¹ وبعد سته أيام شل يسوع بطرس ويعقوب واخوه يوحنا ، وانفرد بهم على جبل عالي ² وتغيرت هيئته قدامهم ونرو وجهه ساع الشمس ، ووقعت ثيابه بيضاء ساع النور ³ وفجأه بدي لهم مسى وإلياس ، وهم بيتحاكوا مع يسوع

⁴ فقال بطرس ليسوع :(يا سيد ، ما احلى اننا هانا سوا ، ولو تشتي افعل هنيه ثلاثه خيمات ، واحد لك واحده لموسى واحده لإلياس)

⁵ ولوما كان يتحاكا غطتهم سحابه مضويه ، وقال صوت من السحابه :(ذيه هو ابني الحبيب اللي يفرحني اسمعوا له)

⁶ ولوما سمع الطلاب ذيه الصوت نكعوا على وجيههم وافتجعوا قوي ⁷ وقرب منهم يسوع ولمسهم وقال لهم :(سنبوا ، لا تفتجعوش) ⁸ ورفعوا عيونهم وما ابسروش إلا يسوع لوحده

⁹ ولوما كانوا نازلين من الجبل وصاهم يسوع وقال :(لا تحاكوش أحد باللي ابسرتوه لوم يقوم ابن الانسان من بين الأموات)

¹⁰ فسأله الطلاب :(ليش يقولوا الفقهاء : لازم يجي إيليا اول شي؟)

¹¹ فجاوبهم يسوع :(ايوا ، يجي إيليا ويصلح كل شي) ¹² ولكني اقول لكم ان إيليا قد جاء وما عرفوه ، وفعلوا به على مزاجهم ، وكذيه ابن الانسان عيتوجع على ايديهم ¹³ ففهم الطلاب انه كان يحاكيهم عن يوحنا المعمدان ¹⁴ ولوما رجعوا للناس ، قرب منه رجال وسجد ¹⁵ وقال له :(ارحم ابني ياسيدي ، لأنه بينه صرع وبيتوجع قوي وينكع خيرات بين النار والماء ¹⁶ واديته لطلابك وما استروش انهم يشفوه

¹⁷ فجاوب يسوع :(انتوا جيل مش مؤمن وفاسد ، ليحين شجلس معاكم؟ وليحين اتحملكم؟ ادوا الجاهل هنيه) ¹⁸ وصيح يسوع على الشيطان وخرج من الجاهل ، واتشافى على طول

¹⁹ فجوا الطب ليسوع وحاكوه لحالهم وقالوا له :(ليش احنا ما استرناش اننا نخرجه؟)

²⁰ فقال لهم :(لأن ايمانكم ضعيف ، واقول لكم الصدق : لو كان فيكم ايمان ساع حبة الخردل كنتوا عتقولوا لذيه الجيل انتقل من هانا وينتقل ولا يوقف قدامكم شي) ²¹ وذيه النوع مايخرج إلا بالصلاه والصوم ²² وكان الطلاب مجتمعين في الجليل ، فقال لهم يسوع :(عيتسلم ابن الانسان لأيدي الناس ²³ فيقتلوه ، وفي اليوم الثالث يقوم من بين الأموات) وغثيوا الطلاب قوي ²⁴ ولوما رجع يسوع وطلابه إلى كفر ناحوم ، جو جباة الضرايب حق الهيكل لبطرس وسأوه :(سيدكم بيدفع ضريبة الهيكل او ماشي؟)

²⁵ فرد عليهم :(ايوه)

ولوما دخل بطرس للبيت باشره يسوع بسؤال وقال له :(ايش رأيك ياسمعان ، من اللي يشلوا منه جباة الضرايب الجزيه؟ من اولاد البل ولا من الغرباء؟)

²⁶ فجاوبه بطرس :(من الغرباء) فقال له يسوع :(يعني عيال البلد احرار من دفعها

...

²⁷ ولكن عشان مانشتيش نحرج احد ، سير للبحر وارجم السناره حقك وامسك اول سمكه تخرج وافتح فمها ، عتلاقي فيها قطعه قيمتها اربعه دراهم ، شلها وادفعها عني وعنك)