¹ ಈ ಮೇಲ್ಕಿಜೆದಕನ ಸಾಲೇಮಿನ ಅರಸನು ಮಹೋನ್ನತನಾಯಿಕ್ಕಿರ ದವ್ರುತ ಯಾಜಕನು ಅಯ್ಯಿಂದು, ರಾಜರಲಾತ್ತೆಯಿ ಕೊಂಡ್ರು ಪದ್ದಿರಿಗಿ ವರಾಂದಂತಹ ಅಬ್ರಹಾಮನತ್ತೆಯಿ ಎದುರುಗೊಂಡು ಅಶಿರ್ವದುಸೂಸು, ² ಅಬ್ರಹಾಮನು ಅದ್ದಿಕೊರುನು ಪತ್ತಾನೆ ಒಂಡು ಬಾಗತ ಅತನುಕು ಕುಡ್ತುಸು , ಅತನತ ಪೆರುಕು ಮೊದಲೆನೆದಾಯ್ಯಿ ನೀತಿರಾಜನಿಂಡು, ಪರ್ಗುಂಡು ಸಾಲೇಮಿನರಾಜ ಇಂಡೆಕೆ ಸಮಾದನತ ರಾಜನು ಇಂಡು ಅರ್ಥು, ³ ಅತ್ಗು ತಾಯಿ-ದೋಪು ಅಗೋಟು ವಂಶಾವಳಿಯಾಗೋಟು ಇಲ್ಲ,ಆರಂಭ ಅಗೋಟು ಜೀವುತಾ ಅಂತ್ಯ ಅಗೋಟು ಇಲ್ಲ, ಅದು ದವ್ರು ಮವ್ವುನುಕು ಸಮಾನಯಿ ಸೇಯ್ಯಲ್ಪಟ್ಟಿದು,ಇದಲ್ಲದೆ ಅದು ನಿರಂತರವಾಯ್ಯಿ ಯಜಕನಾಯಿದು, ⁴ ಈ ಮಣುಸ್ ಎದ್ನು ಬೇರಾದು ಇಂಡು ನಿಂಗ ಆಲೋಚನೆ ಸೇಯ್ಯಂಗೋ;ನಂಬುರುತಾ ಮೂಲ ಪಿತೃನಾಯಿಕ್ಕಿರ ಅಬ್ರಹಾಮನು ತಾನು ಗೆದ್ದಿಗೊಂಡು ವಂದಿಕ್ಕಿರತ್ಕೊರು ಪತ್ತನೇ ಒಂಡು ಬಾಗತ ಅತ್ಗು ಕುಡ್ತ್ಸೆ , ⁵ ಕರಾಣ್ಕೆ ಲೇವಿಯ ಮಕ್ಕಿಲಿಕೊರು ಯಾಜಕ ಪನಿಯತ್ತೆಯಿ ಹೊಂದುರ್ರಾಯ್ಯ , ಜನಿರಿಂಡು ಇಂಡೆಕೆ ಅಬ್ರಹಾಮನತ ವಂಶಸ್ಥರಾಯಿಕ್ಕಿರ ಅದ್ಗ ಅನ್ನ –ದೆಮ್ಬಿಗಿನ್ಲಿಂಡೆ ದಶಮ ಭಾಗಲಾತ್ತೆಯಿ ಅತ್ಗುರುಕು ನ್ಯಾಯಪ್ರಮಾಣತ್ಕೊರು ಅಪ್ಪಣೆಯಿದು, ⁶ ಅನೇಕೆ ಅಯಿಲಿತಾ ವಂಶಾವಳಿಕೋರು ಲೆಕ್ಕಿಸಲ್ಪಡದೆ ಇಕ್ಕಿರ ಈ ಮಣುಸು ಅಬ್ರಹಾಮನಿಂಡೆ ದಶಮ ಬಾಗಲಾತ್ತೆಯಿ ಅತ್ಗೊಂಡಿಕ್ಕಿರಾದಲ್ಲದೆ ವಾಗ್ದಾನಲಾತ್ತೆಯಿ ಹೊಂದಿಕ್ಕಿರಂತ ಅತ್ಗು ಆಶೀರ್ವಾದ ಕುಡ್ತುಸು. ⁷ ಆಶೀರ್ವಾದ ಹೊಂದುರತ್ತಕ್ಕಿಂತ ಆಶೀರ್ವಾದ ಸೇಯ್ಯಿರಾದು ಬೇರಾದು ಇಂಗಿರಾದು ವಿವಾದ ಇಲ್ಲರಂತ ವೋಕು ಅದ್ನೆ, ⁸ ಇಟಿ ಸಾಗರಂತ ಮಣುಸ್ರು ದಶಮ ಬಾಗಲಾತ್ತೆಯಿ ಅತ್ಗಾನು; ಅನೇಕೆ ಅಟಿ ಜೀವಿಸಿತಿದು ಇಂಡು ಸಾಕ್ಷಿಹೊಂದಿಕ್ಕಿರಾದು ಅತ್ಗಾದು, ⁹ ಇದು ಮಾತ್ರವಲ್ಲದೆ ದಶಮ ಭಾಗಲಾತ್ತೆಯಿ ಅತಗ್ರಾ ಲೆವಿನೂ ಕೂಡ ಅಬ್ರಹಾಮನ ಮುಖಾಂತರ ದಶಮಬಾಗತ ಕುಡ್ತ್ಕಾನಿ ಅಸು ಇಂಡು ನಾನು ಸೋನ್ನೋಬೋದು; ¹⁰ ಹೆನಾಗು ಇಂಡೆಕೆ ಮೇಲ್ಕಿಜೆದಾಕನು ಲೇವಿಯಾತ ಮೂಲ ಪುರುಷನತ್ತೆಯಿ ಎದುರುಗೊಂಡಾಪ್ಪೋರು ಇತ್ತ್ಕೊರು ಲೇವಿಯಾದು ಅಡಕವಾಯಿಂಚು, ¹¹ ಲೇವಿಯ ಯಾಜಕತ್ವತಿಂಡು ಸಂಪೂರ್ಣ ಸಿದ್ದಿ ಅಯಿಂದೇಕೆ ಆರೋನನ ತರತಾದಾಗದೆ ಮೇಲ್ಕಿಜೆದನ ತರತ ಇನ್ನೊಂಡು ಯಜಕನು ಅದ್ದಿಕ್ಕಿರಂತ ಅವಶ್ಯಯಂದಾದಿಂಚು?, (ಅತ್ಗೊರು ಜನುರು ನ್ಯಾಯಪ್ರಮಾಣತ ಹೊಂದುಸುನು ) ¹² ಯಜಕತ್ವ ಬೇರೆಯಾನೇಕೆ ನ್ಯಾಯಪ್ರಮಾಣನು ಸಹ ಬೇರೆಯಾಗುರಾದು ಅಗತ್ಯವಾಯಿದು, ¹³ ಇತ್ತ ಎತ್ತ್ರ ವಿಷಯವಾಯಿ ಸೋನ್ನಲ್ಪಟ್ಟಿದೋಆತನು ಬೇರೊಂಡು ಗೊತ್ರತ್ಗು ಸಂಬಂಧಪಟ್ಟದು;ಆ ಗೊತ್ರತಯಿಲಿಕೊರು ಒಂಡುನೂ ಯಜ್ಞವೇದಿಯಂಚಲಿ ಸೇವೆ ಸೆಂದಿಕ್ಕಿರದಿಲ್ಲ, ¹⁴ ನಂಬುರುತಾ ಕರ್ತನು ಯೂದಾ ಗೋತ್ರತ್ಕೊರು ಪರ್ದ್ದಿಕ್ಕಿರಾದು ಇಂಡು ಸ್ಪಷ್ಟವಾಯಿದು ಅದ್ನೆ;ಈ ಗೊತ್ರತ ವಿಷಯವಾಯಿ ಮೋಶೆ ಯಾಜಕರ ಸಂಬದವಾಯಿ ಯಂತು ಸೋನ್ನುಲ್ಲ. ¹⁵ ಮೇಲ್ಕಿಜೆದಕನ ಹೋಲಿಕೆಕು ಅನುಸಾರವಾಯಿ ಇನೊಂಡು ಯಾಜಕನು ಅದ್ದಿಕ್ಯದು ಇಂಗಿರಾದು ಇನ್ನು ಎದ್ನೋ ಹೆಚ್ಚಾಯಿ ಸ್ಪಷ್ಟವಾಯಿದು, ¹⁶ ಆತನು ಶರೀರಕವಾಯಿಕ್ಕಿರ ಅಜ್ಞೆತ ನಿಯಮತ್ಗು ಅನುಸರ ಅಲ್ಲದೆ ನಿರ್ಲಯವಾಯಿಕ್ಕಿರ ಜೀವಾತ ಶಕ್ತಿಕಾನುಸಾರವಾಯಿ ಸೇಯ್ಯಲ್ಪಟ್ಟಿದು, ¹⁷ ಅತನತ ವಿಷಯತ್ಕೊರು –ನೀನು ಸದಕಾಲನು ಮೇಲ್ಕಿಜೆದಕನ ತರತ ಯಾಜಕನಾಯಿರ ಇಂಡು ಆತನು ಸಾಕ್ಷಿ ಕುಡ್ಕಾದು. ¹⁸ ಮೊದಲಿಂದ ಆಜ್ಞೆ ನಿರ್ಬಲವಾಯಿನೂ ನಿಷ್ಪ್ರಯೋಜಕವಾಯಿನೂ ಇಂದು ಕರಣ್ಕೆ ರದ್ದಾಯಿಹೊಸು, ¹⁹ ನ್ಯಾಯಪ್ರಮಾಣ ಯಂತುನು ಸಿದ್ದಿಕಿ ಅತ್ತೆರಾದೆ ಇಕ್ಕಿರಾತಿಂಡು ಉತ್ತಮವಾಯಿಕ್ಕಿರ ನಿರೀಕ್ಷೆ ಸಿದ್ದಿಕಿ ವಂಚು;ಇತ್ರಿಂಡು