¹ Laka koa malaekat nang kalima munyiant sangkakalanya. Aku nele sabuah bintang dari langit jantu ka dalam dunia. Ka bintang koa di mareant anak kunci sabuah lubakng nang manuju ka sabuah jurang nang dalamp nya ina taduga. ² Lalu ia muka pintu Lubakng koa nang manuju ka jurang nang dalampnya ina taduga koa lalu kaluaslah asap dari lubang koa lea asap dari sabuah pembakaran nang aya. ³ Dari asap koa kaluaslahlah na buntak-buntak ka atas dunia, dan ka dangant di mareant kuasa sama lea kuasa lipant-lipant ka dalam dunia. ⁴ Tatapi ka dangannya di parintahan untuk ina ngarusak rumput-rumputan, daung-daungan, pokok kayu, nang ka dalam dunia, tatapi hanya manusia nang ina make contrengan dari Jubata ka dahinya. ⁵ Dangannya ina mulih untuk munuh manusia, malainkan hanya untuk di nyiksa salama lima bulan. Siksaant nang dangannya ngarasa lea di sanget lipant. ⁶ Pada waktu kao urakng-urakng ngago mati, tatapi ina bisa, dan dangannya mao mati, tatapi ina bisa mati. ⁷ Buntak-buntak koa lea kuda nang di nyiapant untuk baparang. Ka atas kapalanya ada lea Mahkota dari amas dan muha nya nyarupai muha manusia. ⁸ Buuknya lea buuk nang bini dan giginya nyarupai gigi singa. ⁹ Laok kao saolah-olah make baju baparang dari basi, dan bunyi sayapnya lea bunyi kareta kuda nang agi batalama untuk baparang. ¹⁰ Ka eko laok koa ada sengatnya nyarupai sengat lipant; ka eko koa lah ada kuasa untuk nyakiti manusia lima bulan. ¹¹ Raja nang marintahant laok koa adalah malaekat nang kaluas dari jurang nang ina taduga dalampnya. Namanya ka dalapm bahasa Ibrani adalah Abadon dan ka bahasa Yunani adalah Apolion. ¹² Cilaka nang pertama udah di ngalewati. Telelah! Laka ngian masih ada agi dua kasusahant nang akan tajadi. ¹³ Malaekat nang ka anam munyiant sangkakalanya, dan aku nangar ada suara nang kaluas dari tanuk-tanuk mezbah amas ka adapant Jubata. ¹⁴ Suara koa bakata ka malaekat nang ka anam nang naapi sangkakala,"Lapasant ja ka apampat malaekat nang tarikat ka sunge aya Efrat." ¹⁵ Lalu di ngalapasantlah ka ampat malaekat nang dah dinyipant untuk jam, ari, bulant, dan tahun koa untuk munuhi sepertiga dari manusia. ¹⁶ Jumlah dari tantara koa adalah dua ratus juta pasukan ba kuda. Aku sandiri nang nangar jumlah dangannya koa. ¹⁷ Ngialah nang ka teleant dari ku tentang dangannya nang nungganggi: Make baju zirah warna merah api, biru tuha dan kuning balerang. Kapala dari kuda-kuda koa nyarupai kapala singa, dan dari molotnya kaluas api, asap dan balerang. ¹⁸ Sepertiga dari umat manusia koa mati kana tiga malapetaka kao, kana apai, asap dan balerang nang kaluas dari molot mereka ¹⁹ Kakuatan dari kuda-kuda koa ada ka molotnya dan ekonya. Ekonya laok koa nyarupai ular, dan make kapalanya laok koa ngalukai manusia. ²⁰ Tatapi manusia nang ina ikut mati di malapeta koa, bai uga batobat dari nang mereka lakuant, dan uga dangannya bai baranti nyambah roh-roh jahat dan patung-patung nang dari amas, perak, tambaga, batu, kayu, nang ina bisa nele, nangar, atopun bajalant. ²¹ Dan mereka uga bai batobat dari munuh, badukun, ngalakuan ina sanonoh, nyuri.