¹ ಪ್ರೀತಿನ್ನ ಅನುಸರ್ಸಂಗೂ ಅನೇಕೆ ಅತ್ಕುರು ಆತ್ಮೀಕ ವರನ್ನ ಅತುಲ್ಲಿ ಪ್ರವಾದನೆಯನ್ನ ಅಸೆಪಡಂಗೂ ² ಒಕನ್ನ ವಾಸೆತ್ರದು ದೌರು ಸಂಗಡನ ಹೂಟ್ಟಿಕ್ಕೇ ಮನುಷ್ಯರ ಜೊತೆ ವಾಸೆತುದಿಲ್ಲ ಅದು ಆತ್ಮತ್ಕುರುಯಿಂಡು ರಹಸ್ಯನ ನುಡಿತ್ತಯಿಂದೇಕು ಯೇದು ಅತ್ತತ್ತೇಯ ತಿಳಿಜ್ ಗೊದಿಲ್ಲನ್ನು ³ ಪ್ರಾವಾದಿಸ್ರದೋ ಮನುಷ್ಯ ಜೊತೆ ವಾಸೆತ್ರವನಾಯಿ ಅಲ್ಯಿಕಿ ಭಕ್ತಿವೃದ್ಧಿಯ ಪ್ರೋತ್ಸಾಹನ ಸಂತೈಸ್ರತ್ತ ಉಂಟುಸೈಯಾಕ್ನು ⁴ ಒಕುನ್ನ ವಾಸೆತ್ರರಾದು ತಾಂಕುಮಾತ್ರ ಭಕ್ತಿನ್ನ ವೃದ್ಧಿಸೇದ್ಗಕ್ಕು ಪ್ರವಾದಿಸ್ರದು ಸಭೆಕಿ ಭಕ್ತಿನ್ನ ವೃದ್ಧಿ ಸೈಯಾಕು. ⁵ ನಿಂಗದೇರು ಒಕುನ್ನ ವಾಸೆತ್ರರ್ದುಯಿಂಡು ನಾನು ಅಸೆಪಡರೇ ಅನೇಕೆ ಅದಕ್ಕಿಂತ ನಿಂಗ ಪ್ರಾವಾದಿಸುರ್ದುಯಿಂಡು ನೆನಿಷ್ಯ ಒಕುನ್ನವಾಸೆತ್ರದು ಸಭೆಕೆ ಭಕ್ತಿವೃದಿಯಾಗುರ್ಕಾಯಿ ಒಕುತ್ನ ಅರ್ಧ ಸೋನಾರೇ ಹೋನೆಕ್ಕೆ ಅತ್ರುಕ್ಕಿಂತ ಪ್ರವಾದಿಸ್ರದೇ ಶ್ರೇಷ್ಟ ⁶ ಹಿಂಗಿಕ್ರತಿಂಡು ಸಹೋದರರೇ ನಾನು ನಿಂಗ್ಲಂಚುಗು ವಂದ ಪ್ರಕಟವನತಿಂಡಗೊಟ್ಟು ಇಲ್ಲದೇ ಜ್ಞಾನದಿಂದಗೊಟ್ಟು ಇಲ್ಲದೆ ಪ್ರವಾದನೆಯಿಂಡಗೊಟ್ಟು ಇಲ್ಲದೆ ಭೋದನೆಯಿಂಡಗೊಟ್ಟು ವಾಸತುದೇ ಓಕುಂಡು ಮಾತ್ರ ವಾಸತಿಂದೇಕೆ ನನಿಂಡು ನಿಂಗುಲ್ನು ಎಂದ ಪ್ರಯೋಜನ? ^{8 7} ಕೊಳಲು ವೀಣೆ ಮೊದಲನ ವಾದ್ನತ್ತ ಸ್ವರತ್ಕುರು ಎ ವೇತ್ಯಾಸನ್ನ ತೋರಿಸ್ದುಯಿಂಡೇಕೆ ಕಾಟ್ಟಿದೆಯಿಂದೇಕೆ ಊದಿದ್ದದು ಬಾರಿಸ್ರದು ತಿಳಿಜ್ ಗ್ರದು ? v 8 ತುತೂರಿಕಿ ಬೇರೆ ಶಬ್ದನ ಕೂಡ್ತೇಕೆ ತನನ್ನ ಯುದ್ದತ್ಗು ಸಿದ್ದ ಸೇದ್ ಗ್ರದು ಯೇದು? ⁹ ಹಾಂಗೆಯೇ ನಿಂಗ ಸುಲಭವಾಯಿ ತಿಳಿಜ್ಗುರು ಓಕುನ ವಾಸೆತುದೇ ಹೊನೇಕೆ ವಾಸೆತ್ನದು ಎಂದ ಇಂದು ಹೆಂಗೂ ಗೊತ್ತಗು? ನಿಂಗ ಗ್ಯಾಕುರು ವಾಸೆತ್ಕಾನಿ ಅಗ್ದುಷ್ಟೇ. ¹⁰ ಲೋಕತ್ಕುರು ಶ್ಯಾನ ವಿದತ್ತ ಸ್ವರಯಿದೇಕು ಇದೆಯಿಲ್ಲದ೦ದೇಕು ಅನೇಕೆ ಅತ್ಕುರು ಅರ್ಥಯಿಲ್ಲದೆಯಿಗ್ರದು ವಂಡುಯಿಲ್ಲ ¹¹ ಭಾಷೆಯ ಅರ್ಥ ನಂಕು ಗೊತ್ತಿಲ್ಲಯಿ೦ಡೇಕೆ ವಾಸೆದ್ರಾತ್ಗು ನಾನು ಅನ್ಯದೆಶತವನಾಯಿರೇ ವಾಸೆತ್ರದು ನಂಕು ಅನ್ಯದೆಶದದಾಯಿಕ್ಯಾಕು. ¹² ಹಾಂಗೇ ನಿಂಗ ಆತ್ಮೀಯ ವರತ್ಕುರು ಅಸಕ್ತಿಯಿಕ್ರತ್ಗು ಸಭೆ ಹೆಚ್ಚು ¹³ ಭಕ್ತಿವೃದ್ಧಿಕಾಯಿ ತವರ ಪಡಂಗೋ ¹⁴ ಅನ್ಯ ಓಕುಕುರು ನಾನು ಪ್ರಾರ್ಥನೆಸೇದೆಕೆ ನಾಟ್ಟು ಆತ್ಮನು ಪ್ರಾರ್ಥನೆ ಸೈಯಾಕು ಅನೇಕೆ ನಾಟ್ಟು ತಿಳಿವಳಿಕೆ ನಿಷ್ಪಲವಾಕ್ದು. ¹⁵ ಹಾಗಿಂಡೆಕೇ ಎಂದ ? ನಾನು ಆತ್ಮನಿಂಡು ಪ್ರಾರ್ಥನೆ ಸೈಯಾರೇ ಬುದ್ಧಿಯಿಂಡು ಪ್ರಾರ್ಥಿಸರೇ ಆತ್ಮನಿಂಡು ಪಾಡರೇ ಮತ್ತು ಬುದ್ದಿಯಿಂಡು ಪಾಡರೇ ¹⁶ ಇದಲ್ಲದೇ ನೀನು ಅತ್ಮನಿಂಡು ಸ್ತೋತ್ರಸೈರಾಪೋದು ತಿಳುವಳಿಕೆಯಿಲ್ಲದೇಯಿಕ್ರದು ನೀನು ಸೈರ ಕೃತಜ್ಞತಸುಕ್ತಿ ತಿಳಿದೆ ಇಗ್ರತಿಂಡು ನೀನು ಸೂಡ್ರತ್ಗು ಹೆಂಗೂ? ¹⁷ ನೀನು ನಿಜವಾಯಿ ನಾಲುಗೂ ಕೃತಜ್ಞತಸ್ತುತಿ ಸೈಯರ ಅನೇಕೆ ಬೇರೆಯೆಂದು ಭಕ್ತಿವೃದ್ದಿನ ಹೊಂದುಲ್ಲ ¹⁸ ನಾನು ನಿಂಗ್ ಲ್ಲದೇರ್ಕಿಂತ ಶ್ಯಾನ ಓಕುನ ವಾಸೇತರೇ ನಾಟ್ಟು ದೌರನ್ನ ಕೊಂಡಡರೇ ¹⁹ ಅನೇಕೆ ಸಭೆಕುರು ಅನ್ಯಭಾಷೆಕುರು ಪತ್ತುಸಾವಿರ ಒಕುನವಾಸೆತ್ರಕ್ಕಿಂತ ನಾಟ್ಟು ಬುದ್ಧಿಯಿಂಡುವೆಂಜು ಒಕುನ್ನವಾಸೆತ್ತಿ ಉಪದೇಶಸೈರಾದು ನಾಟ್ಟು