1
ሓዲስድ ጃር እስራኤልት ገሪዅድክ ቀጥብሱዅ፣ እማ፡ ዳዊቲ “ፈሪ፡ እስራኤልዲ ይሁደዲት ሺቢ” ይዅሉ።
2
ሲምኻ ዮኣብዲ ኒዲ ህምበው ዓስከርሲ ኣደደውዲት፡ “ዳንትልድ ብኤር-ሸባዕ ኣኽታሲክ ሀምበው ፈራዕ እስራኤልዱሊ ናትክሊ ፈራ፡ ናብጅኽ ውሪከው ኣከነት አርእያ መታን ተሓረበውሲ ሺባ” ይዅሎም።
3
ዮኣብ ደአም ሲምቲ፡ “ኵአደራ ጃር ኵዓስከርስኪ ሊኽ እሽባ እሲናት፣ ዕልል ይአደሪውኻ ኒስ ቋልኒል ገእይኒን፣ ይአደራ ሲም ኒስ እሲሮ ጀረበዅ ውሪ መታን ግን፧” ዮ ወጝቅርዅሉ።
4
ደአም ሲም ዮኣብዲ ዓስከርሲ አደደውዲት ትእድድሲ እሲድኖ ቀሰብነዲንሎም፣ ኒጃብል ፍኖ ደሽ እስራኤልዱሲ ሺብድኖ ፈርኑዅ።
5
ዮርዳኖስቲ ካርነሰና፡ ዓጝቀርሊ ህምብረሪ ዕርዲረር ላው ሸጝገብድ ህምብርሪ ዓሮዔርትል ፊዅኑዅ፣ ኒልድኻ፡ ጋድድ ሃቢነ ያዕዜርትል ፈርኑዅ፣
6
ጊልዓድትል እንትኖኻ ብራ ታሕቲም-ሖድሺትል ቱኑዅ፣ ኒልድኻ፡ ዳን-ያዓንድ እሲነኻ ጅልውኖ ሲዶንትል ፈርኑዅ።
7
ኒሰናኽር ትብቲሰና ጢሮስሩዅድ፡ ሃዋውያንዲ ከነኣናውያንዲትል እንትኑዅ፣ ግብልት ይሁደሩዅድ ብኤር-ሸባዕትል እንትኑዅ።
8
ንርውክ ብረስ ጅልውኖ ሰሳ አርበዲ ልጘረጝን ኳራዲር ደምቢ ዮርሳለምሊ ወንተርኑዅ።
9
ዮኣብ እን ተሓረብውድ ሺብሲ ሲምድ አእሲሱዅ፣ እስራኤልትል ሰዃታ ሊኽ ስሕ፣ ይሁደትልኻ ኣⶖኳ ሊኽ ስሕ ሰፍ ሻኽድኖ ገረሰው ታምማን ዋኒነት ድዊዅሉ።
10
ዳዊት እን ተሓረበውሲ ሺበሰና ኒለበካ ወቀስነዲንሉ ጃርሲ፣ “ኣን ኒስ ይእስነድ በሀር በደል ከደምዅን፣ ዓወድናሩዅ ክድመት ከደምነዲን ኵዓይብ ብሕል ይለ!” ዩ ሺዊዅ።
11
ዳዊት ክሰራ ጐሰና፡ ቆል ጃሩዅ ነቢራ ጋትል፡ እን ዳዊትሩዅ ቋላዅሊ እንቱዅ፣
12
ንሰናኻ ይዅሉ፡ “ፈሪ እማ ዳዊቲ፣ ‘ጃር ንሰና ያኵ፡ ሰዃ ጋራት ፍሪርቶ ሱክስየልካ ግን፣ ናልድ ላሪት ፍሪሪ እማ፡ ንርቲ እስየልካ ግን’ ያኵ እⶖኲዅ ይሮ ጋቢሉ”።
13
ጋድኻ ዳዊትል እንቶ፡ “ኵብሪል ሰኻ ኣመራ ከአር እንትሮከማ ጀረብራክውን፧ ወሪ ሰዃ አርባ ኵኣፋይታ ገሸልድ እግርቶ፧ ወሪ ይኼ ኵብሪል ሰዃ ኳረድ ዕድር እንትሮ ጀረብራዅን፧ እማ ናን እን እኝሻቃዅሰለ ውራ ወንተሰትሉ ሓሰብሮ ኰድጚ” ይዅሉ።
14
ዳዊት ጋድቲ፣ “ገሪዅድክ ጨነቅሶ ህምበኵን፣ ደአም፡ ኒብሕልታ ገሪዅ ግን እማ፣ ናን ጃሩዅሊ ለብና ግራ፡ ናን አዳምሩዅሊታዲ ለበሊ” ይዅሉ።
15
እንሲን ጃር ብርክስኒልድ ተርሰ እን ኒ ኰድጘ እራጋዅ ወክት ኣኽታሲክ እስራኤልትል ዕድር ፈሱዅ፣ እን እከልድኻ ዳንትልድ ብኤር-ሸባዕ ኣኽታሲክ፡ ለጘትረጝን ስሕ ከው ክርኑዅ።
16
መልኣክ ጃሩዅ ዮርሳሌምቲ ድሂስሮ ኒናንሲ መደዶሰናኻ፣ እን ገእያዅ እኪትድ ጃር ጥዒሱዅ፡ እን እክሲ ድሒሳዅ መልኣክስኻ “በቃ! ኵናንሲ ወንተሲ” ይዅሉ። እን ወክት እንድሂስኻ፡ እን መልኣክ ጃሩዅ ወረና ኣራውና እን ይቡሳዊሪዅ ገቢል እርጉዅ።
17
ዳዊትኻ ኣን እክሲ ድሂሱ እርጋዅ መልኣክሲ ቋለሰነክሉ፡ ጃርሲ “እናሓን፡ ሓራም ከደማኽርዲ ከተኽርዲ ኣን ግን፣ ነን ደአም በግ ግንናው፣ ውራ እሲኒዅን፧ ኵናን ይዲ ይኽርድ ልጝንዲትል ኣኽርን” ይዅ።
18
እን ግርጋ እንድሂስኻ ጋድ ዳዊትል እንቶ፡ “ወረና ኣራውና እን ይቡሳዊሪዅሊ፡ ጃርድ ሰደቒሰና ከደሚ” ይዅሉ።
19
እማ፡ ዳዊት ጃር ጋድድ እሰ ያዅሰነሉ ፊዅ/ተረገሱዅ።
20
ኣራውናኻ ሱቖት መኸልተሪት፡ ሲምዲ ኒኝሺንዲ እንተሩኑ ቋሉዅ፣ ኒልድ ፈኻ ሲምድ ብሪል ፍግም ዮ ክብር ኡዅሉ።
21
ኣራውናኻ፡ “ይአደራ ሲም ኒገጂኒል/ኒኣገልገልደንቲል እንታዅ ውራ መታን ግን፧” ይዅሉ። ዳዊትኻ “እና መቕዘፍቲ እከልድ ገበብስሮ፡ ጃርድ ሰደቒሰና ከደምየሉ እና ኲወረነስ ጅብያ ግን” ይዅሉ።