¹ Non quero, meus irmáns, que ignoredes que os nosos devanceiros estiveron baixo a nube, e todos pasaron polo mar; ² e en Moisés foron todos bautizados na nube e no mar; ³ e todos comeron o mesmo alimento espiritual; ⁴ e todos beberon a mesma bebida espiritual, porque bebían dunha roca espiritual que os seguía; e a roca era Cristo. ⁵ Pero non se agradou Deus da meirande parte deles, porque quedaron aniquilados no deserto. ⁶ Estas cousas aconteceron como exemplo para nós, para que non sexamos cobizosos do malo, como eles cobizaron. ⁷ Nin sexades idólatras, coma foron algúns deles, segundo está escrito: "Sentou o pobo a comer e a beber, e ergueuse a xogar". ⁸ Nin forniquemos, coma fornicaron algúns deles, e nun día pereceron vintetrés mil. ⁹ Nin tentemos o Señor, coma algús deles o tentaron, e foron mortos polas serpes. ¹⁰ Nin murmuredes, coma algúns deles murmuraron, e foron mortos polo destrutor. ¹¹ Acontecéronlles estas cousas como exemplo, e foron escritas para advertirnos a nosoutros, para quen chegou aos derradeiros días. ¹² De xeito que, o que cre que está firme, mire non caer. ¹³ Non vos sobreveu ningunha proba que non sexa humana; e fiel é Deus, que non ha permitir que sexades probados por riba do que podedes; senón que xuntamente coa proba, dará a saída, para que poidades soportar. ¹⁴ Polo tanto, meus amados, fuxide da idolatría. ¹⁵ Fálovos como a sabios, xulgade vós o que digo: ¹⁶ a copa de bendición que bendicimos, non é a participación no sangue de Cristo? O pan que partimos, non é a participación no corpo de Cristo? ¹⁷ Porque o pan é un, e nós sendo moitos, somos un corpo; porque todos participamos do único pan. ¹⁸ Mirade a Israel na carne, os que comen dos sacrificios, non son partícipes do altar? ¹⁹ Que vos estou a dicir? Que o sacrificado aos ídolos é algo, ou que un ídolo é algo? ²⁰ Pero dígovos que o que eles sacrifican, sacrifícano aos demos, non a Deus, e non quero que sexades partícipes cos demos. ²¹ Non podedes beber a copa de Deus e estar a beber a copa dos demos; non podedes participar da mesa do Señor e estar comendo da mesa dos demos. ²² Ou estades a provocar a celos ao Señor? Será que somos máis fortes ca el? ²³ Todo é lícito, pero non todo é de proveito. Todo é lícito, pero non todo edifica. ²⁴ Ninguén ande na procura do seu ben, senón o do outro. ²⁵ Comede de todo o que se vende na carnizaría, sen preguntar por mor da conciencia. ²⁶ Porque do Señor é a terra e todo o que hai nela. ²⁷ Se algún que non é crente, vos convida e queredes ir, comede de todo o que vos poña diante, sen preguntar nada por motivos de conciencia. ²⁸ Pero se nalgunha ocasión alguén vos di: "isto foi sacrificado aos ídolos", non o comades, porque volo dixeron, e por motivos de conciencia; ²⁹ por conciencia, refírome á do outro, non á vosa; pois, por que é xulgada a miña liberdade pola conciencia do outro? ³⁰ Se participo con agradecemento, por que han falar mal de min por algo do que estou dando grazas? ³¹ Daquela, sexa que comades ou bebades, ou calquera cousa que fagades, facede todo para a gloria de Deus. ³² Non sexades motivo de tropezo, nin a xudeus, nin a gregos, nin á igrexa de Deus; ³³ así como eu tamén en tódalas cousas agrado a todos, non procurando o meu propio beneficio, senón o de moitos, para que sexan salvos.