¹ Moomua sigadri ba aniiti nekpokpo nemolo manumesia miā nè, bu akuë esi kanu ta Laodikia nè, bu eba kuë esi kakoguo andrangbatara teepi nè, ² suato kobu na kiisu bu noomu éto, kobu nakaagaaga, kobu tome kana atamiibá, suato kiiti nemolo Angea bane, koti Kristu. ³ nemolo inu koodjaï norara neyi nombombiamdre bu notiandre. ⁴ Manumadia suato nombi kune nangaambaami mbee akuudiodio nzenzenge; ⁵ suato, kamabu aamiero teepi ne, ma aamiero tiisu, manumagua naakidjadja nodiamombe aamieto nè atapapi kpakpara Yesu to. ⁶ Too idri, pitesi nuungapata Nekumú Yesu-Kristu, anooyi neto, ⁷ pitesi na akoopupuru ba naagbaki neto nè atapapi, pitesi kaadobruami, anooku Angeako nembaï tongani pite. ⁸ Anariki ba nombi bu sikana nangodruami mbee atoti bandrene bu atiito dede apandre atodioti ebanye nè, atodió nyenyere esi na mokiliane esi kaba Kristu bane nè. ⁹ Si odiómombe pite esi kanya Angea nè kuudria tandreepi. ¹⁰ Niinua oodió pite inu bandre, ine nekúmú kisekee atokùmu ndubu. ¹¹ Asi neto inu napataï nuútú neyi ebanyete kakesi nè, too nuútú neyi Kristu bane, anya noosose bakine nero : ¹² idri kotébruami bane atuubatizo, aami siiso nungooru neto bane siipi, atapapi tokpakpara Angea bane, iirubrune atabru nè. ¹³ Aamisi nunzibru atodió dede dede esi bakine bu nuukosa nuútú nè, abrueewiami atora nero, besia maa nembaï atozambisi bawene, ¹⁴ iinzibru esiameaada esi kotibru aamaeto nè, bu esi kodribru baketiama nè, baadá odióè atetetu bandrene togbagba; ¹⁵ Idri Yesu onzibruï togbagba nè, Angea iidibrune nombi iïtanè biïbiá nekúmú neyi ebasi koguobrunye ekumù atape, biïtáè togbagba. ¹⁶ Nombi kana nanguyiamimbee atodio nanyanyoandre bu nombro too bu atodioï anya nidjadjandre, atangwe andrediameyi, bu atotuwe Angeandre; ¹⁷ abru namoodje odiosi kekubane, too neepi anu Kristu ba. ¹⁸ Nombi bu sikana nangekumiambee naakangbatara eba mobeanye nakuudiame emalaïkanye, nangowemiambee nedu bakine, too abasinendre atokpame aanzi bandrene neepiandre, ¹⁹ bila ba naagbandre atókúmú neyi nameepi ndubu anamamari noozu bu enzeefi esi Angea aawanè. ²⁰ Obuaba nunzibru Kristurone atodiosi na mokiliane, pitesi nanunudria at mokili, suato nanunapia ba anubu noopè : ²¹ Nungodrua mbée ! nungaabú mbée ! nungagba mbée ! ²² opè esi kanukoopua nekosa idru nukpatondru maada, odiosi kesianye atamibeko esi ebanyenè ? ²³ Odioè, karè atuukweli nakeepi neyi nombombiandre, si kokpa ba nesi to noni enga tandruisu nè, niisisia to bu ba nuguo neepi sikpa, too nè odio ndubu kayi to bambee si konanyaa naatate neepiandre.