೂ ನಾಟ್ಟು ವಂದನೆಯನ್ನ ತಿಳಿಸಾರೆ 4 ಆಗ್ಯ ನಾಟು ಪ್ರಾಣಕಾಯಿ ತಾಂಟ ಕುತ್ತಿಗೆಯಾ ಓಡ್ದುಸ್ನು ನಾನು ಮಾತ್ರ ಅಲ್ಲ ಅನ್ಯಜನರ ಸಭೆತಾಗ್ಯದೇರು ಅಲ್ಯನ ವಂಡುಸಕ್ನು. 5 ಅಂಗೇ ಅಲ್ಯ ಹೂಟಕೂರುಯಿಕ್ರ ಸಭೆತು ವಂದನೆ ಸೋನಂಗೂ ಅಖಾಯತ್ಕುರುಯಿಕ್ರ ಕ್ರಿಸ್ತನಿಕು ಪ್ರಥಮ ಫಲವಾಯಿಕ್ರ ನಾಟು ಪ್ರಿಯಾನ್ನು ಎಪೈನೆತನಿಗೂ ವಂದನೆ. ^{6 7 8} 6 ನಾಂಗ್ಲುಗೋಸ್ಕರ ಶ್ಯಾನ ಶ್ರಮೆಪಟ್ಟ ಮರಿಯಾಳ್ಕು ವಂದನೆ 7 ನನಕ್ಕಿಂತ ಮುನಿ ಕ್ರಿಸ್ತನೂಲ್ಲ೦ದು ಅಪೋಸ್ತಲರತ್ಕುರು ಪ್ರಖ್ಯಾತಿಗೊಂಡ ನಾಟು ಬಂಧುಗ ನಾಟ್ಟು ಜೊತೆಯ ಸೇರೆದಾಗ್ಯಯಾಯಿಗ್ರ ಅಂದ್ರೋನಿಕ್ ಯೂನ್ಯನಿಕು ವಂದನೆ. 8 ಕರ್ತನ್ಕುರು ನಾಟು ಪ್ರಿಯಾರಾಯಿಕ್ರ ಅಂಪ್ಲಿಯಾತನ್ನು ವಂದನೆ ^{9 10 11} 9 ಕ್ರಿಸ್ತನ್ಕುರು ನಾಗ್ಲ ಸಹಾಯಕನಾಯಿಂದ ಉರ್ಬನನಿಗೂ ನಾಟು ಪ್ರಿಯಾನ್ ನ ಸ್ತಾಖನಿಗೂ ವಂದನೆ 10 ಕ್ರಿಸ್ತನ್ಕೂರು ಮೆಚ್ಚಿಕೆ ಹೊಂದಿದ ಅಪೆಲ್ಲನು ವಂದನೆ ಅರಿಸ್ತೊಬೂಲನ ಹೂಟ್ಟಲ್ಯಕಿ ವಂದನೆ 11 ನಾಟು ಬಂದುಯಾನ ಹೆರೋಡಿಯೋನನ್ನು ವಂದನೆ ಕರ್ತನ್ಕುರು ನಾರ್ಕಿಸ್ಪನ ಹೂಟ್ಟಲ್ಯಕು ವಂದನೆ. ^{12 13 14} 12 ಕರ್ತನಕೂರು ಪ್ರೆಯಾಸಪಟ್ಟ ಪೈನಳಕು ತ್ರುಪೋಸಳಕು ವಂದನೆ ಕರ್ತನ್ಕುರು ಹೆಚ್ಚಾಯಿ ಪ್ರಯಾಸಪಟ್ಟಯಿಕ್ರ ಪ್ರಿಯ ಪೆರ್ಸಿಸಳ್ಳು ವಂದನೆ 13 ಕರ್ತನ್ಕುರು ಅರಿಸಲ್ಪಟ್ಟ ರೂಪನಿಕು ನಾನೂ ತಾಯಿಕಾರಯಿಕ್ರ ಅತ್ರು ತಾಯಿಕಿ ವಂದನೆ 14 ಅಸು೦ಕ್ರಿತನ್ನು ಪ್ಲೆಗೋನನಿಗೂ ಹೆರ್ಮೇಯನ್ನು ಪತ್ರೋಬನಿಕು ಹೆರ್ಮಾನ್ನು ಅತ್ರುಜೊತೆಯಿಕ್ರ ಸಹೋದರ್ಕು ವಂದನೆ. ^{15 16} 15 ಫಿಲೋಲೊನ್ನು ಯೂಲ್ಯಳಿಗೂ ನೇರ್ಯನಿಕೂ ಅತ್ರು ಸಹೋದರಾರಕು ಒಲು೦ಪನ್ನು ಅಲ್ಯಕುರುಯಿಕ್ರ ಪರಿಶುದ್ಧರಲ್ಲಕದ್ದೇರ್ಕು ವಂದನೆ 16 ಪವಿತ್ರವಾನ ಮುದ್ದಿದಿಂಡು ವಂಡಲ್ನವಂಡಲು ವಂದಿಸಾಂಗೂ ಕ್ರಿಸ್ತನ ಸಭೆತಗ್ಯ ನಿಂಗುಲ್ನ ವಂದಿಸಾರೋ. ^{17 18} 17 ಸಹೋದರಾರೆ ನಿಂಗ ಹೊಂದಿಯಿಗ್ರ ಉಪದೇಶಕು ವಿರುದ್ಧವಾಯಿ ಬೇದನೆ ವಿಘ್ನನ ನಿಂಗುಲ್ಕುರು ಉಂಟು ಸೈರತ್ತ ಗುರುತಿಸಿ ಅಲ್ಯನ ಉಟ್ಟು ಹೂಂಗೂ ಇಂಡು ನಾನು ನಿಂಗುಲನ ಬೇಡಿಗ್ಯಾರೇ 18 ಅಂಥಗ್ಯ ನಾ೦ಟ್ಟ ಕೆರ್ತನಾಯಿಕ್ರ ಯೇಸುಕ್ರಿಸ್ತನ ಸೇವೆನ ಸೈದೆ ತಾಂಟ್ಟು ವಾರ್ಗ ಸೇವೆ ಸೈರಾಗಾಯಿ ನಯಾವಾನ ನುಡಿಯಿಂಡು ಹೂಗ್ಯಕ ಓಕುಕುರುಯಿಂಡು ನಿಷ್ಟಪಟಿಗ್ಯ ಹೃದಯನ ಮೋಷಗ್ಯೂಸಾಕ್ನ್ನು. ^{19 20} 19 ನಿಂಟ್ಟು ವಿದೇಯಾಕ್ವ ಅದೇರ್ಕು ಪ್ರಸಿದ್ದವಾಯಿಕ್ರತಿಂಡು ನಿಂಟ್ಟು ವಿಷಯತ್ಕುರು ನಾನು ಅನಂದಪಡಾರೇ ನಿಂಗ ನಾಲ್ಲ ವಿಷಯಾತ್ಕುರು ಜಾಣರು ಕೂಟ್ಟುಯ್ಯ ವಿಷಯತ್ಕುರು ಕಳಂಕಯಿಲ್ಲದೇಯಿಕ್ರಗ್ಯ ಅಯಕಿರ್ದಿಂಡು ಅಪೇಕ್ಷಿಸಾರೇ 20 ಶಾಂತಿದಾಯಕನಾಯಿಕ್ರ ದೌರು ಶೀಘ್ರವಾಯಿ ಸೈತಾನನ ಪಾದ ತರ್ಗ್ಲಿ ಮಿಜೋಡಾಕು ನಾ೦ಗ್ಟು ಕರ್ತನಾಯಿಕ್ರ ಯೇಸು ಕ್ರಿಸ್ತನ ಕೃಪೆಯು ನಿಂಗ್ಲೇಟ್ಟಿಯಿಕೂಟ್ಟು. ^{21 22} 21 ನಾಟ್ಟು ಜೊತೆಯ ಪಾನಿಯಾವನಾಯಿಕ್ರ ತಿಮೊಥೆಯನ ನನ್ನ ಬಂಧುಗಳಯಿಕ್ರ ಲೂಕ್ಯ ಯೂಸೋನ ಸೋನಿಪತ್ರಯಿನ್ನು ನಿಂಗುಲ್ನು ವಂದನೆ ಸೋನಾರೇ 22 ಈ ಪತ್ರಿಕೆನ ವರ್ಜಿಕ್ರ ತೆರ್ತನೆಯಿಕ್ರ ನಾನು ನಿಂಗ್ಲುನ ಕರ್ತನ್ಕುರು ವಂದಿಸಾರೇ. ^{23 24} 23 ಸಮಸ್ತ ಸಭೆಕೂ ಅತಿಥಿಸತ್ಕಾಯನ ಸೈತಾಯಿಕ್ರ ಗಾಯನ ನಾನು ವಂದಿಸಾರೆ ಈ ಪಟ್ಟಣ ಖಜಾನೆಯಾ ಮೇಲ್ವಿಚಾರಾಕನಾಯಿಕ್ರ ಎರಸ್ತನೂ ಸಹೋದರನಾದ ಕರ್ತನೂ ನಿಂಗುಲ್ನು ವಂದನೆ ಸೋನಾರೆ 24 ನಾ೦ಟ್ಟು ಕರ್ತನನ ಯೇಸು ಕ್ರಿಸ್ತನ ಕೃಪೆಯು ನಿಂಗ್ಲೋದಿಕಿಕ್ಯೂಟ್ಟು ಅಮೆನ್. ^{25 26} 25 ಪ್ರಕಟನೆಯಾನ ಈ ಮರ್ಮಕ್ಕು ಅನುಸಾರ ಅಂಡೆಕೆ ಯೇಸು ಕ್ರಿಸ್ತನ ವಿಷಯವಾದಂತ ನಾನು ಸಾರುವಂಥ ಸುವಾರ್ತೆಗನುಸಾರವಾಯಿ ನಿಂಗುಲ ಸ್ಥಿರಪಡಿಸುರ್ಕೂ ಶಕ್ತನಾಯಿಕ್ರತನಿಂಡು 26 ಅನಾದಿಯಿಂಡು ಗುಪ್ತವಾಯಿದ್ದ ಮರ್ಮ ಇಪೋದು ಪ್ರಕಾಶಕು ವಂದ ನಿತ್ಯನಾದ ದೌರ್ ಅಪ್ಪಣೆಯ ಪ್ರಾಕಾರ ಪ್ರವಾದಿಯ ಗ್ರಂಥಗಳ ಮೂಲಕ ಅನ್ಯಜನರದೆರ್ಕು ನಂಬಿಕೆಯಿಗ್ರ ವಿದೇಯತ್ವನ ಉಂಟುಸೈಯಿರ್ಕೊಸ್ಕರ ತಿಳಿಸಲ್ಪಟ್ಟದು. ²⁷ 27 ಜ್ಞಾನಿಯಾನ ವಂಡುಕು ದೌರು ಯೇಸು ಕ್ರಿಸ್ತನ ಮೂಲಕ ಎಪೋದು ಮಹಿಮೆ ಉಂಟಾಗೂಟ್ಟು ಅಮೆನ್.