Pasal 15

Hukum Allah dan Tradisi Manusia

1 Lakadakoh, nyamani sok Farisi ge' ayo ahli Taurat umpatn Yerusalem utukng wa' Yesus ge' nyansana, 2 "Jailah ayo murid-Mu malanggar tradisi nenek moyang? Sabab, ayoa' ti' meetn barekng jangkah uman roti!"

3 Ge', Yesus naham ge' nyansana wa' ayoa', "Ge', jailah imu' uga' malanggar parintah Jabata demi tradisimu'? 4 Karna Jabata bafirman, 'Hormatimih sama' ge' sino'mu', ge', 'Asi da ngutuk sama' ato sino'a', arus gatnngukum kabis. 5 Namun, imu' nyansana, "Asi saja da nyansana wa' sama' ato sino'a', 'Jai pun da palalu kimu' nga gatnparsambah wa' Jabata," 6 ini' kati' palalu manghormati sama' ato sino'a'. Nige' ladakoh, imu mambatal firman Jabata demi tradisimu. 7 Imu', sok-sok da munafik, memang taman nubuatan Yesaya manganai imu: 8 'Bangsa diah manghormati Iko' nige' baba' ayoa',
tapi ate ayoa' jauh umpatn Iko.
9 Ge', sia-sia ayoa' manyambah-Ko nige' perintah-perintah talino."

10 Ge', Yesus maba' sok karah ge' nyansana, "Dangah ge' pahamilah! 11 Inya jai da maruh ka sadatn baba' da ngutor sok, tapi jai da mungkas umpatn baba'a', diata da ngutor sok" 12 Lakadakoh, ayo murid Yesus utukng ge' mansikatn wa'-Ini', "Panea Akupm bahwa ayo sok Farisi tersinggung jangkah ngadangah pansikatn diah?"

13 Namun, Yesus naham ge' nyansana, "Satiap pamura' da ti' gatnmura' kat Sama'-Ko' da ka surga ao' gatnnubut sampe' ka uhat-uhat a.' 14 Tea'lah ayoa'. Ayoa' anilah pangirikng-pangirikng buta umpatn ayo sok buta. Ge', sa' sok buta ngirikng sok buta, dua-dua a' ao' jantu' ka sadatn rubakng."

15 Petrus nyansana wa-Ini', "Manjelasmih parumpamaan dakoh wa' kai."

16 Yesus nyansana, "Anita kupm tinga paham uga'? 17 Anita kupm tinga ngarati bahwa jai tarutn da maruh ka sadatn baba' ao sosor ka putukng ge' gatnmatatn ka sadatn jammatn? 18 Tapi, jai da mungkas umpatn baba' timbul umpatn ate, ge' dakohlah da ngutor sok. 19 Karna umpatn ate timbul pikiran-pikiran da jahe', pangamis, babayu', duse-duse seksual, parangko, saksi palsu ge' fitnah. 20 Hal-hal diahta da ngutor sok, tapi uman tampa meetn barekng kati' ngutor sok."
Yesus Nulong Mahu Kanaan

21 Lakadakoh, Yesus anu umpatn teetn ge' nyingkir ka daerah Tirus ge' Sidon. 22 Ge', nyungan mahu Kanaan da barasal umpatn daerah dakoh utukng ge' ngampak, "Maseklah wa' iko', Tuhan, Anak Daud! Anak mahuko' kuat parah karasukan roh jahat."

23 Tapi, Yesus kati' naham mahu dakoh, nyapatah sarat pun. Ge', ayo murid-A utukng ge' ngalabak-A, "Ngadulah ini' boho karna ini' ti' madi'-madi' ngampak ka buntot ite'."

24 Lalu, Ini' naham ge' nyansana, "Iko' duhutn gatnutus wa' domba-domba da ilakng umpatn umat Israel."

25 Lakadakoh, mahu dakoh utukng ge' sujud ka tura Yesus, waatna', "Tuhan, nulonglah iko'!"

26 Namun, Yesus naham ge' nyansana, "Ti' bait naap roti da ya' ayo kangot ge' nyangkahatna' wa' ayo kasu'."

27 Mahu dakoh naham, "Taman, Tuhan, tapi kasu-kasu dakoh uman bara'-bara' da jantu umpatn meja tuana'."

28 Lakadakoh, Yesus nyansana wa'ini', "He mahu, imanmu ahyo! Jadilah ka imu' ulah da imu ngatte." Wa' ano dakoh uga', anak mahu a' gatnngangkauhatn.
Yesus Ngangkauhatn Karah Sok

29 Yesus boho umpatn teetn, ngaduk pihikng timu' Galilea. Ge', ngalaka namaat ka samo talidi, Ini' unyung ka teetn.

30 Lakadakoh, karah sok utukng wa'-Ini', minsakng ayo sok da lumpuh, cacat, buta, awa', ge' sok karah laitn a'. Lalu, ayoa' magurikng ayo sok dakoh ka kaja' Yesus ge' Ini' ngangkauhatn ayoa', 31 singge sok karah dakoh terheran-heran jangkah ayoa' mile' da awa' nyansana, da cacat gatnngangkauhatn, da lumpuh bajalatn ge' da buta mile'. Ge', ayoa' muji Jabata Israel.
Yesus Mangkatn Pangkuman Wa' Labih Ampat Ribu Ungan

32 Lalu, Yesus maba' ayo murid-A ge' nyansana, "Iko' ani pamase' wa' ayo sok dakoh karna ayoa' nga samahu nige' Iko' salama taru ano ge' kati' ani umpu' pangkuman. Ge', Iko' kati' ittuh ngadu ayoa' ure' saburuk supaya ayoa' kati' pingsan sadatn pajalatna'."

33 Lakadakoh, ayo murid nyansana wa'-Ini', "Umpatn dume ite' ao' kaatn roti da karah ka tampat sunyi' diah ya' ngangkabasoh sok da karah samu' diah."

34 Yesus mansikatn wa' ayoa', "Nyamani karah roti da mu' umpu'?"
Ayoa' naham, "Ijo, ge' nyamani ikatn inek."
35 Lalu, Yesus merintah sok karah dakoh unyung ka tana.' 36 Lakadakoh, Ini' naap ijo roti ge' ikatn-ikatn dakoh. Ge', gae mangucap syukur Ini' mata'-mata'a', ge' mangkatn a' wa ayo murid-A, ge' mangkatn a' wa' sok karah dakoh. 37 Ayoa' smaana uman ge' gatnngabasoh. Lalu, ayoa' naap santak-santak da kaba, ani ijo' garanjang panhu. 38 Ayoa' da uman ani ampat ribu ungan are, kati tarmasok mahu ge' ayo kangot. 39 Ngalaka ngadu sok karah dakoh ure', Yesus maruh ka parahu ge' anu ka daerah Magadan.