\c 1

1 ቂሮስ ሲም ፋርስሩዅ ኒሰልፋ አመሪል፣ እን ኤርምያስድ ኣብድ ድውስተዅ ቆል ጃሩዅ ተመምሮ መታን፣ ጃር መንፈስ ቂሮስ ሲም ፋርስሩዅሲ ጉድድጚዅ። ኒልክ ኒሕክምሊ ቆልዲ ክቱብዲሲ ንሰና ዮ ተምብሁዅ፣

2 “ቂሪስ ፍርስሩዅ ንሰና ያኵ፡ ‘አደራ ጃር ሰሚዅ ናትክ ሕክም ብሪውሲ ኡዅለ፣ ንኻ እን ይሁደትል ህምብረሪ ዮርሳሌምሊ ልጝን ከደምየሉ ኣደድዅለ፣ 3 ኣኻዅክ ኣኽን ኒእክልድ እንታ ነበክል ህምባዅ ኒጃር ኒዲ ኣኽኒ፣ እን ዮርሳሌምሊ መንደርታዅ ጃር፡ አዳራ ጃር እስራኤልዱዅ፣ ልጝን ከደምሮሉ እን ይሁደትል ህምብረሪ ዮርሳሌምሊ ፊን፣ 4 እን ህምበናዅ ኣካንሊ ከብተው ኣዪ ኣካንሊ መንደርተው ከው ናውክ ዮርሳሌምሊ ኣረርስዅ ጃር ልጝንድ እውን ኣኽሮ መታን፡ ናምራድድ እወነው ሞባእ ኰሲ ዳግ፡ ደሃብዲ ወርከዲ፣ እራኵዲ ማልዲ ኡነድ ካቢኒንሎም።” ’ 5 ኒልድኻ፡ ጃር ናመንፈሲ ጉድድጘዅ ይሁደሩዲ ብንያምሩዲ፡ እሕሉቕዲ ከዳታትዲ፡ ሌዋውያንዲ ናውክ ፈርድኖኽር ዮርሳሌምሊ ኣረርሳዅ ልጝን ሻትክ ጃሩዅሲ ከደምድኖ ደለምኑዅ። 6 እን ናገብገቢል መንደርተው ናውክ፣ እን ምራድድ ኡነውድ ንኻ፡ እራኵዲ ደሀብዲ ወርከዲ፡ ሰላዲዲ እንሱስዲ፡ ካብራን እውንዲ ኡነድ ካቢኒዅልም። 7 እን ነቡካነጻር ዮርሳሌምልድ ፍዶ ኒልጝን ጃሩዅሊ ገምዶሎም እርገው እራኵ ልጝን ጃሩሲኻ፣ ሲም ቂሮስ ፍድዅሎም። 8 ቂሮስ ሲም ፋርስሩዅኻ፡ ናን ሚትራዳት እን ማል ገማዅሲ ሻካዅድ ፍዶ ሲም ይሁደሩዅድ፡ ሽሽባጻርድ፣ ሺቦ እውዅሉ። 9 እን ሺብ ማላዃ ነን ግን፣ ሻሓናት ደሀቡ ሰዀረጝን፡ ሻሓናት ወርኪውኻ ላስሕ፡ ኣሪውር ናትናቱሩ ሻሓናት ኣኸው ለጘረጝንዲ ሰሳ፣ 10 ጽዋእ ደሀቡ ሰኾረጝን፡ ወርከድ ከደምሰው ጽዋእ ሰጃ ሊኽዲ ሽካ፣ እራኵ አሪውር ስሕ፣ 11 ናውክ እራኵ ደሀቡዲ ወርኪውዲ ኣⶖኳ ስሕዲ ሰጃሊኽዲ እርጉዅ። እን ሰልብስተው ባቢሎንትልድ ዮርሳሌምትል ፉኑ እⶖጉሲ፡ ሸሽባጻር ነስ ናትክ ፍድዅሎም።