¹ ವಂಡು ನಂಗುಲ್ನ ಕ್ರಿಸ್ತನ ಸೇವಿಕರಿಂಡು ದೌರ್ ಮಗ್ಯ ಉಟ್ಟವಾರ್ತೆತಗ್ಯಯಿಂಡು ಎಣಿಸೊಟ್ಟು ² ಉಟ್ರವಾರ್ತೆಗ್ಯ ನಂಬಿಗಸ್ತರಾಯಿ ಕಾಂಗರಂದು ಅವಶ್ರವಾಯಿದು. ³ ನನೋ ನಿಂಗುಲ್ಲುಯಿಂಡು ಮನುಷ್ಯ ನ್ಯಾಯವಿಚಾರಣೆಯಿಂಡಗೊಟ್ಟು ನುಕು ನ್ಯಾಯವಿಚಾರಣೆಯುಗ್ರಂದು ಅತ್ಯಲ್ಪವಾಯಿದು ನಾನು ನನ್ನ ವಿಚಾರಸ್ಗ್ ಮಾಟ್ಟೆ ⁴ ನಾನು ನಾನೆಯಿಯೇ ಎತ್ತು ತಿಳಿಜಿಗ್ದೆಯಿಕ್ರವನಾಯಿರೇ ಅನೇಕು ಅತಿಂಡು ನಾನು ನೀತಿವಂತನಾಗುಲ್ಲ ನನ್ನ ವಿಚಾರುಸ್ರದು ದೌರೇ. ⁵ ಇತಿಂಡೆ ಕಾಲವರ್ಕಿನ್ನ ಮುನ್ನೇ ಕರ್ತನ ವರ್ತಂಕ ಇತಾತೇಯು ಕುರಿತು ತೀರ್ಪು ಸೈವಾನಾಂಗ ದೌರು ಕತ್ತಲ್ಕುರುಯಿಕ್ರ ಗುಪ್ತಕಾರ್ಯನಾದಿನ್ನು ವಲ್ಸುರ್ಕು ಅತ್ತೇರಕು ಹೃದಯತ್ತೆ ಸಿಂತತೇಯ ಪ್ರತ್ಯಕ್ಷಪಡುಸುಕು ಅ ಪೋದು ಪ್ರತಿಯೊಂಡಲ್ಕು ವರ್ನ ಹೊಗ್ಗಕೆ ಪ್ರತಿಫಲ ದೌರಿಂಡೆ ವರ್ನಕು ⁶ ಅನ್ನದೇಬಿಮಾರೆ ನಾನ್ನು ನಿಂಗುಲ್ಲಕೊಸ್ಕರ ಸುಮ್ರರೂಪವಾಯಿ ನಾಟ್ಟು ವಿಷಯವಾಯಿಯು ಅಪೋಲೋಸ್ತನನ ವಿಷಯವಾಯಿಯು ಸೋನಿರೆ ವರ್ಜಿಕ್ರತ್ತ ನಿಂಗ ಮೀರಿ ಹೋಗದೆ ನಿಂಗುಲ್ಕುರು ವಂಡಲ್ನು ವಿರೋಧವಾಯಿ ಇನ್ನೊಂಡಲ್ನು ಉಬ್ಬಿಕ್ರ ದರಿಜುಯಿಂಡು ನನ್ ಯಿಂಡು ಕೆಜೊಂಗೋ ⁷ ನಿಂಗುಲ್ನ ಇನೊಂಡಲ್ಕು ತಾರತಮ್ಯ ಸೇದಿಕ್ರದು ಯೇಸು ನಿಂಗ ಹೊಂದುದೇ ಇಗ್ರದು ಯೇದು ನಿಂಗಲ್ಕುರು ಯೇದು ಈದು? ಹೊಂದಿದ್ಬೇಸಲಿ ಹೊಂದಿದೆಯಿಕ್ರ ಲತ್ತರ ಎತ್ಗೂ ನೀನು ಉಬ್ಬಿಗ್ಯರೆ?. ⁸ ನಿಂಗ ತೃಪ್ತಿರಾಯಿರಂಗ ಐಶ್ವರ್ಯವಂತರಾಯಿರಂಗ ನಾಂಗಿಲ್ದೆ ನಿಂಗ ಅರಸನ್ತರ ಅಳರಂಗ ನಿಂಗ ಅಳುರ್ಕಾನಿ ದೌರು ಸೇಂದಿದೇಕೆ ಎದ್ನೂ ನಾಲ್ಲದಾಯಿಂಚು ಅಪೋದು ನಾಂಗ್ಲು ನಿಂಗ್ಲೆಟ್ಟಿ ಆಳುತ್ತಯಿದೋ ⁹ ದೌರು ಅಪೋಸ್ತಲರನ್ನ ನಂಗುಲ್ನ ಮರಣತ್ಗು ನೇಮಿಸಿದೋ ಇಂಡು ಕಡೆಯಲ್ಯರವರಾಯಿ ತೋರಿಸಿದುಯಿಂಡು ನಾಕು ಕಂಗಕ್ಕು ನಾಂಗದೇರು ಲೋಕಕ್ಕು ದೂತರ್ಕು ಮನುಷ್ಯರ್ಕಿ ಕಂಡೂ. ¹⁰ ನಾಂಗದೇರು ಕ್ರಿಸ್ತನಿಂಡು ಹುಚ್ಚರಾಯಿರೋ ನಿಂಗ ಕ್ರಿಸ್ತನ್ಕುರು ಬುದ್ಧಿವಂತರಾಯಿರಂಗ ನಾಂಗ ಬಲಹೀನರಾಯಿಕ್ರಂಗ ಅನೇಕೆ ನಿಂಗ ಬಲಿಷ್ಟರಾಯಿಕ್ರಂಗ ನಿಂಗ ಗೌರವವುಳ್ಳವರಾಯಿರಂಗ ಅನೇಕೆ ನಾಂಗ ಹೀನೈಸಲ್ಪಟ್ಟಿಕ್ರರಂಗ ¹¹ ಇಮಾನ್ ತನಕ ನಾಂಗ ಫೇಸವಾಂದಿಕ್ರಂಗ ತಾನಿಶ್ಯಾಂಗ್ ವಾದಿಕ್ರಂಗ ಬಿಟ್ಟಂಗಯಿಲ್ಲದೆಯಿಕ್ರಂಗ ಉಟ್ಟುಯಿಲ್ಲದೇಯಿಕ್ರಂಗ. ¹² ಸ್ವತು ಕೈಯಿಂಡು ಪನಿಸೇದ್ದು ದುಡಿರಾಗ್ಯರಾಯಿರೋ ಬೈಸಿಕೊಂಡು ಅಲ್ಯನ ನಾಲ್ಲಡಗೊತ್ತುಯಿಂಕೆಡು ಹಾರೈಸರೋ ಹಿಂಸೆಪಟ್ಟುಗ್ಯಂಡು ಸಹಿಸ್ಗ್ಯಾರೋ ¹³ ಅಪಕೀರ್ತಿ ಹೊಂದಿಕೊಂಡು ಬೇಡಿಗಾರೋ ನಾಂಗ ಈಮನ್ ತನಕ ಲೋಕಕ ಕಸವಾಯಿರೋ ಅದೇರ್ತು ಕಸವಾಯಿರೋ. ¹⁴ ನಿಂಗುಲ್ನು ನಾಚಿಕೆಪಡ್ಸುರ್ಕಾಯಿ ಇತ ವರಿರ್ದೇ ನಾಟ್ಟು ಪ್ರೀತಿಯ ಮಗಿಗ್ಯಯಿಂಡು ನಿಂಗುಲ್ನ ಎಚ್ಚರಿಸುರ್ಕಾಯಿ ಈ ಒಕ್ನ ವರ್ಜಿರೇ ¹⁵ ನಿಂಗುಲ್ನು ಕ್ರಿಸ್ತನ್ಕುರು ಉಪದ್ಯಾಯರು ಪತ್ರು ಸಾವಿರ ಮಂದಿ ಇಂದೇಕು ತಂದೆಗ್ಯ ಶ್ಯಾನಲುಯಿಲ್ಲ ನಾನೇ ನಿಂಗುಲ್ನ ಸುವಾರ್ತೆಯಿಂಡು ಕ್ರಿಸ್ತ ಯೇಸುಕುರು ಪಡ್ಜುಗೊಂಡಿರೇ ¹⁶ ಇತ್ತಿನಿಂಡೆ ನನ್ನ ಹಿಂಬಾಲಿಸಾಂಗೋ ಇಂಡು ನಿಂಗುಲ್ನ ಬೇಡಿಗಾರೆ. ¹⁷ ಈ ಕಾರಣತಿಂಡು ಕರ್ತನ್ಕುರು ನಾಟ್ಟು ಪ್ರಿಯ ವತಾವನಾಯಿಕ ತಿಮೊನೆ ನನ್ನ ನಿಂಗ್ ಲಂಚುಗು ಹಂಪಾರೇ ಅದು ದೌರ್ಕುರು ನಂಬಿಗಸ್ತನಾಯಿದು ಅದು ಕ್ರಿಸ್ತನ್ಕುರು ಅದು ಕ್ರಿಸ್ತನ್ಕುರು ನಾಟ್ಟು ನಡಾವ್ಯಯಿಂದೇಕೆ ನಾನು ಎಟೆಟೀ ಪ್ರತಿ ಯೊಂಡು ಸಭೆಲ್ಕುರು ಭೋದಿಸ್ರ ಕ್ರಮನ ನಿಂಗುಲ್ನ ನೆನಪಿಕು ಅತ್ತೆರಾಕು ¹⁸ ನಾನು ನಿಂಗ್ಲಂಚುಗು ವರ್ಮಾಟೆಯಿಂಡು ಸ್ವಲ್ಪ ಜನ ಉಬ್ಬಿಗ್ರಂಡಿನ್ನು. ¹⁹ ಅನೇಕೆ ಕರ್ತನ ಚಿತ್ತಯಿಂದೇಕೆ ದೌಡು ನಿಂಗಂಚುಕು ವಂದು ಉಬ್ಬಿಗಂಡಿಕ್ರ ಓಕಲ್ಲಿ ಅಲ್ಯ ಶಕ್ತಿನ ತಿಳಿಜ್ಗ್ಯರೇ ²⁰ ದೌರ್ ರಾಜ್ಯ ಓಕುಕುರುಯಿಲ್ಲ ಅನೇಕೆ ಶಕ್ತಿಕುರು ಆಧಾರವಾಯಿಂದು ²¹ ನಿಂಗ್ಟ್ಟು ಇಷ್ಟಯೆಂದ? ನಾನು ಕೂಟ ಅಕ್ಕೊಂಡುವರನ? ಪ್ರೀತಿಯಿಂಡು ಸೌಮ್ಯ ಭಾವತಿಂಡು ವರನ?