¹ ನಾನು ಅಪೋಸ್ತನಲ್ಯ ? ನಾನು ಸ್ವತಂತ್ರನಲ್ಯ ? ನಾಂಗು ಕರ್ತನನ ಯೇಸು ಕ್ರಿಸ್ತನಾನು ನಾನು ಪತೌನಲ್ಲ್ಯ ? ಕರ್ತನ್ಕುರು ನಿಂಗನಿಟ್ಟು ಪನಿಯಾಯಿರಂಗ? ² ಬೇರೆಲ್ಯಿ ನಾನು ಅಪೋಸ್ತಲ ನಾಗುಲ್ಲಗುಂಟೆಕು ನಿಂಗುಲ್ನು ಅಪೋಸ್ತಲನಾಯಿರೇ ಇಗೃರ್ಕು ನಿಂಗೆ ಸಾಕ್ಷಿ. ³ ನನ್ನ ವಿಚಾರಿಸ್ರಲ್ಯಿಕ್ಕಿ ಇದೇ ನಾಟ್ಟು ಉತ್ತರ ⁴ ತಿಂಗುರ್ಕು ಕುಡಿಕ್ರರ್ಗು ನಂಗುಲ್ನು ಹಕ್ಕಿಲ್ಯಯ್ಯ ⁵ ಸಹೋದರಿಯಾಯಿಕ್ರ ಪಂಡ್ನ ಹಾಗ್ಸ್ಕೊಂಡು ಕಿರಿ ತೀರಿರ್ಕ್ಕಿ ಮಿಕ್ಕಾ ಅಪೋಸ್ತಲ್ಯತ್ತರ ಕರ್ತನ ಸಹೋದರರ್ಕಾನಿ ಕೆಫಕಾನಿ ನಂಗುಲ್ನು ಅಧಿಕಾರಯಿಲ್ಲ್ಯ? ⁶ ಪನ್ನಿ ಸೈದೇ ಇಕ್ರುರ್ಕು ನಾಕು ಬಾರ್ನಬನ್ನು ಮಾತ್ರ ಅಧಿಕಾರಯಿಲ್ಯ ? ⁷ ಸ್ವಂತ ಖರ್ಚಿತಿಂದು ವಿಧಾನ ಎಷ್ಟೊದನ ಯುದ್ಧತ್ಕು ಹೊಗ್ರದಿಂದ? ದ್ರಾಕ್ಷೆ ತೋಟಾನ ನೆಟ್ಟಿಕ್ರ ವಿಧನ ಅತ್ರ ಫಲನ ತಿಂಗದೇ ಇಕ್ರದಿಂದ ಮಂಡೆನ ಮೇಯಿಸಿದ ಎದನ ಮುಂದೆತ ಹೈನ ತಿಗ್ಬೇಯಿಸ್ರದ್ದಿಂದ ? ⁸ ಮನುಷ್ಯ ರೀತಿಕುರು ನಾನು ಇಲ್ಯದಿನ್ನು ಸೋ೦ನರೇನ ? ಇಲ್ಲದೇ ನ್ಯಾಯ ಪ್ರಮಾಣ ಇತ ಸೋ೦ನ್ದಿಲ್ಲ್ಯ ? ⁹ ಕಣತುಳಿರಪೋದು ಮಾಡ್ತ ವಾಯಿನ ನೀನು ಕಟ್ಟುಬಾರ್ದು ಇಂಡು ಮೋಶೆಯ ನ್ಯಾಯಪ್ರಮಾಣತ್ಕುರು ವರ್ಜಿದು ದೌರು ಚಿಂತಿಸ್ರದು ಮಾಡ್ಕಾಯಿನ? ¹⁰ ಇಲ್ಲಿ ನಂಗುಲ್ಕೊಸ್ಕರ ಅದು ಸೋನಕೂ? ಉಳಿರಾದು ನಿರಿಕ್ಷೆಯಿಂಡು ಉಳಿರ್ದು ನಿರಿಕ್ಷೇಕುರು ಕನತ್ಕುಸ್ರದು ತಾಟ್ಟು ನಿರೀಕ್ಷೆಕುರು ಪಾಲು ಗಾರನಾಗುರ್ದು ಇಂದು ಇದು ವರೆಲ್ಪಟ್ಟಿದು. ¹¹ ನಾಂಗ ನಿಂಗುಲ್ನೂಸ್ಕರ ಆತ್ಮ ಸಂಭಂದವಾನತ್ತ ಭಕ್ತಿಕ್ರಜೀಸಲ್ಲಿ ನಿಂಗ್ಟು ಶಾರೀರವಾನತ್ತ ಹಾರ್ಗದು ಬೇರ್ದ. ¹² ನಿಂಗ್ಟು ಮೇನಿಯಿಗ್ರ ಅಧಿಕಾರತ್ಕುರು ಇತರರ್ಕು ಪಾಲು ಇಂದೇಕೆ ಅಲ್ಯಕ್ಕಿಂತ ನಂಗುಲ್ನು ಎಂದೂ?