ನಂಬ್ರು ದವ್ರಂಚುಗು ಸೇರಾರೋ, ²⁰ ಆತನು ಅಣಿ ಇಲ್ಲದೆ ಯಾಜಕನಾಗೆ ಇಲ್ಲ, ²¹ (ಆ ಯಜಕರು ಅಣಿ ಇಲ್ಲದೆ ಯಾಜಕಾರಸುನು ); ಈತನಾನೇಕೆ –ನೀನು ಸದಾಕಾಲನು ಮೇಲ್ಕೆಜೆದಕನ ತರಹತ ಯಾಜಕನಾಯಿರ ಇಂಡು ಅತನುಕು ಕರ್ತನು ಅಣಿ ಅಚ್ಚು ನುಡ್ಜಿದು , ಪಶ್ಚಾತ್ತಾಪಪಡುದಿಲ್ಲ, ²² ಇತ್ರಿಂಡೆಯೇಸು ಎದ್ನೋ ಶ್ರೇಷ್ಠವಾಯಿಕ್ಕಿರ ಒಡಂಬಡಿಕೆತ್ಗು ಹೊಣೆಗಾರನಾಸು, ²³ ಅಯಿಗ್ಯ (ಲೇವಿಯರು ) ಶಾಶ್ವತವಾಯಿ ಉದ್ಯೋಗ ನಡಿಪ್ಪಿಕ್ಕಿರುಕು ಮರಣಕಾರಣತಿಂಡು ಕರಾಣ್ಕೆ ಅಯಿಲಿಕೊರು ಯಾಜಕಾರನಾಯ್ಯ ಅನೇಕರು; ²⁴ ಈತಾನಾನೆಕೋ ಸದಾಕಾಲ ಇಕ್ಕಿರಾತಿಂಡು ಬದಲಾವಣೆಯಾಗರಂತ ಯಾಜಕತ್ವತ ಹೊಂದಿದು, ²⁵ ಅನಾಗಯ್ಯಿ ಆತನು ತನ್ನ ಮೂಲಕ ದವ್ರಂಚುಗು ವರ್ರಾಯ್ಯಲಾತ್ತೆಯಿ ಸಂಪೂರ್ಣವಾಯಿ ರಕ್ಷಿಸುರುಕು ಶಕ್ತನಾಯಿದು;ಅಯಿಲಿಕೊಸ್ಕರ ವಿಜ್ಞಾಪನೆ ಸೇಯ್ಯಿರುಕು ಎಪ್ಪೋತಿಗು ಪಕಿರಾದಾಯಿದು, ²⁶ ಇಂಥದೇ ನಂಬುರುಕು ಬೇಕಾಯಿಕಿರ ಮಹಾಯಜಕನು,ಈತನು ಪರಿಶುದ್ದನು ಕೇಡು ಸೇಯ್ಯರಾದು ನಿಷ್ಕಳ೦ಕನು ಪಾಪಿಲಾಂಟಿ ಸೇರಾದೆ ಪ್ರತ್ಯೇಕವಾಯಿ ಇಕ್ಕಿರಾತನು ಆಕಾಶತ್ಕಿಂತ ಉನ್ನತವಾಯಿ ಸೇಂದಿಕ್ಕಿರಾತನು ಅಯಿದು. ²⁷ ಮೊದಲು ತಟ ಸ್ವಂತ ಪಾಪಪರಿಹಾರತ್ಗು ಪರ್ಗುಂಡು ಜನುರುತ ಪಾಪಪರಿಹಾರತ್ಗು ಯಜ್ಞಾರ್ಪಣೆ ಸೇಯ್ಯಿರ ಮಹಾಯಾಜಕರಂತೆ ಈತನು ಪ್ರತಿನಿತ್ಯನು ಸಮರ್ಪಿಸರ ಅವಶ್ಯಕತೆ ಇಲ್ಲ, ಯಂತ್ಗು ಇಂಡೆಕೆ ಈತನು ತನ್ನತ್ತೆಯಿ ತಾನೇ ಸಮರ್ಪಿಸಿಗೊಂಡು ಒಂಡೇ ಕಡ್ತು ಆ ಪನಿತ್ತೆಯಿ ಸೆಂದು ಮುಗಿಸಿದು, ²⁸ ನ್ಯಾಯಪ್ರಮಾಣ ನಿರ್ಬಲರಾಯಿಕ್ಕಿರ ಮಣುಸ್ರತ್ತೆಯಿ ಮಹಾಯಾಜಕರನ್ನಯಿ ಸೇಯ್ಯದು;ಅನೇಕೆ ನ್ಯಾಯ ಪ್ರಾಮಾಣತ ನಂತರ ಅಣಿ ಮುಖಾಂತರ ಉಂಟಾಯಿಕ್ಕಿರ ವಾಕ್ಯ ಸದಾಕಾಲತ್ಗು ಪ್ರತಿಷ್ಟೆ ಸೆಂದುಗೊಂಡ ಮವ್ವುನನ್ನೇ ಮಹಾಯಾಜಕನಾಯಿ ಸೇಯ್ಯದು,