¹ E houbo fame na terra, amais daquela primeira fame que acontecera nos días de Abraham, e foi Isaac a Guerar, onda Abimelec, rei dos filisteos. ² E aperecéuselle Iahveh e dixo: non baixes a Exipto; queda na terra que Eu che direi. ³ Habita nesta terra e Eu serei contigo e te hei bendicir; porque a ti e a túa descendencia darei todas estas terras, e confirmarei o xuramento que xurei a Abraham, o teu pai. ⁴ Eu multiplicarei a túa descendencia coma as estrelas do ceo e darei aos teus descendentes todas estas terras; e todas as nacións da terra serán benditas. ⁵ Eu farei isto porque Abraham obedeceu a miña voz e gardou os meus mandamentos, os meus estatutos e as miñas leis. ⁶ Habitou pois Isaac en Guerar. ⁷ E ao preguntarlle os homes daquel lugar acerca da súa muller, el dixo: é a miña irmá; porque tiña medo de dicir: é a miña muller. Pensando: "Non vaia ser que me maten os homes do lugar por causa de Rebeca, pois é de fermosa aparencia". ⁸ E sucedeu que, despois de estar alí bastante tempo, Abimelec, rei dos filisteos, mirou por unha xanela, e velaquí, viu a Isaac acariñando a Rebeca, a súa muller. ⁹ Entón Abimelec chamou a Isaac e díxolle: velaquí certamente ela é a túa muller. Como foi que dixeches: “é a miña irmá?" E Isaac respondeulle: porque me dixen: "non vaia ser que eu morra por causa dela". ¹⁰ E Abimelec dixo: que é isto que nos fixeches? Tería sido ben doado que algún do pobo se deitase coa túa muller, e así terías traído culpa sobre nós! ¹¹ E Abimelec ordenou a todo o seu pobo, dicindo: o que lle poña a man a este home ou á súa muller, de certo morrerá. ¹² E sementou Isaac aquela terra, e a collleita aquel mesmo ano foi de cento por un porque Iahveh bendíxoo. ¹³ E o home enriqueceuse, e seguiu engrandecéndose ata que chegou a ser moi poderoso; ¹⁴ pois tiña rabaños de ovellas, mandas de vacas e moita servidume, e os filisteos tivéronlle envexa, ¹⁵ de xeito que todos os pozos que os servos do seu pai cavaran nos días de Abraham, seu pai, os filisteos cegáronos enchéndoos de terra. ¹⁶ Entón Abimelec dixo a Isaac: Vaite de aquí porque te fixeches moito máis poderoso que nós. ¹⁷ E Isaac foise de alí, e acampou no val de Guerar, e estableceuse alí. ¹⁸ E Isaac volveu cavar os pozos de auga que foran cavados nos días do seu pai Abraham, e que os filisteos cegaran despois da morte de Abraham, e púxolles os mesmos nomes que lles puxera o seu pai. ¹⁹ E os servos de Isaac cavaron no val atoparon alí un pozo de augas vivas. ²⁰ Pero rifaron os pastores de Guerar cos pastores de Isaac, dicindo: a auga é nosa. Por iso el chamou ao pozo Esek, porque eles discutiran con el. ²¹ Cavaron outro pozo, e tamén discutiron por el ; por iso chamouno Sitna ²² E trasladouse de alí e cavou outro pozo, e non rifaron por este; por iso chamouno Rehobot, porque dixo: Iahveh fixo lugar para nós, e habemos frutificar na terra. ²³ E de alí subiu a Beerseba, ²⁴ e aparecéuselle Iahveh aquela mesma noite, e díxolle: Eu son o Deus do teu pai Abraham; non temas porque eu estou contigo. Bendicireite, e multiplicarei a túa descendencia por mor de Abraham, o teu pai. ²⁵ Entón edificou alí un altar, e invocou o nome de Iahveh e montou alí a súa tenda e alí abriron os servos de Isaac un pozo. ²⁶ E Abimelec veu a el dende Guerar, co seu conselleiro Ahuzat e con Ficol, xefe do seu exército. ²⁷ E dixo Isaac: por que vindes a min, vós que me odiades e me botastes de entre vós? ²⁸ E eles responderon: vimos claramente que Iahveh está contigo, así que dixemos: "fagamos un xuramento entre nós, entre ti e nós, e estableceremos un pacto contigo, ²⁹ de que non nos farás ningún mal, así como nós non te tocamos e só che fixemos ben, e enviámoste en paz. Ti es agora o bendito de Iahveh. ³⁰ Entón el preparoulles un banquete, e comeron e beberon. ³¹ E erguéronse á maña cedo e fixéronse mutuo xuramento; entón Isaac despediunos e eles partiron do seu carón en paz. ³² E aconteceu que aquel mesmo día os servos de Isaac chegaron e informárono acerca do pozo que cavaran e dixéronlle: atopamos auga! ³³ E chamouno Seba; por iso o nome da cidade é Beerseba ata hoxe. ³⁴ Era Esaú de corenta anos cando casou con Iudit, filla de Beeri heteo, e con Basemat, filla de Elón heteo; ³⁵ e trouxéronlle moita amargura a Isaac e Rebeca.