¹ Hompa Nebukadinasara aruwana shishwi sha lifano lya ngorodo sha kutika mu ghure metera ntano na mbiri ntani muna ghupati metera ntatu. Ghuye kwa dikilire lino lifano mulidamenena lya Dura mushirongo sha Babiloniya. ² Makura Hompa Nebukadinasara atumu mbudi ayite vantu navantje vaya ponge ngava karepo, ghuye ayita va pangeli, na marenga, na vaforomani, navayenditi veta, na vapanguli, na vatjangi veta, na varongi veta, na varuwani mumbara, na vakonentu, ntani kumwe na vatapi maghano vaHompa na vantu navantje vamushirongo vaya ponge vaya fumadeke lifano olyo adikire kwa Hompa wendi. ³ Makura marenga na vantu navantje ava yapongo vakarepo vaya fumadeke lifano olyo atulirepo Hompa Nebukadinasasra. Navantje ava yimana kumeho ya lifano. ⁴ Makura ogho vapire shiruwana shaku tapa muragho atantere mbunga ashi, "Vantu navantje, dimuhoko nadintje ntani marudi naghantje, ⁵ opo muyuvha marumbendo na vikitara, na ngoma, na vipembito, namusika, garama, na ntjumo na maywi ghaku kushuva-shuva, namuvantje muna hepa kutongamena ngoro muraperere ku shishwi sha lifano lya ngorodo oli dika Hompa Nebukadinesara. ⁶ Kehe uno ashweno kutwa ngoro apire kutongamena ku lifano, ndje tupu kuvhukumina, mulidiko lya kutwera mundiro wa kupirakuveva lya ghupyu unene." ⁷ Makura mbunga oyo yapongiro opo vayuvire marumbendo, na ndjumo, na vipembito, na ngoma, ntani na maywi ghakuku shuva-shuva, mbunga ya vantu vakuku shuva-shuva, dimuhoko daku kushuva-shuva ntani na vantu vamaraka ghaku kushuva-shuva ava tungoro vatongamene lifano lya ngorodo olyo atulirepo Hompa Nebukadisara. ⁸ Vantu vamwe vamu Babiloniya ava rundiri va Juda ava yendi kwa Hompa vaka va rapote. ⁹ Vavo ava tantere Hompa Nebukadisara ashi, "Hompa, ndi ngaghu kare namonyo naruntje na naruntje! ¹⁰ Ove, Hompa, wa turopo veta ashi vantu navantje opo ngayuvha marumbendo, na ntjumo, na ngoma, ntani na maywi ghaku kushuva-shuva, vakona kutwa ngoro vatongamene ku lifano lya ngorodo. ¹¹ Kehe ghuno nga piro kutongamena ngoro na ku kanderere shishwi sha lifano ndje tupu kuvhukumina mulidiko lya mundiro lya ghupyu unene. ¹² Mpovali varume va vaJuda ovo wa tura mushiruwana shaghupititi mudi mukunda damu shirongo sha Babiloniya; madina ghavo ne Shadraki, na Mishaki, ntani na Abetenego. Vano varume, Hompa, vyoye kapi vavi pakeranga mbili ndi vavitikitemo. Vavo kapi vakandereranga kuva Karunga voye ndipo kapi vatongamenanga kushishwi sha lifano oli waturapo. ¹³ Hompa Nebukadinasara opo ayuvire vino, agarapa unene, makura atumu vaka vita vendi vaka yite Shadraki, na Mishaki, ntani na Abetenego ku kwendi. Makura ava kava yita kumeho ya Hompa. ¹⁴ Hompa Nebukadinasara ava pura ashi, "Vya ushili ove Shadraki, na Mishaki, ntani nove Abetenago mwa limburura ntani mwa shwena, kuraperera ku vaKarunga vande ntani mwa limburura kutwa ngoro mutongamene shishwi sha lifano oli nadika ndi? ¹⁵ Kuwapayikenu kuna kumupako shirugho sha uviri - opo muyuvha marumbendo, na ntjumo, na ngoma, ntani na maywi ghaku kushuva-shuva - muna hepa kutongamena pa ngoro muraperere ku lifano oli naturapo, nkene kumuruwana vino ndi nawa tupu. Nkene kapi mutongamena ngoro mukanderere ku lifano, kuna kumu vhukumina mulidiko lya mundiro lya ghupyu unene. Kwato Karunga ogho ngavhuro kumupopera ku nkondo dande?" ¹⁶ Shadraki, na Mishaki ntani na Abetenego ava limburura ashi, "Hompa