¹ ಅತಿಂಡು ಅದ್ದಿ ಕೊಟ್ಟಿತನತ್ತೆಯ ಅದ್ದಿ ವಂಚನೆಯತ್ತೆಯ ಕಪಟತ್ತೆಯ ಹೊಟ್ಟೆ ಕಿಚ್ಚತ್ತೆಯ ಅದ್ದಿ ತರ್ತ ನಿಂದನೆಯಾತ್ತೆಯ ವಿಸರ್ಜಿಸಿ . ² ಹಸುಮಕ್ಕಿಲ್ತರ ಪಾರಮಾರ್ಥಿಕ ಅನಾ ಶುದ್ದ ಪಲಾತ್ತೆಯ ಬೈಸಂಗೋ; ಅತಿಂಡು ವಾಲಿತ ರಕ್ಷಣೆಯತ್ತೆಯ ಹೊಂದರಂಗ ;ಕರ್ತನು ದಯಾಳುಯಿಂಡು ನಿಂಗ ಅನುಭವತಿಂಡು ತಿಳ್ಜ್ಗೊಂಡ್ರ೦ಗಲ್ಯ?. ³ ನಿಂಗ ಜೀವವುಳ್ಳ ಕೆಲ್ಲಯಿಕ್ರ ಅತತ್ತೆಯ ಅಗ್ಸ್ಗೊಂಡಿರಂಗ. ⁴ ಆ ಕೆಲ್ಲತ್ತೆಯ ಮಂದಿಗ್ಯ ನಿರಕರ್ಸುಸ್ನು ದವ್ರು ಅತ್ತ ಪೆರ್ಕ್ನದೂ ಮಾನ್ಯಅನಾದು ಇಂಡು ಅನ್ಸುಸ್ನು . ⁵ ನಿಂಗ ಸಹ ಜೀವಯಿಕ್ರ ಕೆಲ್ಲಯಿಂದು ಆತ್ಮ ಸಂಬಂದ ಅನಾ ಮಂದಿರವಾಗಲಿಕ್ಕೆ ಕಟ್ತಯಿರಂಗ.ಮತ್ತೆ ಯೇಸು ಕ್ರಿಸ್ತನ ಮೂಲ್ಕ ದವ್ರುಕು ಸಮರ್ಪಕ ಅನಾ ಆತ್ಮೀಯಯಜ್ಞತ್ತೆಯ ಸಮರ್ಪಿಸ್ರುಕು ಪವಿತ್ರ ಯಾಜಕ ವರ್ಗತಗ್ಯಅಯಿರಂಗ. ⁶ ಇದೋ ಚಿಯೋನ್ಕೋರು ಮೂಲೆಕೆಲ್ಲತ್ತೆಯ ಅಕ್ಯಾರೆ; ಅದು ಆಂಜಿಕ್ರಾದು. ಮಾನ್ಯ ಅನಾದು; ಅತ್ರು ಮೇನಿ ನಂಬಿಕೆ ಹಕ್ಕಿರಾದೂ ಆಶಾ ಭಂಗಪಡ್ದಿಲ್ಲ ಇಂಡು ಶಾಸ್ತ್ರತ್ಗೋರು ವರ್ಜಿದೂ. ⁷ ಅತಿಂಡು ನಮ್ಬ್ರಂಗಾನ ನಿಂಗ್ಲುಕು ಈ ಮಾನಯಿದೂ. ನಮ್ದೆಯಿಕ್ರಲ್ಕಿ ಉಟೂ ಕಟ್ರಗ್ಯ ಮಾನಯಿಂಡು ಉಟ್ಟ ಕೇಲ್ಲೇ ಮುಖ್ಯ ಕೇಲೈದೂ ಇಂಡು . ⁸ ಅದು ಎಡವ್ರ ಕೆಲ್ಲು ಮುಗ್ಗರಿಸ್ರ ಬಂಡು ಇಂಡು ವರ್ಜಿಕ್ರ ಓಕೂ ಸರಿಬುಗಾಕು. ಐಗ್ಯ ದವ್ರ ವಾಕ್ಯ ತ್ತೆಯ ನಮ್ದೆ ಇಕ್ರಲಿಂಡು. ಆ ಕೆಲ್ಲತ್ತೆಯ ಎಡವಿ ಬುಗಾಕ್ನು ;ಅತ್ಗಯೇ ಆಗ್ಯ ನೇಮಕ ಅಸ್ನು. ⁹ ನಿಂಗನೆಕೋ ನಿಂಗ್ಲತ್ತೆಯ ಕತ್ಲುಲ್ಲಿಂಡು ಅಗ್ಸು ತಟ ಆಶ್ಚರ್ಯಕರ ಅನಾ ಒಲ್ಕುಕೊರು ಸೇರ್ಸ್ನ ಗುಣಾತಿಶಯಲ್ಲತ್ತೆಯ ಪ್ರಚಾರ ಸೈರಾಗಾಯಿ ದವ್ರತ್ತೇಯ ನಮ್ನಗ್ಯ ಮಂದಿಗ್ಯ ರಾಜವಂಶಸ್ಥರಾನ ಯಾಜಕ್ರು ಮಿಸಲಾನ ಮಂದಿಗ್ಯ ದವ್ರ ಸ್ವಕೀಯ ಪ್ರಜೆಯು ಅಯಿರಂಗ. ¹⁰ ಮುನ್ನಿ ನಿಂಗ ಪ್ರಜೆ ಆಯಿಕ್ಲ ,ಇಪೋದು ದವ್ರ ಪ್ರಜೆ ಆಯಿರಂಗ ;ಮುನ್ನಿ ವಾತ್ಶಲ್ಯ ಹೊಂದಿಕ್ಲ .ಇಪೋದು ವಾತ್ಶಲ್ಯ ಹೊಂದಿಕ್ರಗ್ಯ ಅಯಿರಂಗ. ¹¹ ಪ್ರಿಯರೇ ಪ್ರವಾಸಿಗ್ಯ ಪರದೆಸ್ತಗ್ಯ ಐಕ್ರ ನಿಂಗ ನಿಂಗ್ಲ ಆತ್ಮತ ಮೇನಿ ಯುದ್ದ ಸೈರ ಶಾರೀರಿಕ ಅಭಿಲಾಷೆತ್ಗು ದೂರವಾಯಿಕ್ರುದುಯಿಂಡು ನಿಂಗ್ಲತ್ತೆಯ ಎಚ್ಚರ್ಸಿರೆ . ¹² ನಿಂಗ್ಲ ನಡ್ವಲ್ಕೆ ಅನ್ಯ ಮಂದಿಲ್ತ ಮದ್ಯತ್ಗೋರು ಯೋಗ್ಯ ವಾಯಿಕ್ಲ ;ಅಪೋದು ಐಗ್ಯ ಎ ವಿಷಯಕೋರು ನಿಂಗ್ಲತೆಯ ಅಕ್ರಮಗಾರರಿಂಡು ನಿಂದಿಸಾಕ್ನೋ ಆ ವಿಷಯತ್ಗೋರೇ ನಿಂಗ್ಲ ಸತ್ಕ್ರೆಯೇಲತ್ತೆಯ ಕನ್ನರೆ ಪಾತು ವಿಚಾರಣೆಯ ನಲ್ತ್ ಗೋರು ದವ್ರತ್ತೇಯ ಕೊಂಡಾಡಕ್ನು. ¹³ ಮನ್ಸ್ರು ನೇಮಿಸಿಕ್ರ ಎ ಅಧಿಕಾರತ್ಗೆ ಅನೇಕು ಕರ್ತನ ನಿಮಿತ್ತ ಅಧೀನರಾಯಿರಂಗೋ . ಅರಸನು ಸರ್ವಾದಿಕಾರಿ ಇಂಡು ಬೇರೆ ಅಧಿಪತಿಗ್ಯ ಕೊಟ್ಟಿ ¹⁴ ನಡತೆಯಿಕ್ರಲ್ಯ ದಂಡಿಸ್ರುಕು ನಲ್ಲ ನಡತೆಯಿಕ್ರಲ್ಕಿ ಪ್ರೋತ್ಸಾಹ ಸೈರುಕು ಅರಸನಿಂಡು ಅಮ್ ಪ್ನಗ್ಯಯಿಂಡು ತಿಳ್ಜು ಅಲ್ಕಿ ಅಧೀನರಾಯಿರಂಗೋ . ¹⁵ ತಿಳ್ಜುಗ್ದೆ ವಸೇತ್ರ ಮೂಡರಾಯಿಕ್ರ ಮಂದಿಲ್ ವಾಹೇತ್ತೆಯ ನಿಂಗ ನಲ್ಲ ನಡತೆಯಿಂಡು ಕಟ್ರುದೇ ಇಂಗ್ರ ದವ್ರ ಚಿತ್ತ . ¹⁶ ಸ್ವತಂತ್ರಲ್ ತರ ನಡುದ್ಗೊಂಗೋ ;ಅನೇಕೆ ಕೊಟ್ಟಿತನತ್ತೆಯ ಮರೆ ಸೈರುಕು ನಿಂಗ್ಲ ಸ್ವಾತಂತ್ರತ್ತೆಯ ಉಪಯೋಗುಸ್ ಮಾನಂಗ ; ¹⁷ ನಿಂಗ ದವ್ರ ದಾಸರಾಯಿರಂಗಲ್ಯ ,ಅದ್ದಿಯತ್ತೆಯ ಸನ್ಮಾನಿಸಂಗೋ .ಅನ್ನಾತೆಂಬಿಮಾರ್ಲ ಪ್ರೀತುಸಾಂಗೋ .