1
ዳዊትኻ፡ እን ኒዲ እርገው እክሲ ሺብዅሎም እማ፡ ናአወይሲ ሓላቓ ስሑዲ ሓላቓ ሊዅዲ ሰየሙዅ።
2
ዳዊትኻ እን እክሲ፡ ወልትረጝንሲ ናን ዮኣብሩዅሊ፡ እን ወልትረጝንስኻ ናን ኣቢሻይ ጽሩያዅራ ዮአብድ ዳንሊ፡ እን ወልትረጝንስኻ ናን ኢታይ ጊታዊረዲ ሃበ ፈስዅሎም። ሲም፡ “እጝር እምንድክ እንተዲ ላት ፍያ ግን” ይዅሎም።
3
እን ከውኻ፡ “እንቲ ይነዲ ፋግረን ኪዳዅ ውረድ፡ ይንጝ እግርኖ ቀሰብስነን፣ ናው ይና ሰበትድ ሓሰበኒ፡ ይና ገፍ ክረነጝር ሓሰበኒኒክ፡ እንቲ ደአም ይነልድ ሽካ ስሕድ ኪድራዅ እማ ዕርዲረትል ኣኽሮ እልልደና ኪዳዅ” ይኑዅሉ።
4
ሲምኻ፡ “ትክያዅ ኣኾ ቋልስታዅሲኵኩም ኒትክ እስያ ግን” ይዅሎም። እማ፡ እን እክ ናውክ ሊኽዲ ስሕዲሲ ኣኺነክ ተሪትኖ ተረገሱኑ፡ ሲም ባብ ደንአቡዅሊ ደውዮ እርጉዅ።
5
ሲምኻ ዮአብዲ፡ ኣቢሻይዲ ኢታይዲት፡ “ይማታን ይድኖ ሻሎታ ኣቤሴሎምቲ ሃሽከብገሉ” ይዅሎም። ሲም ኒእዅራ ኣቤሴልምሲ ቋላዅድ ዓስከርሲ ኣደደውድ ትእዳድ እዉ ናውክ ዓስከር ዋስኑዅ።
6
እን እክኻ፡ እስራኤልቲ ታሓረብሮሉ ሕዳርሊ ፊዅ፡ እን ሓርብኻ ገርበት ኤፍሬምሩዅሊ ኣኺዅ።
7
ኒልኻ እክ እስራኤልዱ ከው ዳዊትሩ ጃብሊ ለተቕስኑዅ፣ እን ግርጋ እንድሂስኻ ተባዅ ድዳ ኣኹዅ፡ ለጘረጝን ስሕ ኣከው ከውኻ ክርኑዅ።
8
እን ሓርብኻ ንርውክ ብሪል ዳሕ ዩዅ፣ እን ግርጋ እንድሂሲ፡ እን ሰፍድ ድደውልድ እን ገርበት ዋሓጠውሎም በጀኻናዅ።
9
ኣቤሴሎም ከው ዳዊቱሲ ናጃብድ ጎፍ ይዅሎም፣ ኣቤሴሎምኻ በኽሊል ጨዓንሶ እርጉዅ፡ እን በኽላኻ ገርው ለጝክክ ሻዅ በሀር ድዋ ዓጝቀይ ቱቲ፣ ኒኣዀርኻ እን ድዋትል ሻኽስቱዅ እማ፡ ሰመዲ ብረዲር ነበክሊ ጠልጠልዩዅ፣ እን ኒሱቓይሲ እርግረሪ በኽላኻ ደኵቲ።
10
ላግርዋ ቆሎሉ ዮአብቲ፣ “እናሓን፡ ኣቤሴሎም ላድዋትል ጠልጠልዮ ቋልዅንሉ፡” ዮ ድዊዅሉ።
11
ዮአብኻ እን ድወዅሲሉ፡ “ውራ ይራዅን! ቋልድዅሉ፧ እማ ውራመታን ጠዓምብሮ ብረዲ ተከንድለሉ፧ ሽካ ሲቃል ወርከትዲ ተሓረበው ደበልተናዅዲ እውሪድካ ሻዅ ግን” ይዅሉ።
12
እን ግርዋኻ ንሰና ይዅሉ፡ “ላስሕ ወርኰ ድኳ ይናንሊ እውረንለ፡ ይናንሲ ሲምዅራ ዳግሊ ገምደሊ፣ ሲም ኵዲ ኣቢሻይዲ፡ ኢታይዲት ‘ይድ ይዱኑ ሻሎታ ኣቤሴሎምሊ ክሪል ገእሳዅ እሲገሉ’ ዩ እዋዅኩም ትእዳድሲ ይን ናውክ ዋስንዅን፣
13
እማ ኣን ትእዳድ ሲሙዅሲ ደኰ ኣቤሴሎምቲ ኵዋዅሉ ኣከን፣ ሲም ኒትክ ዋሰዅሰና ኒስኽር ኒዋስና ከብተላ፡ እንትኽር ኣክረን ይት ደአንድቶ ገበበለለ።”
14
ዮአብኻ፡ “ደአም እና ነወያዅድ ኵዲ ይወክትሲ ድሂስያ ጀረበሊ” ይዅሉ እማ፡ ሰዃ እኝሽኽ ኒናንተል እርገውሲ ኣዶፈሮ ኣቤሴሎም ኒርሕድ ድዋትል ጠልጠልዮ ዋኑ፣ ለበካ ኣቤሴሎምሩዅሊ ቱስዅለን።
15
ሽካ ሻሎት ዮአብሩ፡ ኣቤሴሎምቲ ክልውኑዅሉ እማ፣ ጠዓምኖ ኵኑዅሉ።
16
ዮአብኻ እን ሓርብ ደው ይሮ መታን መለኸት ጠዓምቡዅ፡ እንሲን እን ዓስከር እስራኤልቲ ሳደድኒልድ ወንተርኑዅ።
17
ኣቤሴሎምትኻ፡ አድኖ እን ገርበትሊ ኣረርሳዅ ጎቝሊ ማልኑዅሉ፣ ኒዳግልኻ ገሪው ክርጝ ኰመርኑ። እና ወክት ኒስኻ፡ እስራኤል ላዅክ ኒልጝንሊ እግሩዅ።
18
ኣቤሴሎም ኒሱⶖሲ ሽጚሳዅ ቍራ እዅራ እርግለሉ፡ እማ ኒርሕድ ዋኑ “ዓጝቀር ሲሙዅ” ይስቶ ሽጝስታዅሊ ኒሹሺ ሓወልቲ ከደሞ እርጉዅ፣ ኒሹር ሱⶖድ ሽጞሉ እርግነዲን ንኪ ኣኽታሲክ “ኣቤሴሎምሩዅ ሓወልቲ” ይስቱ ሽጝስታዅ።
19
እን ወክት እንድሂሲ ጻዶቅዅራ ኣሒማዓጽ፡ “ጃር ኒኣፋይትል ደአንደትሉ፡ እና ብሽራትሲ ድወይሉ ሲምሊማ ጋጝይን” ይዅሉ።
“” ‘’