¹ Ракир лэнгэ кай тэавэн кандунэ пэскирэ властенгэ и начальникэнгэ, соб дэ саро тэкэрэн лачипэн, ² никонэс тэнакошен, тэявэн мирна и кротка сарэнса манушэнса. ³ Пал одова кай и амэ вариколи исыс нанэ годявир, нанэ кандунэ, на поласас нисо, кэрасас со камэласпэ и со амэнгэ чалёлас, дживасас дэ хохаибэн и дэ холы, исыс якхалэ пэ чужо, ек екхэс накамнэ тэдыкхас. ⁴ Нэ коли явья лачипэн и камлыпэн амарэ Спасителёско Дэвлэско, ⁵ Ёв зракхья амэн нанэ пал амарэ лачипэн саво амэ керасас, нэ пир Пэскири милость, вымордя амэн Свентонэ Духоса и биандя амэн нэвэ манушэнса, ⁶ Духоса Савэс Ёв вычюдя пэ амэнгэ через Иисусостэ Христостэ, амарэ Спасилестэ, ⁷ соб Лэскири милость тэзлэл амэндэр бангипэн, и соб амэ пал одова кай патяс тэявас наслидникэнса дэ вечно джюипэн. ⁸ Лав кадава чачё, и мэ камав, соб ту лав адава тэракирэс, соб долэ кон пятян дэ Дэвлэстэ тэавэн патывалэ дэ лачипэн саво камэн тэкэрэ, пал одова кай ада куч и трэби вашэ манушенгэ. ⁹ Нанэ годявир ракирибнастэр, пал кодова кон савэ родостэр и кошибэн пало законо кэ скандало, ада тукэ на треби, уджя далэстэр, ада нисо лачо надэл. ¹⁰ Мануш саво ракирэл нанэ чачё лав, екхвар авир моло лэскэ припхэн, а тэнче отджя лэстэр, ¹¹ джин, со адасаво мануш кердяпэ налачо, кэрэл бэзэх и ёв ужэ сындякирдо кокоро дэ пэстэ. ¹² Коли бичавава кэ ту Артемос и Тихикос сыгэдыр яв кэ мэ дэ Никополё, адякэ сыр мэ камав тэпролыджяв одой мразы. ¹³ Дык тэпролыджяс джинглэс дэ законо Зинас и Аполосос адякэ, соб лэндэ саро тэфтылэл. ¹⁴ Мэк и амарэ сыклён тэкэрэн лачипэн, соб тэподрикирэн эк экхэс сыр пхаро, соб ёне тэнадживэн йивья. ¹⁵ Приветствуют тут сарэ кон манса. Приветствуй долэн кон амэн полэл дэ пятябэн. Тэавэл сарэнса тумэнса Дэвлэскири бах. Аминь.