¹ Мэ Па́вло, апо́столо Иисусо́ско Христо́ско пи́р Дэвлэ́скири во́ля, Саво́ Зракхья́ амэ́н, и Рае́скири Иисусо́скири Христо́скири во́ля дэ савэ́стэ амэ́ патя́с. ² Тимафеё́скэ, мирэ́ чячюнэ́скэ чявэ́скэ пи́р патябэ́н, – тэˍавэ́л лачипэ́н, ми́лость и ми́ро, Дадэ́стыр Дэвлэ́стыр и Иисусо́стыр Христо́стыр амарэ́стыр Рае́стыр. ³ Сы́р мэ, джя́вас дэ Македо́ния, манґьё́м ту́т тэˍаче́спэ до Ефе́со, со́б ту тэˍприпхэнэ́с манушэ́нґэ тэˍнаˍсыклякирэ́н авирэ́скэ ⁴ и тэˍнаˍпришунэ́нпэ кэ парами́цы и тэˍнаˍроскэдэ́н ко́н савэ́ родо́стыр, со адава́ лыджя́л кэ кошыбэ́н, а нанэ́ кэ Дэвлэ́скири буты́ до патябэ́н. ⁵ И адава́ со припхэна́в, исы́н камлыпэ́н жужэ́ илэ́стыр, лаче́ патыва́са и дэ чячюно́ патябэ́н, ⁶ исы́н мануша́ савэ́ отґинэ́ адалэ́стыр, и лынэ́ тэˍракирэ́н пэ бава́л, ⁷ ёнэ́ закамнэ́ тэˍсыклякирэ́н зако́но, саво́ дыя́ Дэвэ́л Моисеё́скэ, нэ кокорэ́ наˍполэ́н, со ракирэ́н и со сыклякирэ́н. ⁸ Амэ́ джина́с, со зако́но лачё́, сы́р мануша́ кэрэ́н адя́кэ сы́р дэ лэ́стэ чиндо́. ⁹ Джина́с со, зако́но чиндо́ нанэ́ ва́ш кандунэ́нґэ манушэ́нґэ, а ва́ш одолэ́нґэ ко́н наˍкандэ́л и наˍпхирэ́л до зако́но, конэ́стэ нанэ́ да́р Дэвлэ́скири, дживэ́н до бэзэха́, хасютнэ́ и на́ˍлаче, ґадэ́н ва́ст пэ дадэ́стэ и да́тэ, умарэ́н манушэ́н, ¹⁰ дживэ́н нанэ́ екха́са ромня́са, мурша́ лэ́н па́л пэ́стэ муршэ́н, бикнэ́н бутярнэ́н, хохавэ́н пэ манушэ́ндэ, и йивья́ солаха́н, и адя́кэж саро́ да́сово, со наˍсыклякирэ́л Дэвлэ́скиро Ла́в ¹¹ па́л саво́ ракирэ́л Ева́нґлия па́л сла́ва амарэ́ бахталэ́скирэс Дэвлэ́с. Адая́ Ева́нґлия дыя́ ма́нґэ Дэвэ́л тэˍлыдж́яв манушэ́нґэ. ¹² Наи́с ма́ндыр Иисусо́скэ Христо́скэ, амарэ́ Рае́скэ, Саво́ дыя́ ма́нґэ зо́р па́л адава́ со Ёв приджиндя́ ма́н чячюнэ́са и чивдя́ ма́н пэ пэ́скири буты́. ¹³ Мэ саво́ кэ адава́ кошава́с и трада́вас, чивава́с до бэшыбэ́н манушэ́н. Нэ Дэвэ́л простиндя́ ма́н па́л одова́ со мэ наˍджина́вас со кэра́в и наˍпатя́вас. ¹⁴ Нэ явья́ лачипэ́н амарэ́ Рае́скиро кхэтанэ́ патябна́са и камлыпна́са дэ Иисусо́стэ Христо́стэ. ¹⁵ Адава́ ла́в чячюно́ и ёв молэ́л тэˍприлэ́н лэ́с сарэ́: “Иису́со Христо́со явья́ до свэ́то, со́б тэˍзракхэ́л манушэ́н бэзэхэ́ндыр”, савэ́ндыр мэ пе́рво. ¹⁶ Нэ Дэвэ́л простиндя́ ма́н, со́б Иису́со Христо́со тэˍсыкавэ́л пэ ма́ндэ первонэ́стэ саро́ Пэ́скиро вырикирибэ́н, со́б тэˍдыкхэ́н мануша́ савэ́ тэ́нче патя́на дэ Лэ́стэ кэ ве́чно джиипэ́н. ¹⁷ Свэто́скирэ Царё́скэ, Саво́ наˍмэрэ́л, Савэ́с нико́н наˍдыкхья́, екхэ́скэ Дэвлэ́скэ – паты́в и сла́ва дэ сарэ́ дэвэса́ и дэ сарэ́ бэрша́, ами́нь! ¹⁸ Тимафе́ё, чяво́ миро́! Припхэна́в ту́кэ адя́кэ, сы́р исы́с пхэндо́ па́л ту́тэ проро́чество, савэ́са ту лэ́са тэˍкэрэ́с Дэвлэ́скири буты́, ¹⁹ до патябэ́н и лачи́ паты́в, савя́тыр ко́йˉсавэ́ мануша́ отпхэндэ́пэ и хаскирдэ́ патябэ́н. ²⁰ Да́савэ мануша́ Име́неё и Алекса́ндро савэ́н мэ отдыё́м бэнґэ́скэ, со́б ёнэ́ тэˍсыклё́н тэˍна́ˍкошэнпэ.