¹ Дэ перво бэрш Кироскиро сыр ёв сыс царёса дэ Персия, проракирдя Иеремиё лав саво дыя лэскэ Яхвэ, и соб дава лав тэ авэл скэрдо Яхвэ гадыя духо Кироско, царёско, и ёв пхэндя пир саро пэскиро царство, и зачиндя до лыла: ² "Дякэ ракирэл Киро, царё Персидско: "Саро царство пэ пхув дыя мангэ Яхвэ, Дэвэл болыбнаскиро и Ёв пхэндя мангэ та кэрав Лэскэ кхэр до Иерусалимо, саво дэ Иудея. ³ Кон кэ тумэ Лэскирэндыр манушэндыр, мэк зракхэла тумэн Дэвэл сыр тумэ лэна тэ рисён до Иерусалило, саво дэ Иудея, и скэрэна кхэр Яхвэ, Саво сын Дэвэл Израилёскиро -- дова Дэвэл, саво до Иерусалимо. ⁴ А одолэ мануша савэ аченапэ тэ дживэн пэ пэскирэ штэты, мэк ёнэ подрикирэн лэн и дэн лэнгэ сумнакай и руп, идя и ското, янэн адава саро илэстыр ваш Дэвлэско кхэр, саво до Иерусалимо". ⁵ И вштынэ пхурэдыр мануша Иудаскирэ и Вениаминоскирэ семьятыр, рашая и левиты и сарэн конэскиро ило захачкирдя Дэвэл, соб тэ джян тэ гадэн кхэр Яхвэ саво до Иерусалимо. ⁶ И сарэ иудеи подрикирдэ лэнгирэ васта и дынэ лэнгэ руп и сумнакай, идя и ското, дрогипэна, и кэ дава ёнэ додэнас бут со сарэ илэстыр. ⁷ И царё Киро вылыджия посуда кхэрэскири Яхвэ, сави Навуходоносоро залыя Иерусалимостыр, и чивдя лэн до кхэр кэ пэскирэ дэвэла. ⁸ И вылыджия лэн Киро, царё Персидско, вастэса Мифредатоскирэса, и пиригиндя и пиридыя лэн Шешбацароскэ, шэраласкэ пир Иудея. ⁹ И гэна со сыс: сумнакунэ чярэ -- триндэша, рупунэ чярэ -- дэшшэла, чурья -- биш иня, ¹⁰ сумнакунэ тахтая -- триндэша, рупунэ тахтая -- штаршэла дэш, и авирто посуда -- дэшшэла. ¹¹ Сари посуда сумнакуны и рупуны пандж барья штаршэла. Саро адава лыя пэса Шешбацаро сыр рисёнас Вавилоноскирэстыр пленостыр до Иерусалимо.