¹ Mukulekelesha, ba wesu, tulemukonkomesha no kumukoselesha muli Shikulu Yesu. Ngefyo mwapokelele ifyakucita ukufuma kuli fwe ifyo mufwile ukwenda no kusekesha Lesa, namuli uyu wine umusango endeni, pakuti mucite fyo mukucilapo. ² Pantu imwe mulishibe ifyakucita twamipele ukupitila muli Shikulu Yesu. ³ Pantu ubu ebufwayo bwakwa Lesa, ukusangululwa kwenu, ukuti mutaluke ubulale-lale, ⁴ ukuti cila muntu pali mwe eshibe ifyakukwata icipe cakwe umwine muli bumushilo no mucinshi, ⁵ temukufwaisha kwa lunkumbwa (ngabena fyalo abashaishiba Lesa). ⁶ Tekwesha nangu umo umo ukubembuka nangu ukulufyanya munyina muli uyu mulandu. Pantu Shikulu ekalandula muli fi fintu fyonse, ngafilyafine twamusopeshe kunuma no kupelo bunte. ⁷ Pantu Lesa tatwitile ku kukowela, lelo kuli bumushilo. ⁸ Eico, uyo onse uwakana ici, takenefye abantu, lelo Lesa, uupela Umupashi wakwe Uwamushilo kuli mwe. ⁹ Ukwisa ku kutemwa kwa bumunyinane,tamulekabila umuntu nangu umo ukumilembela, Pantu imwe mwebene mulafundwa na Lesa ukulatemwa umo no munankwe. ¹⁰ Cine cine, mulacita ifi kuli bonse ba wesu abali mu Macedonia. Lelo tukomikoselesha ba wesu, ukulacite fi mukucilapo. ¹¹ Tukomukoselesha kabili ukulaikala ubwikashi ubwatalala. mulesungilila incito shenu , kabili mulebomba na maboko yenu, ngefyo twamikonkomeshe. ¹² Pakuti mwingenda bwino kubakunse nokukanaba mukubulwa. ¹³ Tatukofwaya imwe ukuba abatutu, ba wesu, palin abo abalala utulo, pakuti mwilalilishika nga bonse, abashakwate subilo. ¹⁴ Pantu nga twatetekela ukuti Yesu alifwile no kubuka kabili, ifyofine Lesa akaleta Yesu abo abalala utulo muli o. ¹⁵ Pantu ici tukolanda kuli mwe ukupitila mucebo cakwa Shikulu, ukuti ifwe fwebali no mweo, abashelepo pakwisa kwakwa Shikulu, tatwakacilile abo abalala utulo. ¹⁶ Pantu Shikulu umwine akekila ukufuma ku mulu . Akesa no kupunda, ne shiwi lyakwa malaika mukalamba, kabili ne ntandala yakwa Lesa, Kabili abafwa muli Kristu bakabalilapo ukubuka. ¹⁷ Elyo ifwe fwebali no mweo, abashele, pamo pene nabo tukasendwa mu makumbi mu ku kumanya Shikulu mu lwelele. Muli uyu musango tukaba lyonse na Shikulu. ¹⁸ Eico, talalikeni umo no munankwe naya mashiwi.