¹ وبعدا جابوا لي عصا طويلة اقيس به، وقلي روح وقيس هيكل الله والمذبح، وعد اللي يتعبدوا بالهيكل. ² وقلي ما تقيسش الساحة اللي خارج الهيكل فهي مخصصه للشعوب، وشيدعسوا المدينة المقدسة اثنان وأربعين شهر. ³ وقلي شأجيب اثنان شهود يتنبئو مدة ألف ومئتين وستين يوم، ⁴ وهاذوم اثنان الشهود هُم اثنتين اشجار الزيتون واثنان المصابيح القائمين قدام رب الأرض. ⁵ ولو واحد يشتي يأذيهم يخرج من فهمهم نار وياكلوا أعداهم. كُل اللي يشتي يأذيهم شتكون نهايته القتل. ⁶ وهاذوم اثنان الشهود يقدروا يغلقوا السماء، فما ينزلش مطر الوقت اللي هم يتنبأوا فيبه. ⁷ ولما يكملوا شهادتهم، فيخرج لهم وحش من الهاوية ويتحارب معاهم ويهزمهم ويقتلهم. ⁸ وشتجلس الجثث حقهم مطروحات بشارع المدينة الكبيرة، اللي ترمز له باسم سدوم أو مصر، مكان ماصلب ربهم. ⁹ وتشوف الناس من كُل الشعوب والقبائل واللغات والأمم تشوف الجثث حقهم مدة ثلاث أيام ونص، وما يسمحش لواحد يقبرهم. ¹⁰ والناس كُلها تستهر فيبهم ويفرحوا كانه عندهم عيد، ويتبادلوا بينهم البين الهدايا، لأنوه هاذوم اثنان الأنبياء قد كانوا عذبوا الناس عذاب كثير.

¹¹ وبعد الثلاث الأيام والنص، الله دخل فيبهم روح الحياة، فرجعوا قاموا ووقفوا بأرجلهم، والناس اللي كانوا يشوفوهم افتجعوا فجيعة كبيرة. ¹² وسمعوا اثنان الأنبياء هاذوم صوت قوي من السماء يقلهم: "اطلعوا لعندي."

¹³ وبنفس الوقت، وقع زلزال قوي، فعُشر المدينة اتهدمت، وقتلوا سبعه الاف رجال. واللي نجوا من الزلزال جلسوا يستغفروا الله من الفجيعة.

¹⁴ كملت الكارثة الثانية، وشتجي كارثة ثالثة ذاحين. ¹⁵ وبعدا نفخ الملاك السابع ببوقه، وسمعت اصوات قوية بالسماء تقول: "ممالك العالم اصبحت ذاحين لربنا ومسيحه، وشيحكموا لأبد الآبدين." ¹⁶ والشيوخ الأربعة والعشرين الجالسين فوق عروشهم قدام الله سجدوا لله وسبحوا الله. ¹⁷ وقالوا له: "نشكرك يا ربنا القادر على كُل حاجة، الموجود واللي كان موجود من أول، نشكرك لأنك شليت قدرتك الكبيرة والملك حقك بداء. ¹⁸ فالكفار زعلوا، وذاحين جاء وقتك تزعل منهم، وجاء الوقت اللي شتحاكم فيبه الميتين، وشتجازي عبيدك الأنبياء والصالحين واللي يخافوا من اسمك صغار وكبار، وتهلك الناس اللي يفسدوا بالأرض."

¹⁹ وبعدا افتتح هيكل الله بالسماء، وبدي صندوق العهد بداخله. ووقعت بروق وأصوات ورعود وزلزال ونزل برد كثير.