¹ भाईचारा-प्रेम बनो रहाबए । ² अपरिचितनके अथिति-सत्कार करन् मत भुलिओ, काहेकी पता न पाएके कित्तो जनी स्वर्गदुतनके अतिथि सत्कार करि रहँए। ³ तुम अपनए फिर बिनके संग कैदमे पडे हानि सम्झना करओ। जौन बिनके अत्याचार करीं तुम फिर बिनके शरीरमे भय जैसे बिनको सम्झना करओ। ⁴ सबय बिहाके आदर करएँ। वैवाहिक सम्बन्ध न गडबडबओ , काहेकी यौन दुराचारी आदमीके और व्यभिचारीनके परमेश्‍वर न्याय करैगो। ⁵ तुमर चालचलनके रुपियाँपैसाको लालचसे अलग करिओ। तुमरसंग भव चीजनमे सन्तुष्ट हुइयो। काहेकि परमेश्‍वर अपनय आइसो कहिहए, “मए तुमके कबहु न छोडंगो, नत मए तुमके त्यागंगो ।" ⁶ हम सन्तुष्ट होमयँ। जहेमारे, हम साहससंग कहे सकत हयँ, “परमप्रभु मिर सहायक हए, मए न डरामंगो। आदमी मोके का कर सकत हयँ ? ⁷ तुमके परमेश्‍वरको वचन सुनानबारे तुमर अगुवानके विचार करओ, और बिनको रहनसहनको अन्तके ध्यान देओ, और बिनको विश्‍वासको देखासिखी करओ । ⁸ येशू ख्रीष्ट कल, आज और सदामान एक हानी हए। ⁹ गजम किसिमको और अचम्मो शिक्षा तुमके दुर न लैजाबय। पर खानपिन सम्बन्धित बिधिसे जिनबारेनके जा कुछ सहायता न करत हय, काहेकि अनुग्रहसे बनो भव हृदय अच्छो होतहए। ¹⁰ हमरसंग एक वेदी हए, जौनसे पवित्रस्थानमे सेवा करन बारेनके खान अधिकार न हय। ¹¹ काहेकि पाप क्षमाके ताहिं प्रधानपुजारीद्वारा जनावरनको खून पवित्रस्थानमे लओ जात रहए। पर बिनको शरीर छाउनीसे बाहिर जलावजात रहए। ¹² जहेमारे, येशू फिर अपन खूनसे आदमीनके पवित्र करनके ताहीं सहेरको फाटक बाहिर कष्ट भोगी । ¹³ जहेमारे, हम फिर बाकेसंग छाउनी बाहिर जामएँ, और बाको सहो भव निन्दामे सहाभागी होमएँ । ¹⁴ काहेकी हमरसंग हियाँ कोई स्थायी सहेर न हय। पर, हम आनबारो सहेरको हम प्रतिक्षामे हयँ। ¹⁵ जहेमारे, येशूद्वारा परमेश्‍वरके महिमा देन हम सदा बलिदान चढामयँ,। बाको नाउँके अंगीकार करके महिमा देन हमर ओठको फल हए । ¹⁶ और हम एक दुसरेके भलाइ करन और सहायता करन न भुलयँ। काहेकि अइसीय बलिदानसे परमेश्‍वर बहुत खुशी होत हए । ¹⁷ तुमर अगुवानके अधीनमे बैठओ और आज्ञापालन करओ, काहेकी जौनके हिसाब देन पणैगो करके बे तुमर आत्माको रेखदेख करत हयँ। जा काम तुमर अगुआ आनन्दसंग तुमर वास्ता करएँ। दु:ख न मानके, नत बासे तुमके कोइ फाइदा न हुइहए। ¹⁸ हमरे ताहिं प्रार्थना करओ, काहेकि हममे सफा विवेक हय कहिके पक्का हुन सिकयँ और और सब बातमे ठिक किसिमसे जीन सकयँ। ¹⁹ और जद्धा काम करओ कहिके मय तुमके उत्साह देत हओं। जहेमारे, मए तुमरे ठिन जल्दी लौटके आमङ्गो। ²⁰ अब भेडाको महान गयाँरो हमर प्रभु येशूको अनन्त करारको खुनद्वारा मृत्युसे जीवनमे लानबारो शान्तिको परमेश्‍वर । ²¹ बाको इच्छा पुरा करन तुम हरेकके सुसज्जित करय।येशू ख्रीष्टद्वारा परमेश्‍वरके देखाइमे जा बात मन पणडनबारो हय बहे करओ। बाको महिमा सदा होत रहाबए। आमेन। ²² अब भैयओ, मए तुमके उत्साह देत हओं, कि जे उत्साहके वचनके पालन करओ, जौन मय तुमके छुटकरीमे लिखो हौं । ²³ तुमके जा पता होबय, कि हमर भैया तिमोथी स्वतन्त्र हुइ गओ हय। यदि बा जल्दी अबैगो तव, मए बाके संगमे तुमके भेटन अमंगो। ²⁴ तुम सब विश्‍वासिनके और अगुवानके अभिवादन करओ। इटालियाबारे तुमके अभिवादन पठाई हएँ । ²⁵ तुमर सबके संग परमेश्‍वरको अनुग्रह रहाबए।