¹ ዳዊትኻ ወንተሶ እስራኤልትልድ ፍሪርሰው ሰዀርጝ ስሕ ኣከው ግርው እክቡዅ። ² ዳዊዲ እን ኒዲ እርገው ከውዲ፡ እን ኪሩበል ታቦት ኣወይሊ ህምባዅድ ነበክል ሓደራዅ ጃር ጻቦኦቱዅ ስⶖድ ሽኝስታዅ ታቦትሲ፡ ናቕስድኖሉ ይሁዳ ብሪል፡ በዓለትል ፈርኑዅ። ³ ናውኻ፡ እን ታቦት ጃሩዅስዲ ሓዲስ ሰረጌሊል እሲነ፡ እን ጒርዕ ዳግ እርጋዅ ልጝን ኣቢናዳብሩዅልድ ጕድኑዅሉ፡ እን ሰረጌለስኻ ዑዛዲ ኣሕዮንዲ፡ ኣቢናዳብቝር፡ መርሕኑሉ እርግኑዅ። ⁴ ታቦት ጃሩዅ ሰረጌሊር ኣኾ፡ ኣሕይኻ ኒጃብ ጃብል ፈሩ እርጒዅ። ⁵ ዳውትዲ እስራኤልዱዲ ንውክኻ፡ መዝሙርዲ፡ በገነዲ፡ ዕንድርዲ፡ ከለምቡረዲ፡ ጸናጽልዲ፡ ደውልዲሲ፡ ናሒልዲክ ጃር ጃብል በረጁኑ እርግኑዅ። ⁶ እን ወረና ናኮንድዅሊ ገይእነሰናኻ፡ እን ቢል ዓቀፍስንነዲን፡ ዑዛ ኒናንሲ መደዶ እን ታቦት ጃሩዅሲ ሻዅላ። ⁷ ዑዛ ደፈሮ ኒስ እሲነዲን፡ ሓሪቆት ጃሩዅ ዑዛትል ሓውዩዅ፡ እማ ጃር ቀዘፍዅሉ፡ ንኻ ኒል እን ታቦት ጃሩዅ ገቢል ክሩዅ። ⁸ ዳዊትኻ፡ ጃር ዑዛት ከሪነዲንሉ፡ ጓሀይነድ ሓውዩዅ፣ እን ኣካንስኻ፡ ንኪ ኣኽታሲክ ሽጝስትራዅሰና፡ ጴረጽ-ዑዛ ዮ ሽጝዅላ። ⁹ ዳውት እን ግርጋ እንድሂቲ ጃርሲ ጒኢትነዲን፡ “ታቦት ጃሩዅ ኣዋኸ ይል እንተራዅን፧” ዩዅ። ¹⁰ እማ ዳዊት ታቦት ጃሩዅሲ ልጝን ዖቤድ-ኤዶም፡ ጊታዊሪዅሊ ቱስዅላ ግን ግራ፡ ዕርዲራ-ዳዊትሪትል ኒል ካስሮላ እጝከላ። ¹¹ እን ታቦት ጃሩዅዃ፡ ልጝን ዖቤድ-ኤዶም ጊታዊሪዅሊ ሰዃ አርባ ግጁዅ። ጃርኻ፡ ዖቤድ-ኤዶምዲ ኒውክ ኒልጝንዲት ገውሩዅሎም። ¹² ጃር እን ታቦት ጃሩዅ መታን ዮ ልጝን ዖቤድ-ኤዶምዲ ኒውክ ኒድ ህምባዅሲሉ ገውርዅሉ፡ ይኖ ሲም ዳዊትድ ድዊኒዅሉ። እንሲን ዳዊት ፈሮ ታቦት ጃሩዅሲ ልጝን ዖቤድ-ኤድምሩዅልድ ፈርሓትድ ዕርዲራ-ዳዊትሪትል ተረገስድዅሉ። ¹³ ኣኾኻ፡ እን ታቦት ጃሩዅሲ ሙዅረው ወልታ ስድር ፈርነሰና፡ ላዅ ቢረዲ ላዅ ሳዃ መደፍዲ ሰደቕኑዅ። ¹⁴ ድዊት ደአም፡ ኒውክ ኒሒልዲክ ጃር ጃብል በረጁ እርጒ፡ ዳዊት ኤፎድ ልሕጺ እንጣጢዕሩዅ ደበልቶኻ እርጉዅ። ¹⁵ ዳዊትዲ ንርውክ እስራኤልዲ ታቦት ጃሩዅሲ እልልተዲ ቃና መለኸቱዅዲሲ ተረገስድኑዅሉ። ¹⁶ ኣኾኻ፡ እን ታቦት ጃሩዅ ዕርዲራ-ዳዊትሪትል ትዉ እⶖጒሲ፡ ሚካል ሳኦልድቝራኻ፡ ሽባክድ ሓወጭሮ ሲም ዳዊቲ ጃር ጃብል ባⶖጒራዅስኽር በረጁዅስኽር ቋልደሪ፡ ንርለበከድ ቃበብቲሉ። ¹⁷ እን ታቦት ጃሩዅስኻ ናቕስኖ ኒኣካንሊ እን ዳዊት ካደማዅሉ ልጝን ነበክሊ ገምድንዅሉ። ዳዊትኻ ሓውያዅ ሰደቐትዲ ሰደቐት ሓምደሩዅዲ ጃር ጃብል ሱኵሱዅ። ¹⁸ ዳዊት እን ሓውያዅ ሰደቐትዲ ሰደቐት ሓምደሩዅዲት ሱኵሶ ድጞሰና፡ እን እክሲ ሱⶖ ጃር ጻበኦቱዅድ ገውርዅሎም። ¹⁹ ናውክ እን ከውዲ ናውክ ዕግሎ እስራኤልዱዲት፡ ግርዊልድ እዂነትል ኣኽታሲክ ናላዅ ላዅስክ፡ ላቅጨረዲ ላቅራጫ ስኺዅዲ ላዅ ጐጎ ደቢቡዅዲ በኒዅሎም። ኒደምብኻ እን ከው ናውክ ላዅክ ኒልጝል ፈሩዅ። ²⁰ ዳዊትኻ ኒልጝኝሲ ገውርዶ ወንተሩዅ። ሚካል ሳኦልድቝራኻ ዳዊቲ ከለብርቶሉ ፊቲ እማ፣ “ንኪ ሲም እስራኤልዱዅ፡ ገኝሺን መኳንንቲሩ ጃብል ላዅ ነፍዓጋዅ ኣዳምርሰና ካያ ኣኾ ቋልስትና ክብር ኣኽነዲን መኒ!” ይቲ። ²¹ ዳዊትኻ ንሰን ይዅላ፡ “የዋ ኵዅርዲ እን ኒልጝል እርገው ናትከልድ ኪዳዅ እሰ እክ ጃሩ እስራኤልድ ኣወይሲ መልካይ እሰ ፍሪራዅለ ጃር ጃብል በረጅያ ግን፣ ናጝር በረጅያ ግን። ²² ልሳዕ፡ ኒልድ ኣወይሲ ስዳውየሉ ግን፣ ኵጃብል ትክሰ ስማርዳዅ ኣኽያ ግን፡ እን እንቲ ይረሪለን ገኝሺንልኻ ከበርያ ግን፡ ይዅላ። ²³ ሚካል ሳኦልዱቝራኻ እን ክርዳ ግርጋ ኣኽታሲክ ውላድ እርግለላ።