¹ E visitou Iahveh a Sara tal como dixera, e fixo Iahveh con Sara tal como prometera. ² E concibiu Sara e deulle un fillo a Abraham na súa vellez no tempo que Deus dixera. ³ E Abraham chamou ao fillo que lle naceu, o cal lle deu Sara, Isaac. ⁴ E circuncidou Abraham a seu fillo Isaac aos oito días como Deus lle mandara. ⁵ E era Abraham de cen anos cando lle naceu o seu fillo Isaac. ⁶ E comentou Sara: Deus fíxome rir, quen o escoite, rirá comigo. ⁷ E engadiu: Quen lle tería dito a Abraham que Sara habería de aleitar fillos?, pois ben que lle dei un fillo na súa vellez. ⁸ E medrou o cativo e foi desleitado. Entón Abraham fixo un gran banquete no día que Isaac foi desleitado. ⁹ Pero viu Sara que o fillo de Agar a exipcia, o cal lle dera a Abraham, burlábase. ¹⁰ E díxolle a Abraham: Bota a esta escrava e o seu fillo, pois o fillo da escrava non herdará xunto co meu fillo Isaac. ¹¹ E Abraham agoniouse moito por este tema por que non deixaba de ser o seu fillo. ¹² Mais Deus díxolle a Abraham: Non te agoníes polo rapaz nin pola túa serva. faille caso a todo o que Sara che diga, porque en Isaac será chamada a túa descendencia. ¹³ E tamén farei do fillo desta escrava unha nación por ser descedente teu. ¹⁴ Ergueuse Abraham ben cedo pola mañá, colleu pan e un odre de auga, e deullo a Agar e ao rapaz, poñéndollo aos ombreiros e despediunos. E marchou ela, e andou errante polo deserto de Beerseba. ¹⁵ E ao acabar a auga do odre, ela puxo o rapaz debaixo duns arbustos. ¹⁶ E foise, e sentou non moi lonxe, coma a tiro de arco de distancia, porque dicía: "Que eu non o vexa morrer." E sentou enfronte e alzou a súa voz e chorou. ¹⁷ Pero Deus escoitou a voz do rapaz, e o anxo de Deus chamou a Agar dende o ceo e preguntoulle: "Que che pasa Agar? Non temas, porque Deus escoitou a voz do rapaz aí onde está. ¹⁸ Érguete, levanta o rapaz e cólleo da túa man, porque Eu vou facer del unha gran nación." ¹⁹ E Deus abriulle os ollos, e ela mirou un pozo de auga, e foi e encheu o odre de auga e deulle de beber ao rapaz. ²⁰ E Deus estaba co rapaz, que medrou vivindo no deserto e fíxose arqueiro. ²¹ E morou no deserto de Parán e a súa nai conseguiulle unha esposa procedente da terra de Exipto. ²² Aconteceu por aquel tempo que Abimelec xunto a Ficol, o xefe do seu exército, dirixíronse a Abraham, dicindo: "Deus Está contigo en todo o que fas, ²³ agora pois, xúrame aquí por Deus que non nos traizoarás, nin a min, nin os meus fillos nin a descendencia deles, polo contrario ao igual que eu me portei ben contigo ti portaraste así conmigo na terra onde habitas." ²⁴ E Abraham respondeulle:"Xúroo". ²⁵ Pero Abraham queixouse a Abimelec por mor dun pozo de auga do que os servos de Abimelec apropiáranse. ²⁶ E Abimelec díxolle: Eu non sei quen fixo iso, ademais nin ti me dixeras ren, nin escoitara nada ata hoxe. ²⁷ E Abraham tomou ovellas e vacas e deullos a Abimelec. E os dous fixeron un pacto. ²⁸ Entón Abraham apartou sete añas do rabaño. ²⁹ E Abimilec preguntoulle a Abraham: "Que son estas añas que puxeches aparte?" ³⁰ E el respondeu: "Tomarás estas setes añas da miña man como testemuña de que eu fun quen cavou este pozo." ³¹ E chamoulle entón a ese lugar Beerseba, porque alí fixeron un xuramento os dous. ³² Fixeron pois un pacto en Beerseba, e entón erguéronse Abimelec e FIcol, xefe do seu exército e regresaron a terra dos filisteos. ³³ E Abraham plantou unha tamargueira en Beerseba. Alí invocou o nome de Iahveh, o Deus eterno. ³⁴ E percorreu Abraham a terra dos filisteos por moitos días.