¹ Со дыкхья́ А́вдиё. Адя́кэ ракирэ́л Дэвэ́л Я́хвэ па́л Едо́мо: Амэ́ шундя́м со пхэндя́ Я́хвэ, и Лэ́стыр бичявдо́ исы́с ману́ш ко народы: “Вштэ́нте! Тэрдёва́са до марибэ́н пэ ла́тэ!” ² Ґэ́на Мэ скэра́ва ту́т тыкнэдырэ́са машки́р народы. Пэ ту́тэ наˍзакамэ́на тэˍдыкхэ́н. ³ Пхуткирдо́ тыро́ ило́ хоходя́ ту́т, дживэ́с ту до бэ́рґи по вучё́ штэ́то и ракирэ́с кокоро́ пэ́скэ: “Ко́н счюрдэ́ла ма́н пэ пху́в?” ⁴ Мэ́к ту и ґадэ́сапэ, сы́р о́рло, и машки́р черґиня́ скэрэ́са пэ́скэ штэ́то, Мэ счюрда́ва ту́т одотхы́р, ракирэ́л Я́хвэ. ⁵ Сы́р бы тэˍобчёрэ́н ту́т чёра́ ратя́кэс, – чи наˍхасё́сас ли ту! нэ ёнэ́ чёрэ́нас бы скицы́к лэ́нґэ трэ́би исы́с ва́ш пэ́скэ? Сы́р бы тэˍавэ́н кэ ту мануша́ савэ́ скэдэ́н винаґра́до, чи наˍачки́рна ёнэ́ ту́кэ му́ри савэ́ пэнэ́? ⁶ Сы́р обродынэ́ Исаво́с и попэнэ́ лэ́скиро ґаравдо́ барвалыпэ́н! ⁷ Традэ́на ту́т форо́стыр сарэ́ ко́н ту́са исы́с до миро́ па́л е́кх сками́нд, хохадэ́ ту́т, лынэ́ упралыпэ́н пэ ту́тэ мануша́ савэ́ ха́н тыро́ маро́ – и ёнэ́ подкэрдэ́ ту́т тэˍхасё́с, а ту наˍполэ́са нисо́. ⁸ Чи нанэ́ дэ одова́ дэвэ́с, ракирэ́л Я́хвэ, Мэ умара́ва ґодявирэ́н Едомо́стыр и одова́ со полэ́н пэ бэ́рґа Исаво́скири? ⁹ И авэ́на розмардэ́ тырэ́ зоралэ́ во́ины, Фема́но, сарэ́ ко́н Исаво́скирэ бэрґа́тыр, хасё́ла умарэ́на лэ́с. ¹⁰ Па́л одова́ со исы́с пхаро́ тырэ́ пшалэ́скэ Иаково́скэ лэ́ла ту́т ладжяипэ́н, и ту́т умарэ́на. До одова́ дэвэ́с сы́р ту исы́с тэрдо́ дэ ри́ґ: ¹¹ до дэвэ́с сы́р улыджяна́с лэ́скиро барвалыпэ́н и мануша́ авирья́тыр пхувья́тыр заґинэ́ дэ фо́ры и чюрдэ́нас жре́биё па́л Иерусали́мо, и ту исы́с е́кх лэ́ндыр. ¹² Нэ ту́кэ наˍтрэ́би исы́с тэˍтэрдё́с дэ ри́ґ и тэˍдыкхэ́с пэ пшалэ́стэ до дэвэ́с сы́р лэ́скэ исы́с пхаро́: и тэˍнаˍлошалё́л тыро́ ило́ сы́р хасё́нас Иуда́скирэ чяворэ́: и наˍтрэ́би тэˍґада́спэ и тэˍса́спэ дэ адава́ пхаро́ дэвэ́с. ¹³ Ту́кэ наˍтрэ́би исы́с тэˍзаджя́с до вуда́ры кэ Мирэ́ мануша́ до дэвэ́с сы́р явья́ би́да: и тэˍна́ˍдыкхэс пэ захалэ́ ры́нды до дэвэ́с сы́р явья́ би́да: и тэˍна́ˍтырдэс ва́ст кэ лэ́скиро барвалыпэ́н до дэвэ́с сы́р явья́ би́да. ¹⁴ И наˍтрэ́би исы́с тэˍтэрдё́с машки́р дро́м, тэˍумарэ́с одолэ́н ко́н нашэ́л: и наˍтрэ́би исы́с тэˍздэ́с манушэ́н савэ́ зракхнэ́пэ до дэвэ́с сы́р явья́ э би́да. ¹⁵ Па́л одова́ со нанэ́ ду́р дэвэ́с Я́хвэ пэ сарэ́ндэ манушэ́ндэ. Сы́р кэрдя́н ту, адя́кэ кэ́рна ту́кэ – тырэ́ ры́нды рисё́на пэ тыро́ шэро́. ¹⁶ Адя́кэ сы́р тумэ́ пье́нас пэ свэ́нто бэ́рґа Мири́, адя́кэ лэ́на тэˍпье́н сарэ́ мануша́ – и ёнэ́ лэ́на тэˍпье́н адава́ саро́, и кэ́рлапэ лэ́нса адя́кэ сы́р лэ́н и наˍисы́с. ¹⁷ А пэ бэ́рґа Сио́но зракхэ́напэ мануша́, ёнэ́ авэ́на свэ́нта, и залэ́на ёнэ́, кхэ́р Иаково́скиро, дэ пэ́скиро хулаибэ́н. ¹⁸ И авэ́ла кхэ́р Иаково́ско и Иосифо́ско яґа́са, а кхэ́р Исаво́ско – пхусэ́нса. И схачкирэ́на лэ́н, хаскирэ́на лэ́н, и наˍзракхэ́лапэ ни е́кх до кхэ́р ко Иса́во, па́л одова́ со Я́хвэ пхэндя́. ¹⁹ И залэ́на ёнэ́, Неґе́во, бэ́рґа Исаво́скири, а Шэве́ла – филистимлянэ́нса; и залэ́на ёнэ́ пху́в Ефримо́скири и пху́в Сама́рия, а Вениами́но – Ґалаадомо́са. ²⁰ Мануша́ савэ́ исы́с вхтылдэ́ чявэ́ндыр Израилёскирэ́стыр, савэ́ машки́р ханане́и ко Саре́пты, и вхтылдэ́ мануша́ Иерусалимо́стыр савэ́ до Сефара́да, залэ́на фо́ры Неґево́скирэ. ²¹ И ґадэ́напэ зракхипна́ря пэ бэ́рґа Сио́но, и лэ́на тэˍсэндякирэ́н бэ́рґа Исаво́скири, и авэ́ла Я́хвэ царё́са пэ сарэ́ндэ.