ಇಷ್ಟ. ²⁰ ಬುದ್ಧಿಯ ವಿಷಯತ್ಕುರು ಬೇನ್ನೌರಯಿಕ್ ಮಾನಂಗ ಕೊಟ್ಟತ್ ವಿಷಯತ್ಕುರು ಶಿಶುವಾಯಿಂಡು ಬುದ್ದಿಯ ವಿಷಯತ್ಕುರು ಪ್ರಾಯಸ್ಥರಾಯಿರಂಗೋ ²¹ ಬೇರೆ ಒಕುತ್ತ ಮೂಲಕ ಬೇರೆಲ್ಯ ತುಟಿಯಯಿಂಡು ನಾನು ಮಂದಿರೇ೦ಟಿ ವಾಸೆತರೇ ಅನೇಕು ಆಗ್ಯ ನಾಟ್ಟು ಓಕುಕು ಸಾವಿಕುಡ್ಲುದಿಲ್ಲದು ಇಂಡು ಕರ್ತನು ಸೋನಕು ಇಂಡು ನ್ಯಾಯಪ್ರಮಾಣತ್ಕುರು ವರ್ಜಿದು. ²² ಅತಿಂಡು ಒಕು ನಂಬುರಲ್ಯಕಿಯಲ್ಲಿ ನಂಬುದೇಯಿಕ್ರಲ್ಯಕಿ ಸೂಚನೆ ಯಾಯಿದು ²³ ಸಭೆತಗ್ಯದೇರು ಕೂಡಿವಂದಪೋದು ಅದೇರು ಒಕುನ್ನ ವಸೆತ್ರದಾನೇಕೆ ತಿಳುವಳಿಕೆಯಿಲ್ಲದೆಯಿಕ್ರದು ಅವಿಶ್ವಾಸಿಗಳ ವಂದು ಹುಚ್ಚರಾಯಿರಂಗ ಇಂಡು ಸೋನುದಿಲ್ಯನ್ನ ? ²⁴ ಅನೇಕೆ ಅದೇರು ಪ್ರವಾದಿಸಪೋದು ವಂಡು ಅವಿಶ್ವಾಸಿಯಾಗೊಟ್ಟು ತಿಳುವಳಿಕೆಯಿಲ್ಲದವನಾಗೊಟ್ಟು ವೂಲಿಕ್ಕಿ ವಂದೇಕೆ ಅದು ಅದೇರಿಂಡು ತಿಳುವಳಿಕೆ ಹೊಂದಕು ಅದೇರಿಂಡು ಪರಿಶೋಧನಾಗ್ದು ²⁵ ಹಿಂಗೂ ಅತ್ರು ಹೃದಯತ್ತ ರಹಸ್ಯ ಕಂಡುವರಕೂ ಅಗ್ಯ ದೌರ್ನ ಆರಾಧಿಸಿ ನಿಜ್ ವಾಗ್ಲು ನಿಂಗುಲ್ಕುರು ದೌರು ಇದುಯಿಂಡು ಸೋನಾಕ್ಕು. ²⁶ ಹಾಂಗಾನೇಕೆ೦ದ ? ಸಹೋದರರೇ ನಿಂಗ ಕೂಡಿ ವಂದಪೋದು ಪ್ರತಿಯೊಂಡಲ್ಕು ಕೀರ್ತನೆಯಾಗೊಟ್ಟು ಭೋಧನೆ ಯಾಗೊಟ್ಟು ಭಾಷೆಯಾಗೋಟ್ಟು ಪ್ರಕಟನೆಯಾಗೊಟ್ಟು ಭಾಷೆತ್ತ ಅರ್ಧ ಸೋಡ್ರದಗೊಟ್ಟು ಇಕ್ಕಾಕುಷ್ಟೇ ಅದಿನ್ನು ಭಕ್ತಿ ವೃದ್ಧಿಕಾಯಿ ನಡ್ ಕೂಟ್ಟು ? ²⁷ ಯೇದನ ಅನ್ಯಓಕುನ ವಾಸೇತ್ರನಾನೇಕೆ ರಂಡಲು ಮತ್ತು ಮೂಡಲುಕ್ಕಿಂತ ಶ್ಯಾನಯಿಲ್ಲ ಯಿಂಡೇಕೆ ವಂಡುವಂಡಲಾಯಿ ವಾಸೇತ್ರದು ವಂಡು ಅರ್ಥನ ಸೋನೊಟ್ಟು ²⁸ ಅರ್ಥನ ಸೋನುದೇಯಿಂದೇಕೆ ಅದು ಸಭೆಕುರು ಮೌನವಾಯಿಕೊಟ್ಟು ಅದು ತಾನೇಟ್ಟಿಯು ದೌರ್ ಯೇಟಿಯು ವಾಸೇತ್ಗೂಟ್ಟು. ²⁹ ಪ್ರವಾದಿಗ್ಯ ರಂಡಲಗೊಟ್ಟು ಮೂಡಲಗೊಟ್ಟು ವಾಸೇತ್ಗೂಟ್ನುಮಿಕ್ಕಾಲ್ಯನ್ನ ವಿವೇಚನೆ ಸೈಯೋಟ್ಟು ³⁰ ಪಕ್ಕತ್ಕುರು ಉಕೂಂಡಿಕ್ರತ್ಗು ಪ್ರಕಟನೆ ಯಾನೇಕೆ ಮುನ್ನದು ಸಮ್ಮದೇಯಾಗೊಟ್ಟು. ³¹ ನಿಂಗದೇರು ವ೦ಡಲ್ ವಂಡಲಾಯಿ ಪ್ರವಾನೆ ಸೈಬೋದು ಹಿಂಗೂ ಸೇದೆಕೆ ಅದೇರು ಕೇಚ್ಗ್ಯಕ್ನು ಅದರೂ ಅದರಣೆ ಹೊಂದಿಗ್ಯಕ್ಕುನು ³² ಪ್ರವಾದಿಲ್ಯ ಅತ್ಮ ಪ್ರಾವಾದಿಯ ಸ್ವಾದೀನತ್ಕುರುಯಿದು ³³ ಪರಿಶುದ್ಧರ ಅದಿ ಸಭೆಕುರು ಇಗ ದೌರು ಸಮಾದನತ್ಗು ಹೊರತು ಗಲಿಬಿಲಿಕಿಯಲ್ಲಿ. ³⁴ ನಿಂಟ್ಟು ಪಂಲಗ್ಯ ಸಭೆಕುರು ಮೌನವಾಯಿಕ್ರದು ವಾಸೆತ್ರಕು ಅಲ್ಯಕೀ ಅಪ್ಪಣೆಯಿಲ್ಲ ಅಗ್ರ ವಿದೇಯರಾಗುರ್ದುಯಿಂಡು ನ್ಯಾಯಪ್ರಮಾಣನು ಸೋನಾಕ್ಕು ³⁵ ಅಗ್ಯ ಎಂತನ್ನ ತಿಳಿಜ್ ಗುರ್ಕು ಅಸೆಪಡೇಕ್ಕೆ ವೂಡ್ಕುರು ತಾಟ್ಟು ಮಾನಾಗ್ ನ್ನ ಕೊಕೂಟ್ಟು ಸ್ತ್ರೀಯರು ಸಭೆಕುರು ವಾಸೆತ್ರದು ನಾಭೆಗೆಡಿತ್ತನವಾಯಿದು ³⁶ ಎಂದ ದೌರ ವಾಕ್ಯ ನಿಗ್ಲಿಂಡೆ ವಂಚ ? ನಿಂಗುಲ್ನು ಮಾತ್ರ ವಂಚೋ ? ³⁷ ಯೇದನ್ನ ತಾನನ್ನ ಪ್ರವಾದಿಯ೦ಡಗೊಟ್ಟು ಭಾವಿಸಿಕೊಂಡೇಕೆ ನಾನು ನಿಂಗುಲ್ನು ವರ್ಜಿಕ್ರ ವಿಷಯ ಕರ್ತನ ಅಜ್ಞೆಗ್ಯ ಇ೦ಡು ನಾಲ್ಲುಗು ತಿಳಿಜ್ ಗೋಡ್ನು ³⁸ ಅನೇಕೆ ಯೇದನ ತಿಳಿದೆಯಿಕ್ರದನೇಕೆ ಅದು ತಿಳಿದೆಯಿಕ್ರದಾಗೊಟ್ಟು ³⁹ ಅಂತಿಂಡು ಪ್ರವಾದಿಸ್ರತ ಆಸೆಪಡ೦ಗೋ ಮತ್ತು ಒಕುನ್ನ ವಾಸೆತ್ರುತ್ಗು ಅಡ್ಡಿಸೈಮಾನಾ೦ಗ ⁴⁰ ಅದಿನ್ನು ಮರ್ಯಾದೆಯಿಂಡು ಕ್ರಮವಾಯಿ ನಡ್ಗೊಟ್ಟನು.