Nebukadinasara, atwe na kuvhura shi kukupopera naghumwetu kwa uno udito. ¹⁷ Ano ngoli, Karunga oghu twa rapereranga kuvhura kutu popera mulidiko lya kutwera mundiro lya ghupyu unene, ntani ghuye kuvhura kutuyoghora tutunde mumaghoko ghoye, ove Hompa. ¹⁸ Ano ngoli nampili kapi ngatupopera ku nkondo doye, Hompa, ovino viyive tupu ashi atwe kapi ngatu raperera kuva Karunga voye, ntani kapi ngatu tongamena ngoro turaperere ku lifano lya ngorodo oli wa ruwana." ¹⁹ Hompa Nebukadinasara agarapa unene, shipara shendi ashi kutjindji kwa Shadraki, na Mishaki ntani na Abetenego. Ghuye atantere vantu vendi varundurure mundiro wa lidiko valipyapyareke unene rukando rutano na ruviri. ²⁰ Makura atantere vakavita vendi vankondo unene vamange Shadraki, na Mishaki, ntani na Abetenago makura vava vhukumine mulidiko lya mumundiro wa kutwera unene. ²¹ Makura ava vamanga vavo kuna dwata vyuma, na vikoverero, na marwakani, na maruvya ntani na vidwata vya ku kushuva-shuva, makura ava vavhukumini mulidiko lya ku twera mundiro lya ghupyu unene. ²² Mukonda shi Hompa kwa garapire unene makura atapa veta ya yidito unene makura ava tura mundiro wa unene mulidiko liyenye unene, makura mundiro aghu dipaya vakavita ovo vakwatiro Shadraki, na Mishaki, ntani na Abetenago. ²³ Vano vakafumu vatatu, va Shadraki, Mishaki, ntani na Abetenago, ava vavhukumini va were mulidiko lya mundiro lya ghupyu unene vavo kuna va manga. ²⁴ Makura Nebukadinasara aghumutundu, atukuka, ntani atetuka makura ashapuka wangu-wangu ayimane. Apura marenga ghendi ashi, "Nane kapishi varume vane tuna vhukumini mumundiro vavo kuna vamanga?" Vavo ava limburura Hompa ashi, "Mughuhunga, Hompa." ²⁵ Ghuye ava tantere ashi, "Ame kuna kumona varume va ne kuna kuyendaura mumundiro vavo kapi vana vamanga, ntani vavo kapi vana kuyuvha kukora. Oghuno wa une kuna kutema unene yira mona Karunga!" ²⁶ Makura Nebukadinasara ayendi akayimane pepi na livero makura ayiyiri ashi, " Shadraki, na Mishaki, ntani Abetenago, vakareli vaKarunga wa ku wiru-wiru, rupukenu mo! Yenu kuno!" Makura Shadraki, na Mishaki, ntani na Abetenago ava rupuka vatunde mumundiro. ²⁷ Vahompa navantje, na vapangeli na vantje, na vakrurona vavakavita, na marenga ghava Hompa vakuku shuva-shuva ava ponga vamone vano varume vatatu omo vana kutundamo. Marutu ghavo kapi ghapire mumundiro; huki davo da mumutwe kapi davavukire kumundiro; vyuma vyavo kapi vya pire kumundiro ntani lidumba lya mundiro kapi lya kundamine pamarutu ghavo. ²⁸ Hompa Nabukadinasara aghamba ashi, "Natuvantje tushambererenu tufumadeke tupande Karunga wa shadraki, na Mishaki, ntani na Abetenago, ogho ana tumo mu Engeli wendi apopere na kuparura vakareli vendi ovo vamuhuguvaro, vavo kwa shwena kulimburuka veta ya Hompa, ntani vashwena kutongamena vaKarunga vapeke, mbyo vakutapa nampili kudjonaura tupu monyo davo, vavo kwa tokora kukarera Karunga wavo ti ahuru. ²⁹ Ame kuna kutapa muragho ashi, kehe yino mbunga, ndi rudi, ndi liraka lya vantu lya kupira kufumadeka Karunga wa Shadraki, na Mishaki, ntani Abetenago vakona kuva dipaya naku vatetaura, ntani ndjugho avo vakona kudi mbandaura dikare ndambo ya hando mukondashi kwato Karunga wa kuvhura kupopera na kuyoghora vantu yira ndjeghuno." ³⁰ Makura Hompa atura Shadraki, na Mishaki, ntani na Abetenago mulipangero mudi mukunda damu Babiloniya.