¹ B aat man k yin yan kpanŋi k dont kaagbennu yennu; k yiikin palmann wujikni k tul t yonmdaanɔ nba waki nan tanpiuk na. ² T suan man u tuunn ni k yin yan mani k dontua u yudant ni. ³ K maan kaagbennu yennu tie yenjaane, k tie kpanbal gbenŋ! k tie yenni nba be kul canba. ⁴ Ŋua e diu tingbonŋ; k juant n kul tie u yal. ⁵ Mɔkgbenŋa na kul u yale; k tingbonŋ tie u nuu yaann maani. ⁶ Baat man k tingbaan naami daanua yennu tuan k jintua nan sikinin mɔnŋ binbenŋ. ⁷ K maan ŋua e tie yennu k t tie niibinba k u kpaalt, danminba ku ŋmaktilt, li sua kifit dia u senni Tigbiinn wa piak t linba. ⁸ I daa nyali tuba nan iyaajanm nba din nyal b tuba yuo nba k b din be Meliba tin kuɔŋ paak na. ⁹ Lenŋe kii yaajanm din binkin min yennu; nan baa lek din la maa din tulinba k tulb. ¹⁰ N wutuol din duo b paak binapiina k n yet a niib n mantik tien tubkangbata danma, b yet bin sak n seni wa. ¹¹ N wutuol din duo k n yetba i kan ban kua n tipuan kak na-ninŋ.