¹ Со дыкхья Авдиё. Дякэ ракирэл Дэвэл Яхвэ пал Едомо: Амэ шундям со пхэндя Яхвэ, и Лэстыр бичавдо сыс мануш ко народы: " Вштэнте! Тэрдёваса до марибэн пэ латэ!" ² Гэна Мэ скэрава тут тыкнэдырэса машкир народы. Пэ тутэ на закамэна тэ дыкхэн. ³ Пхуткирдо тыро ило хоходя тут, дживэс ту до бэрги по вучё штэто и ракирэс кокоро пэскэ; " Кон счурдэла ман пэ пхув?" ⁴ Мэк ту и гадэсапэ, сыр орло, и машкир чергиня скэрэса пэскэ штето, Мэ счурдава тут одотхыр, ракирэл Яхвэ. ⁵ Сыр бы тэ обчёрэн тут чёра ратякэс, – чи на хасёсас ли ту ! нэ ёнэ чёрэнас бы скици лэнгэ трэби сыс ваш пэскэ? Сыр бы тэ авэн кэ ту мануша савэ скэдэн винаградо, чи на ачкирна ёнэ тукэ мури савэ пэнэ? ⁶ Сыр обродынэ Исавос и попэнэ лэскиро гарадо барвалыпэн! ⁷ Традэна тут форостыр сарэ кон туса сыс до миро пал екх скаминд, хохадэ тут, лынэ упралыпэн пэ тутэ мануша савэ хан тыро маро– и ёнэ подкэрдэ тут тэ хасёс, а ту наполэса нисо. ⁸ Чи нанэ дэ дова дэвэс, ракирэл Яхвэ, Мэ умарава годявирэн Едомостыр и дова со полэн пэ бэрга Исавоскири? ⁹ И авэна розмардэ тырэ зоралэ воины, Фемано, сарэ кон Исавоскирэ бэргатыр, хасёла умарэна лэс. ¹⁰ Пал дова со сыс пхаро тырэ пшалэскэ Иаковоскэ лэла тут ладжяипэн, и тут умарэна. До дова дэвэс сыр ту сыс тэрдо дэ риг: ¹¹ до дэвэс сыр улыджянас лэскиро барвалыпэн и мануша авирэ пхувятыр загинэ дэ форы и чурдэнас жребиё пал Ирисулимо, и ту сыс екх лндыр. ¹² Нэ тукэ на трэби сыс тэ тэрдёс дэ риг и тэ дыкхэс пэ пшалэстэ до дэвэс сыр лэскэ сыс пхаро: и тэ на лошалёл тыро ило сыр хасёнас Иудаскирэ чяворэ: и на трэби тэ гадаспэ и тэ саспэ дэ дава пхаро дэвэс. ¹³ Тукэ на трэби сыс тэ заджяс до вудара кэ Мирэ мануша до дэвэс сыр явья бида: и тэ надыкхэс пэ захалэ рынды до дэвэс сыр явья бида: и тэ натырдэс васт кэ лэскиро барвалыпэн до дэвэс сыр явья бида. ¹⁴ И на трэби сыс тэ тэрдёс машкир дром, тэ умарэс долэн кон нашэл: и на трэби сыс тэ здэс манушэн савэ зракхнэпэ до дэвэс сыр явья э бида. ¹⁵ Пал дова со нанэ дур дэвэс Яхвэ пэ сарэндэ манушэндэ. Сыр кэрдян ту, дякэ кэрна тукэ– тырэ рынды рисёна пэ тыро шэро. ¹⁶ Дякэ сыр тумэ пьенас пэ свэнто бэрга Мири, дякэ лэна тэ пьен сарэ мануша – и ёнэ лэна тэ пьен дава саро, и кэрлапэ лэнса дякэ сыр лэн и насыс. ¹⁷ А пэ бэрга Сионо зракхэнапэ мануша, ёнэ авэна свэнта, и залэна ёнэ, кхэр Иаковоскиро, дэ пэскиро хулаибэн. ¹⁸ И авэла кхэр Иаковоско и Иосифоско ягаса, а кхэр Исавоско – пхусэнса. И схачкирэна лэн, хаскирэна лэн, и на зракхэлапэ ни екх до кхэр ко Исаво, пал дова со Яхвэ пхэндя. ¹⁹ И залэна ёнэ, Негево, бэрга Исавоскири, а Шевела– филистимлянэнса; и залэна ёне пхув Ефримоскири и пхув Самария, а Вениамино– Галаадомоса. ²⁰ Мануша савэ сыс вхтылдэ чявэндыр Израилёскирэстыр, савэ машкир хананеи ко Сарепты, и вхтылдэ мануша Иерусалимостыр савэ до Сефарада, залена форы Негевоскирэ. ²¹ И гаданапэ зракхипнаря пэ бэрга Сионо, и лэна тэ сэндякирэн бэрга Исавоскири, и авэла Яхвэ царёса пэ сарэндэ.