ದವ್ರುಕು ಭಯಪಡಂಗೋ .ಅರಸನತ್ತೆಯ ಸನ್ಮಾನಿಸಂಗೋ ¹⁸ ಸೇವಕರೇ ,ನಿಂಗ ಯಜಮಾನ್ರುಕು ಪೂರ್ಣಭಯತಿಂಡು ಅಧೀನರಾಯಿರಂಗೋ .ನಲ್ಲಲತ್ತೆಯ ಸ್ವಾತಿಕರೂ ಹೈಕ್ರಲ್ಕಿ ಮಾತ್ರಅಲ್ದೆ ವಕ್ರಬುದ್ದಿ ಇಕ್ರಲ್ಕಿ ವಿಧೇಯರಾಯಿರಂಗೋ . ¹⁹ ಒಂಡು ಅನ್ಯಾಯವಾಯಿ ಬಾಧೆಪಟ್ರದಾಯಿಂದು ದವ್ರು ಪಾಕ್ತಯಿದೂ ಇಂಡು ತಿಳ್ಜು ಆ ಕಷ್ಟತ್ತೆಯ ಸಹಿಸ್ಗ್ಯೊಂಡೆಕ್ಯ ಅದು ಶ್ಲಾಘ್ಯವಾಯಿದು . ²⁰ ತಪ್ಪುಸೆಂದು ವಡ್ತು ತಿ೦ಗ್ರತ್ಗೋರು ನಿಂಗ ತಾಳ್ಮೆಯಿಂಡು ಇಂದೆಕ್ಯ ಅತಿಂಡು ಎಂದ ಕೀರ್ತಿ ?ಅನೇಕೆ ನಲ್ಲತತ್ತೆಯ ಸೆಂದೂ ಬಾಧೆಪಡ್ರತ್ಗೋರು ನಿಂಗ ತಾಳ್ಮೆಯಿಂಡು ಇಂದೆಕ್ಯ ಅದು ದವ್ರ ಮುನ್ನಿ ಶ್ಲಾಘ್ಯವಾಯಿದೂ . ²¹ ಇತ್ಗಾಯಿಯೇ ನಿಂಗ ಅಗ್ಸಂಗ ;ಕ್ರಿಸ್ತನು ಸಹ ನಿಂಗ್ಲುಕಾಯಿ ಬಾಧೆಯಾತ್ತೆಯ ಅನುಭವ್ಸಿ .ನಿಂಗ ತಟ ಹೆಜ್ಜೆಯ ಜಾಡಿಕೋರು ನಡ್ಕುರ್ದುಯಿಂಡು ಮಾದರಿಯತ್ತೆಯ ಕಾಟಿ ಹೋಸೂ . ²² ಅದು ಹೇದೆ ಪಾಪತ್ತೆಯ ಸೈಹಿಲಾ ,ಅತ್ರ ವಾಯಿಕೋರು ಎ ವಂಚನೆಯೂ ಸಿಕ್ಕುಲ್ಲ . ²³ ಹೇಯಿರಾಲ್ಯ ಅದು ಪ್ರತಿಯಾಯಿ ಹೇಯಿಲ್ಲ ;ಅದು ಬಾಧೆಯತ್ತೆಯ ಅನುಭಯುಸ್ನಾಪೋದು ಎತ್ತು ಗದ್ರುಸ್ದೆ ನ್ಯಾಯವಾಯಿ ತೀರ್ಪು ಸೈರತ್ಗು ತಟ ಕಾರ್ಯತ್ತೆಯ ಒಪ್ಸುಸೂ. ²⁴ ನಂಗ ಪಾಪದ ಪಾಲ್ಕು ಸೇತ್ತು ನೀತಿವಂತರಾಯಿ ಜೀವುಸ್ರುಕು ಅದು ನಂಗ್ಲ ಪಾಪತ್ತೆಯ ತಾನೇ ತಟ ಓಡ್ಮುಕೋರು ಪೆಚ್ಗೊಂಡು ಮರಣತ ಕಂಬತ್ತೆಯ ಏರ್ಸು; ಅತ್ರ ಬಾಸುಂಡೆಯಿಂಡು ನಿಂಗ್ಲುಕು ಗುಣಹಾಸು . ²⁵ ನಿಂಗ ಕುರಿಲ್ತರ ಹೇಗಿ ತಪ್ಪಿ ತೊಳಲುವವರಾಯಿರಂಗ ,ಅನೇಕೆ ಇಪೋದು ನಿಂಗ ತಿರ್ಗೊಂಡು ನಿಂಗ್ಲ ಆತ್ಮಲ್ಲತ್ತೆಯ ಕಾಕ್ರ ಕುರ್ಬು ಅದ್ಯಕ್ಷನು ಹೈಕ್ರತಂಚ್ಗು ವಂದಿರಂಗ.