¹ Lalu aku nele langit dan dunia nang baru, karna langit dan dunia nang pertama dah ina ada, dan laut pun ina ada. ² Lalu aku nele kota kudus, Yerusalem baru, nang turunt dari subayant dari Jubata, nang dah basolek lea panganten nang bini dah siap untuk lakinya. ³ Aku nangar suara dari takhta bakata,"telelah, tampat kadiaman Jubata ada ka tangah-tangah manusia, dan Ia akan diapm basama-sama dengan dangannya. Dangannyan akan manjadi umatNya dan Jubata sandiri akan basama-sama dengan dangannya dan ia ana jadi Jubata dangannya. ⁴ Ia ana ngapus satiap ai mata dari mata dangannya, dan ina akan ada agi kamatiant, kadukaant ,duka cita, ngaratap, sebab sagala sasuatu nang lama dah balalau. ⁵ Lalu ia nang duduk ka atas takhta bakata,"Telelah! Aku manjadiant sagala sasuatunya baru,"Lalu ia bakata, "Tulisantlah, karna sagala pakataant nia dapat di picaya dan banar." ⁶ Dan ia bakata ka aku," Samua dah tajadi! Akulah Alfa dan Omega, Nang awal dan nang tarakhir. Sae nang aus ana aku mare nyocok dengan cuma-cuma dari mata ai kaidupant. ⁷ Sae nang manang ana ngawarisi samuanya nian, dan aku ana manjadi Jubatanya, dan ia ana jadi anakku. ⁸ Tatapi bagi dangannya nang panggali, dangannya koa ina bariman, keji, pambunuh, palacur, tukang-tukan sihir, panyambah patung dan samua pangalok, tampat mereka adalah ka dalamp lautan api nang manyala-nyala dengan balereng, nianlah kamatiant nang ka dua," ⁹ Laka koa seko dari katujuh malaekat atakng ka aku ia kao nang naapi ka tujuh cawan nang barisi ka tujuh kacalakaant, lalu ia bakata, "Je kadiant. Aku mao nunjuki ka kao pangenten nang bini, panganten Anak Domba." ¹⁰ Lalu ka dalamp roh ia ngicakng aku ka sabuah gunung nang aya dan tinggi lalu aku maratiant kota kudus, Yerusalem, turun dari subayant, dari Jubata. ¹¹ Yerusalem kao panuh dengan kamuliant Jubata, dan bakilau lea permata nang paling indah, lea permata yaspis, dan calikng lea kristal. ¹² Dinikngnya aya dan tingngi, pintu gerbangnya ada dua balas buah, dan ka pintu koa ada dua balas malaekat. Ka pintu koa batulisant nama kadua balas suku Israel. ¹³ Ka sabala timur ada tiga pintu gerbang, sabala utara ada tiga, sabala selatan ada tiga dan sabala barat ada tiga pintu gerbang uga. ¹⁴ Ka tembok kota koa mampunyai dua balas pondasi dan ka atasnya tatulis ka dua balas nama daro kadua balas rasul Anak Domba koa. ¹⁵ Lalu ia nang bakata ka aku naapi tongkat pangukur dari amas untuk ngukur kota, pintu dan dinikng nya. ¹⁶ Kota koa bentuknya persegi ampat, panyakngnya dan lebarnya sama. Lalu ia ngukur kota dengan tongkat pangukur koa: dua balas ribu stadia panyakngnya (Panyakng,lebar dan tinginya sama). ¹⁷ Ia uga ngukur dinikngnya, saratus ampat puluh ampat hasta tabalnya, manurut ukuran manusia (nang uga adalah ukuran malaekat). ¹⁸ Dinikngnya tabuat dari permata yaspis dan kota koa sandiri dari amas murni, lea kaca nang calikng. ¹⁹ Pondasi-pondasi dinikngnya di ngiasi dengan sagala jenis batu mahal. Nang pertama batu yaspis, batu nilam, batu mirah dan nang ka ampat batu zamrud, ²⁰ nang kalima batu unam, batu sardis, batu ratna cempaka, batu beril, batu krisolit, dan nang ka dua balas batu kecubung. ²¹ Ka dua balas pintu gerbang koa adalah dua balas batu mutiara. Satiap gerbang tadiri dari sote mutiara. Jalant-jalant kota koa tadiri dari amas murni lea kaca nang calikng. ²² Aku ina nele Bait Suci ka dalam kota koa, karna Jubata, Tuhan nang nguasai sagala sasuatu dan uga Anak Domba ialah Baik Sucinya. ²³ Kota koa ina perlu mataari dan bulant untuk nyinarinya, karna dan ada kamuliaant Jubata nang naraknginya, dan Anak Domba koa lampunya. ²⁴ Bangsa-bangsa ana bajalant ka dalamp cahayanya. Raja-raja ka dunia ana ngicakng kaindahan dangannya ka kota koa. ²⁵ Pintu-pintu gerbangnya ina akan di tutup sapanjang ari, karna malam ina ada agi ka koa. ²⁶ Dangannya ana ngicakng kaindahan dan kahormatan bangsa-bangsa ka dalam kota koa ²⁷ dan ina ada sasuatu nang najis masok kadalampnya. Dan uga ina ada seko urakng pun nang ngalakuant kanajisant atau tipu daya nang masok, malainkan hanya dangannya nang namanya tatulis ka dalamp kitab kaidupant Anak Domba koa.