¹ Imeani ba kwaneli ba Njambe, elenge bana balapani ; ² pe dalani atei epaeli, a ndakisa e Klisto, iyo apalaso, pe iyo asapa yo meene a Njambe tina esu elenge likabo pe mbeka e so epele. ³ Ye pite, pe nako ndenge emoti ebotaka seno, pe na posa e falanga, pe boda ameti bobeama atei enu, kasi ebwani adi basantu. ⁴ Pe booka maloba ma pe ekumu, pe mataki elenge, pe ma bosekisa, ngando iye idii na bokeseni na ndenge epele; bombaka dea nde misala mi ngolu. ⁵ Te ngasa, jeba yo na bopele, pe moto opite omoti, to ope boseno, o ekobo, edi obala bo, mosambeli o bokeko, aditi na esika atei e bokumu bo Klisto pe na Njambe. ⁶ Pe moto bokoseano a nzea e miako mibe te; zambi edi a modjo mo ngando iye bo kele bo Njambe botitaka diko di bana ba libebi. ⁷ Pe bodani nongo esika emoti nabu. ⁸ Mbala ekina odakini ta modidi, pe edeye odini mwinda atei e Kumu. Dalani enge bana ba mose! ⁹ Te ngasa mbuma e mwinda edi na ndenge esusu e molema mopele, e sembo pe na soti. ¹⁰ Injani iye ebwani ta miso ma Kumu; ¹¹ pe odani nongo ta misala mipe mbano e modidi, kasi e telemela. ¹² Zambi edi meene soni bobala iye ekoko bo ta sekele; ¹³ kasi iye esusu inemeki bo idi ibe inemi ta bohu tatei e pole, te ngasa iye enejami edi pole. ¹⁴ Na tina emina nabali nanu: Sisoa we, we yo oweke dea, Sisoa we atei e bago, pe Klisto anejabi we pole. ¹⁵ Dani na likebi na bosadaleja na makanisi imi manoi diko, pe olongo bato badala molo, kasi elenge bato ba bwanya; ¹⁶ Welani ngonga, te ngasa masu madi mabe. ¹⁷ Na tina yena bosatombani te, kasi sosolo iye edi posa e Kumu. ¹⁸ Pepe bolangwani mana te: edu bondumba, dani, naisolongo, balumaka atei e mwembo; ¹⁹ Sapani na ba masanjoli, na ba yembo, pe na njia e njembo ji masanjoli esenwake, na bomba pe bokumija na midema minu masanjoli ma Kumu; ²⁰ Pani kembo na tina e leka bosusu ta li Njambe Tata, na kombe e Kumu osusu Yesu Klisto, ²¹ Satosani bamoti na ba kina ta tei e bobanga bo Kumu. ²² Bali, dani na bosatitija adi bami banu, elenge edi Kumu; ²³ Te ngasa momi adi mokonji o mwali, elenge klisto adi mokonji o etonga, iye edi mokuku monde, pe poji iye adi moheledi. ²⁴ Njokande, elenge emoti etonga e tatitijaka adi Kumu, Pali koko batatiteje adi bami babu na makambo masusu. ²⁵ Bami, palani bali banu, elenge e pala Klisto etonga, pe asapa yo mene boji yo, ²⁶ Na tina bo asatuje yo na njia e liloba, ngongo ji boepetola na njia e batisimo e maliba, ²⁷ Na tina bo elejame ta boso bonde etonga e kemgo yena, janga itono, janga inyunyuku, janga eka emoti ehulana na yo, kasi esenwake pe etakipamela. ²⁸ Na tina yena bo bapala bali elenge e mokuku mobu mene. iyo opali mwali onde asapali yo mene. ²⁹ Te ngasa, moto takiye munu monde mene; kasi akayeje mo pe aka mobaniye, elenge Klisto akoko poji etonga, ³⁰ Poji bo boli binama bi mokuku monde. ³¹ Na tina yena momi akinaka sango pe nango onde, pe asabandeaka na mwali onde, pe bo babaye baimeaka munu momoti. ³² Libombami liya lili jinene; najoko yo ta tina e Klisto pe poji etonga. ³³ Na iye eliki, kina bo omoti omoti atei enu apale mwali onde elenge e yo mene, pe bo mwali atose momi onde.