¹ Paulu waka balanga babeteshi amane wamba ati, "Bakwesu, ume ndapona u Leza mubukombi bubotu boonse kushika buzuba bwasunu." ² Mupaizhi mukando Ananiyasi wakalailila mbakuzhimine abo kwamba ba muume amulomo. ³ Amane Paulu wakamwambila ati, "Leza ulakuuma, uwe uli ukoya bwanda butuba buyo. Sa mwakala kwamba mumbeteke u mulawo, pele mwalailila kwamba ngumwe, chalo chitali mu mulawo." ⁴ Babo bakuzhimine ambali baamba ati, "Sa imbubo bobo mbutuka bapaizhi bakando ba Leza?" ⁵ Paulu wakaamba, "Nkintezhi, nubakwesu, kwamba mupaizhi mukando. Ukuti kulilembelwe ati, Twelele kwamba bubiyabi amusololi wabantu bako.''' ⁶ Paulu nakabona kwamba chipanzha chimwi cha babeteshi kabali ba saduki chimwi kabali ba falisi, wakamba izwi ikando munkuta, "Nubakwesu, ume ndi mufalisi, mwanabo ba falisi. Nkaambo kakuti ndikwete bulangizhi bwa kubuka kwa bafu nchichapa kwamba mbetekwe." ⁷ Chiindi nakaamba bobo, kuzumanikana kwakatalika akati ka ba falisi uba saduki, amane inkamu yakaandana. ⁸ Ukuti ba saduki balamba kwiina kubuka, kwiina bangelo, alimwi kwiina myoza, pele ba falisi shoonse sheshi balashoma . ⁹ Inzho kwakaba choongo chinji chinji, bamwi balembi bakubalilwa ku nkamu yaba falisi bakazhimuka ukutalika kuzumanana, balaamba, "Kwiina bubiyabi mbutwayana wezu mulombwana. Nokuti moza na mungelo wamwaambila?. ¹⁰ Nikwakaba kuzumanikana kukando, mukando wa bashilikani wakatiya kwamba Paulu balaba niba muzapaula mushipanzha, ubobo wakatuma bashilikani kumubweza amenso abo babeteshi, ukumuleta nkubakukala. ¹¹ Bushiku bwakachilila Mwami wakazhima kumbali kwakwe ukumwambila ati, "Zuma, ukuti mbubona mbuwapa bumboni bwangu mu Jelusalema, ulyelele ukape umu Loma." ¹² Nibwakacha ba Juda bapanga inkamu ukushomezha kwamba kwiina nibakalya nikuba kunwa kufumbwa kushikila chiindi Paulu bamuyaye. ¹³ Balombwana bakabamba inkamu yezhi kabashika ku makumi one. ¹⁴ Bakaya ku bapaizhi bakando uku basololi ukwamba ati, "Twabamba chishomezho kutalya chita Paulu tumuyaye. ¹⁵ Inzho, ubobo inkuta itume ku mukando wa bashika lumamba kwamba aletwe kono, ukoya mulanda kulanganya mulandu wakwe kabotu. Uswe tulilibambile kumuyaya katana kushika kono. ¹⁶ Pele mwiwa wakwe Paulu wakatelela kwamba balimuzubilile, ubobo wakaya ku bashikalumamba kwakubele Paulu wamwambila. ¹⁷ Paulu wakompolola umwi wa bashikalumamba wamwambila ati, "Mutole wezu mwembezhi kumukando wa bashikalumamba ukuti ulkwete nchaznda kuhobela kwakwe." ¹⁸ Inzho shikalumamba wakamubweza mwembezhi wamuleta ku mukando wa bashikalumamba amane wamwambila ati, "Paulu mwaange wan'gompolola amana wan'gambila, kwamba mulete wezu mwembezhi kwako .Ulikwete cha kwaamba kwako.'' ¹⁹ Mukando wakamukwata kwitashi mwembezhi wamutola kwa bwiiche wamubuzha, "chiinzhi checho nchuzanda kwamba kwangu?" ²⁰ Mwembezhi wakamba ati, "Ba Juda bavumizhanya kwamba bakulombe kwamba ukamulete Paulu zona ku babeteshi, kwamba ukoya balaanda kubuzha alimwi kabotu chikwatikizha mulandu wakwe. ²¹ Pele utabavuminina, nkaambo kuli balombwana bataleli ku makumi one ku mweelwe bazubile kumulindlila. Bashomezha kutalya nikuba kunwa kushikila bamuyaye. Ucheno chiindi balilibambile, balalindila kuvumizha kuvwa kwako." ²² Inzho amane mukando waba shikalumamba wakamuleka mwembezhi waya, nakamana kumulailila ati, "Utambila naba womwi ati aza makani wa amba kwamgu." ²³ Amane wakabambila bashikalumamba bobile ati, Amubweze bashikalumamba bashika ku myaanda yobile balibambile kuya kushika kubusena bwa Kayisa, ubashikwenzha mahosi bali makumi chiloba, alimwi ubashimasumobali myaanda yobile. Mulazhimuka kuya chiindi cha iwoola lya tatu lya mashiku." ²⁴ Alimwi wakalailila kwamba batolelele banyama mbati akalize Paulu ukumweenzha kabotu kumutola kwa Felikisi muleli, ²⁵ Amane waka lulemba lukalata bolya: ²⁶ Kulodiyasi lisiyasi welele kepewa bulemu muleli Felikisi, ndakwaanzha, ²⁷ Wezu mulombwana wakakwatwa uba Juda alimwi kabazanda kumuyaya nindakashika kwabo ubashikalumamba ukumuvuna, nindakazhiba ati muna Loma. ²⁸ Ndakuzanda kuzhiba nchiba mupela mulandu, inzho ndakamutola kukabunga ka babeteshi. ²⁹ Ndakaiya kwamba ati kaba mupa mulandu kumakani a mibuzho ku milawo yabo, pele kuli chechi kakwina mulandu ukonzha kumuyazha nikuba kwaangwa. ³⁰ Kumane kwakeza makani kwangu ati kuli makanze aku muyaya wezu mulombwana. Ubobo ndilyona awa ndamutuma kwako ukulailila bashi kumupa mulandu abo kwamba balete milandu njiba mupa ku menso ako. Ndalazha." ³¹ Ubobo bashikalumamba bakaachilila malailile abo. Bakamubweza Paulu amane bamuleta mashiku ku Antipatris. ³² Buzuba bwakachilila, bunji bwa bashikalumamba bakashiya bashikwenzha ma hosi kwamba baye aze balo bakabwela nkuba kukala. ³³ Lelyo bashikwenzha ma hosi nibakashika kubusena bwa Kayisa balutola lun'gwalo ku muleli, bakamuleta Paulu ku menso akwe. ³⁴ Chiindi muleli nakabala lun'gwalo, wakabuzha busena Paulu nkwa vwa. Nakatelela ati ulavwa ku Cilicia, ³⁵ wakaamba ati, "Ndatelela shoonse shako bashika babo bakupa mulandu kono." Kumana wakalailila kwamba abikwe mubusena bukando bwa mfulumende ya Heloda.