¹ Пхуром — дрого миро Гайо. Савэс мэ камам до чачибэн. ² Дрого миро, бутыр сарэстыр мангавпэ соб ту тэавэс састо и бахтало дякэ сыр ту зоралэс полэс Дэвлэс. ³ Мэ лошало кай явнэ пшала и роспхэндэ пал тыро джюипэн сыр ту дживэс до чачибэн. ⁴ Мэ дрыван лошало тэшунав кай мирэ чаворэ пхирэн до чачибэн. ⁵ Дрого миро, тыри буты бари со ту кэрэс вашэ пшалэнгэ и авирэ манушенгэ. ⁶ Ёнэ роспхэндэ дэ кхангири пал тыро камлыпэн. Ту куч кэрэса сыр пролыджаса лэн до дром сыр трэби дэвлэстыр. ⁷ Бо ёнэ гинэ ваш Дэвлэско лав и нисо на лынэ манушендыр. ⁸ И дасавэн амэ трэби тэпрылас, соб тэавас лэнса дэ ек Дэвлэски буты. ⁹ Мэ чиндём лыл кхангирякэ, нэ Диотрефо саво камэл саро тэрикирэл дэ пэскирэ васта, на прылэл амэн. ¹⁰ Пал одова, коли мэ явава, мэ зрипирава лэскэ со ёв кэрэл и со ёв пэ амэндэ налачо ракирэл. Лэскэ ещё кадава нафтылэл так ёв кокоро на прылэл пшалэн, савэн амэ бичадям и одолэнгэ кон камэл лэн тэпрылэ запхэнэл, а кон прылэл лэн ёв вытрадэл кхангирятэ. ¹¹ Миро дрого! На дык пэ дасавэ манушендэ, савэ кэрэн налачипэн и на кэр адякэ, а кэр лачипэн. Кон кэрэл лачипэн — одова Дэвлэстыр, а кон кэрэл на лачэ де́лы — одова на дыкхья Дэвлэс. ¹² Пало Димитростэ всарэнса роспхэндо лачипэн и амэ ракирас пал лэстэ и ту джинэс амаро ракирибэн чачюно-йсы. ¹³ Буд камйом тэчинав тукэ, нэ накамав тэчинав вастэса, ¹⁴ нэ думинав со дыкхасампэ и поракирасам як пэ як. ¹⁵ Бахт тукэ дэвлэстэр! Приветствуют тут пшала. Приветствуй пшалэн пиро лэнгиро лав.