¹ Odakini bago a bobe bonu pe na masumu manu, ² Na njia ye elaka no bolala engbanga ekina, elenge e njia e ngondo iye, bokokana na mwana o kumu o bihole, na mwembo imu mokokolea ta tei e bana ba bila. ³ Iso basusu koko, bodaki atei e motuya mobu, pe bolaki mbala ekina na maluli ma munu mosu, bokokijaka baposa ji munu pe makanisi masu, pe bolaki na elenge ebana ba kanda, elenge e bakina... ⁴ Kasi Njambe, iyo odi na wa, ta tina e epaleli enene iye epali yo su. ⁵ Iso ba balaka bago na tina e bobe bosu, loliya bomoyi na njia e Klisto( eli na njia e ngolu oliani bohelejama); ⁶ Asekoji so esika emoti, pe alo loheja esika emoti ta bisika bi diko, atei e Yesu Klisto, ⁷ Natina e boleja na bihole biluwaka bozwi bojangi suka bo ngolu ende na njia e bopele bonde ali so ta tei e Yusu Klisto. ⁸ Na tina yena na njia e ngolu iye eheleja so, na njia endimeli. Pe iyena elongiti na nu, eli kabo e Njambe. ⁹ Editi na njia emisala, bo moto asakumije. ¹⁰ Te ngasa boli bisaleli binde, lokelama atei e Yesu Klisto poji misala mipele, Imi mibongiji Njambe boso, na tina bo lomikoe. ¹¹ Na boa, mbala etongo basumuki ta munu, babeami bataki bolenama ngenga na njia e iye ebei bo balenami ngenga pe iba bali na munu na njia e momo ma moto, kanisani ni bp, ¹² olakani ta ehole iyena taka na Klisto, otakani makoki ma bolia kpoto ta Isalaele, baloa boloa ta bondeko bo eleka, taka na elikya pe ta e Njambe ta ngondo. ¹³ Kasi edeli, ta tei e Yesu Klisto, ino iba bakali boso bohali, oimeyani mbuti na njia e makiya ma Klisto. ¹⁴ Te ngasa ali bohui bosu, yo iyobo atei e babaye akoo ko omoti, pe iyo olumba etutu e bokabwana, ¹⁵ Na mokuku, abejaka mobeko mo mitindo ta tei e misono minde, na tina bo akele ta tei e nde yo mene na babaye moto omoti oyaine, na bo lajaka bowi, ¹⁶ Pe na bosangija bo, omoti na okina ta mokuku mo moti, na Njambe na njia e ekulusu, na bobejaka na njia eyo taka e bokana. ¹⁷ Oloi bobalea na tina e bowi naino ibaa balaka bohali, pe bowi naiba balaka mbuti; ¹⁸ Te ngasa na njia ende loliwa yongo mbuti e Tata, atei e mwembo momoti. ¹⁹ Na boa bo, oditini ba doa doa, pepe koko bato ba sokolu; Kasi olini bato ba ngando emoti basenwake, bato ba ndako e Njambe. ²⁰ Ino olendisamani diko ji moboko mo batoma pe mo basakoli, Yesu Klisto yo mene bolaka litayi li itumu. ²¹ Na njia ende ndoko jisusu, na molondo, engojami poji elae tepelo esenwake ta tei e Kumu. ²² Na njia ende oteyamini poji bo odaeni edaeli e Njambe ne Mwembo.