ಶ್ಯಾನ ಇಕೃರ್ದೆ ಅನೇಕೆ ನಾಂಗ ಈ ಅಧಿಕಾರನ ನಡ್ಸ್ ದೆ ಕ್ರಿಸ್ತನ ಸುವಾರ್ತೆಕ್ಕಿ ಅಡ್ಡಿಬಾರ್ದುಯಿಂಡು ಅದಿನು ಸಹಿಸಿ ಕೂ೦ಡಿರೋ ¹³ ಪವಿತ್ರವಾನತ್ತ ಸೇವೆಸೈರಾಗ್ಯ ಆಲಯತಿಂಡು ಜೀವಿಸಾಕುನ್ನುಯಿ೦ಡು ಯಜ್ಞವೇದಿಯಾ ಅಂಚಲಿ ಸೇವೆ ಸೈರಾಗ್ಯ ಯಜ್ಞವೇದಿಯ೦ಚಿಲ್ಲಿ ಪಾಲುದಾರರಿಂಡು ನಿಂಗುಲ್ನ ಗೊತ್ತಿಲ್ಯ. ¹⁴ ಅದೇ ರೀತಿಯಾಯಿ ಸುವಾರ್ತೆಯನ್ನ ಸರರ್ದು ಸುವಾರ್ತೆಯಿಂಡೇ ಜೀವನ ಸೈಯಿರ್ದುಯಿಂಡು ಕರ್ತನು ನೇಮಿಸಿದು. ¹⁵ ಅನೇಕೆ ಇತ್ಕೂರು ನಾಂಗ ವಂಡುನ್ನು ಉಪಯೋಗಿಸ್ಗಿಲ್ಲ ನಾನು ಇಂಗೂ ಹಾಗುದುಯಿಂಡು ಈ ವಿಷಯನ್ನ ವರ್ಚುಯಿಲ್ಲ ಎತ್ಗಿಂಡೇಕೆ ನಾನು ಹೆಚ್ಚಳಪಡರತ್ತೆ ವಿದನ ವ್ಯರ್ಥ ಸೈರ್ಕ್ಕಿಂಥ ಸಾಗ್ರದೇ ನಂಕು ನಾಲ್ಲದು ¹⁶ ನಾನು ಸುವಾರ್ತೆನ್ನ ಸಾರ್ನೇಕೂ ಹೆಚ್ರ್ಯಪಡ್ರುಕ್ಕು ನಂಕು ಎಂದು ಇಲ್ಲ ಸಾರುರ್ದುಯಿಗ್ರ ನಿರ್ಭಂದ ನಾಟ್ಟು ಮೇನಿ ಇದು ನಾನು ಸಾರ್ದ್ದೇಯಿಂದೇಕೆ ನಾಂಕು ಅಯ್ಯೋ. ¹⁷ ನಾನು ಇತ್ತತೇಯ ಇಷ್ಟಪಡು ಸೇದೆಕೆ ನಂಕು ಬಹುಮಾನಯಿದು ನಾಟ್ಟು ಇಷ್ಟತಗು ವಿರೋದ್ಧವಾಯಿ ಸೇದೆಕೆ ಸುವಾರ್ತೆಯ ವಿಷಯವನ ದೈವನೇಮ ನಾಟ್ಟು ವಶತ್ಗು ಕೂಡಲ್ಪಟ್ಟಿದು ¹⁸ ಹಾಂಗನೇಕೆ ನಾಟ್ಟು ಬಹುಮಾನಯೇದು?ನಾನು ಸುವಾರ್ತೆನ್ನ ಸರಪೋದು ಸುವಾರ್ತೆಕುರುಯಿಗ್ರ ನಾಟ್ಟು ಅಧಿಕಾರನ್ನ ನಾನು ದುರುಪಯೋಗ ಸೇದುಗ್ದೆ ಕ್ರಿಸ್ತನ ಸುವಾರ್ತೆನ್ನ ಉಚಿತವಾಯಿ ಸಾರುರದ್ದೇ ನಾಟ್ಟು ಬಹುಮಾನ. ¹⁹ ಅದೇರಿಂಡು ನಾನು ಸ್ವತಂತ್ರನಾಯಿದೆಕು ಇನ್ನೂ ಶ್ಯಾಲನ್ನ ಸಂಪಾದನೆಸೇಡ್ಗುಕೋಸ್ಕರ ನಾನತ್ತೇಯ ಅದೇಕು ಸೇವಕನಾಯಿ ಸೇದ್ಕೋ೦ಡಿರೆ ²⁰ ಯೆಹೂದ್ಯರ್ನ ಸಂಪಾದನೆಸೆಗುರ್ಕು ಯೆಹೂದ್ಯರ್ಕು ನಾನು ಯಹೂದ್ಯನಾಯಿ ನ್ಯಾಯ ಪ್ರಮಾಣದ ಅದೀನತ್ಕುರುಯಿಗ್ರಲ್ಯನ್ನ ಸಂಪಾದನೆ ಸೆಗುರ್ಕು ನ್ಯಾಯಪ್ರಮಾಣಕು ಅದೀನರಾಯಿಕ್ರಲ್ಯಿಕ್ಕಿ ನ್ಯಾಯ ಪ್ರಮಾಣಕ್ರು.ಅದೀನತ್ಕುರುಯಿಗ್ರಲ್ಯನ್ನ ಸಂಪಾದನೆಸೆಗುರ್ಕು ನ್ಯಾಯಪ್ರಮಾಣಕು ಅದೀನರಾಯಿಕ್ರಲ್ಯಕ್ಕಿ ನ್ಯಾಯ ಪ್ರಮಾಣಕ್ಕು ಅದೀನನಾಯಿಯೂ ²¹ {ನಾನು ದೌರ್ ನ್ಯಾಯಪ್ರಮಾಣಯಿಲ್ಲದೆಯಿಕ್ರದು ಅಲ್ಲ ಕ್ರಿಸ್ತನ ನ್ಯಾಯಪ್ರಮಾಣತ್ಗು ಒಳಪಟ್ಟಿಗ್ರದೇ} ನ್ಯಾಯಪ್ರಮಾಣಯಿಲ್ಲಯಿಕ್ರಲ್ಯನ್ನೆ ಸಂಪಾದನೆ ಸೇಯಿರ್ಕು ಅಲ್ಯಿಕಿ ನ್ಯಾಯಪ್ರಮಾಣವಿಲ್ಲದೇ ಇಗ್ರದು ಅನೆ ²² ಬಲವಿಲ್ಲದೇಯಿಕ್ರನ್ಯ ಸಂಪಾದನೆ ಸೈಯಿರ್ಕು ಅಲಿಕ್ಯಿ ಬಲವಿಲ್ಲದಾವಾನಾನೇ ಯೇದನ್ನ ವಿಧಾನತ್ಕುರು ಹಾಗೋಟ್ಟು ಅಲ್ಯಿನ ರಕ್ಷಿಸುರ್ದುಯಿಂಡು ಉತ್ತೆಂಚಲ್ಯಿಕಿ ಎಂಥೌನಾಗುದೋ ಅಂಥೌನಾಯಿರೇ ²³ ನಾನು ನಿಂಗ್ಲೇಟ್ಟಿಸುವಾರ್ತೆಯ ಫಲತ್ಕುರು ಪಾಲುಗಾರನಾಗುರ್ದುಯಿಂಡು ಸುವಾರ್ತೆಗೋಸ್ಕರನೇ ಇತ್ತಾತೇಯ ಸೇದೆ. ²⁴ ರಂಗಸ್ಥಾನತ್ಕುರು ಓದುರ್ಗದೇರು ಓಡುನೇಕು ವಂಡು ಮಾತ್ರ ಬಹುಮಾನ ಹೊಂದಿಗ್ರಕು ಇಗ್ರದು ಇಂಗುಲ್ನು ಗೊತ್ತಿಲ್ಯ? ಹಾಂಗೇ ನಿಂಗ ಬಹುಮಾನ ಪಡ್ಗುರ್ದುಯಿಂಡು ಓಡಗೂ ²⁵ ಪ್ರವೀಣತೆಕಾಯಿ ಹೋರಾಡುರ ಪ್ರತಿಯೊಂಡು ಅದಿ ವಿಷಯತ್ಕುರು ಮಿತವಾಯಿಕ್ಕಕ್ಕು ಅಗ್ಯೂ ನಾಶವಾಗ್ರ ಕೀಟನ್ನ ಹೊಂದಿಗಿರ್ಕಾಯಿ ಹೋರಾಡಕ್ನು ನಾಂಗೋ ನಾಶವಾಗ್ದೇಯಿಕ್ರ ಕಿರೀಟಕಾಯಿ ಹೊರಾಡರೋ ²⁶ ನಾನು ಗುರಿಗೊತ್ತಿಲ್ಯದೇ ಓಡದೇ ಗೆಲ್ಲಟೆಕುರುಯಿಗ್ರತ್ತಕಾಯಿ ಅಲ್ಯತ್ತರ ಒಡರೇ ನಾನು ಗಾಳಿನ ಗುದ್ದದವಾನಾಗ್ದೆ ಗೆಲ್ಲುರ್ದು ಇಂಡು ಹೊರಾಡರೇ ²⁷ ನಾನು ಬೇರೆಲ್ಯಕೀ ಸಾರ್ನ್ನ ಬೇಸಲ್ಲಿ ಎ ವಿಧತ್ಕುರು ನಾನು ಭ್ರಷ್ಟನಾಗ್ದೆ ನಾರ್ಟು ದೇಹನ ಅದೀನತ್ಕುರು ಅಂಚಕೊಂಡು ಅತ ಸ್ವಾದೀನಸೇದ್ಗರೇ.