¹ بعد كذا شفتو ملاك ثاني نازل من السماء، له سلطة عظيمة، الأرض ضوت من بهاؤه. ² وصاح بكل صوته:" سقطت ،سقطت بابل العظمى، ورجعت مسكن للشياطين ومأوى لكل شيطان نجس وعُشّ لكل طير نجس مكروه، ³ لإنو كل الأمم شربت من خمر فسقها وشرها، وملوك الأرض فيبها، وتجار الأرض إغتنوا من كثرة الخير اللي فيبها!" ⁴ وبعدين سمعتو صوت ثاني يصيح من السماء:" اخرجوا منه يا شعبي ، عشان ما تشاركوا بذنوبها، وتجي لكم مصائبها، ⁵ لإنو ذنوبها تراكمت ووصلت للسماء،وما نسيش الله جرائمها! ⁶ عاملونها مثلما عاملتكم،وردوا لها الجزاء مضاعف، وبالكأس اللي خلطت فيبه للآخرين إخلطوا لها الضعف. ⁷ عذبوها واقهروها بقدر ما عظّمت نفسها واترفهت. لإنو تقول بنفسها: أني جالسة ملكة فوق العرش ومانيش أرملة، وما شاعرفش الحزن أبداً. ⁸ عشان كذا بتجي لها المصائب بيوم واحد، الموت والحزن، والجوع، وشتحترق بالنار، لإنو الله اللي حكم حكم عليها هو رب قوي. ⁹ وشيبكي عليها ملوك الأرض اللي زنوا بها واترفهوا معها، لما يشوفوا الدخان وهي تحرق، ¹⁰ ويوقفوا بعيد منها، خائفين من عذابها، ويصيحوا ويقولوا: يا ويلك، يا ويلك، يا مدينة بابل العظيمة،القوية! بساعة واحدة جالك العقاب ! ¹¹ وشيبكوا عليها تجار الأرض ويحزنوا عليها، لإنو ما حد بيشتري بضاعتهم، ¹² لإنو هي كانت تشتري منهم الذهب والفضة والأحجار الكريمة واللؤلو، والكتان والأرجوان والحرير والقرمز،وعطور متنوعة، وكل الأشياء المصنوع من العاج والخشب الغالي، والنحاس والحديد والرخام، ¹³ والقرفة والبهارات،والبخور والمر واللبان، والخمر والزيت والدقيق والحبوب والبهائم والغنم، والخيل والعربيات،حتى أجسام العبيد ونفوس البشر. ¹⁴ ويقولوا التجار:" الثمر اللي تمنيتوه نفسِك ضاع منِك،كل الغنى والنعيم راح منِك وما عاشرجعش!" ¹⁵ والتجار اللي كانوا يبيعوا هذي الأشياء واغتنوا من هذي المدينة،واقفين بعيد منه، خائفين عذابها، يبكوا وينحبوا ¹⁶ ويقولوا : يا ويل،يا ويل المدينة العظمى! كانت تلبس الكتان والأرجوان والقرمز، وتلبس الذهب والأحجار الكريمة واللؤلؤ، ¹⁷ وبساعة واحدة ضاع هذا الغنى كله! وسواقين السفن والركاب والبحارة، وكل اللي يشتغلوا بالبحر، وقفوا بعيد،

¹⁸ يشوفوا للدخان وهي تحرق،ويصيحوا: أي مدنية تشبه هذي المدينة العظيمة؟ ¹⁹ ويرشوا التراب فوق رؤوسهم ويصيحوا ويبكوا: يا ويل ، يا ويل المدينة العظمى اللي اغتنى من ثروتها أصحاب سفن البحر كلهم! أدمرت بساعة واحدة! ²⁰ إفرحي يا سماء لانو تدمرت ! وافرحوا يا صالحين أنتم والرسل والأنبياء، لإنو الله عاقبها على اللي عملتُه فيبكم" ²¹ وأخذ ملاك قوي حجر كأنه حجر مطحن كبير، ورجم فيبه البحر وقال:" كذا بعنف شترمدينة بابل العظيمة، وشتختفي للأبد! ²² وما عاد يُسمع فيبك صوت غناء ولا موسيقى،ولاصوت مزمار ولا بوق، وماعاد يبقي فيبك صانع مهما كانت حرفته، ولا يسمع فيبك صوت طاحون. ²³ ولا يولع فيبك ضوء سراج،ولا يُسمع فيبك صوت عريس وعروسه، تُجّارِك كانوا عظماء الأرض، وسحرك قاد كل الأمم للضلال. ²⁴ بهذي المدينة حصلوا دم الأنبياء والصالحين، وكل من قُتل بالأرض."