¹ Sɔb, ii cinŋ n mbonaa, caant a tublik, gbat n maanm. ² Gotl, n yaat n mob a, n jelinn jekle nan maan paku n nuak ni. ³ N piak nan n manuake, n mob, piak mamonme: ⁴ Yennu siekii namin, k tuluin manfuol. ⁵ Bobint a mɔnŋ, k jiinnin maan, lii tie k a luon fin kɔn a mɔnŋ paak. ⁶ Yennu buol n tie a ninnanŋo, b jii tante k nan min nan fin na; ⁷ L paak n bontitiet kan fit k ŋmataa yan, k n bia kan fit mabaa. ⁸ Ŋaan a paak n tubaaninŋ, k n gbat yet a: ⁹ N k tun biil, n k tun biil siali, n k tun kpiat, maa malaa, biit k be n ni. ¹⁰ Ŋaan k yennu laat n ni linba k u saa jii k guun na nin, k t paak k u sii namin, k dian nan n tie u dataak na; ¹¹ K u bobin jalit n taa ni, k goliin n taal kul wokitlnba tie. ¹² N saa jienna nan a k mɔk mɔnni, k maan yennu mɔk panŋ k gal Nifosaalik kul. ¹³ A luon k fin nan wua ii nɔiimoniɔk nan liibe, a u k ban wa tuon linba a? ¹⁴ Yennu ii saa pak u maan, u mɔk waa piak lebtil bianŋ nba e, ŋaan niib k jiet tuonn nan tuonn. ¹⁵ Yennu piak yoo nba k nua tuu dual u duanu ni, k guaan n suolɔ nae, k u piak nan nɔ, yelintu ni, nan damiit ni. ¹⁶ U tuu wann linba saa baalibe, k wan l nyinaa nba saa baal tie, ¹⁷ K fit te k nua n lebt k nyi bonbiil ni, k tan da kua japaat ni; ¹⁸ K fit te k u nalinŋ n tan daa kua muu ni k laat falaa nba be lenŋ. ¹⁹ Nifosaalok fit laat ceklii yenn yoo u faldinnu ninŋ e, k lie yialu e, k l pukii u gbanu n jek. ²⁰ L yoo u ji k nian jiet, u jikpanŋint mɔnŋ u ji k luon dinuu. ²¹ U gbannu tu juak e, k kpabaa ji yiek. ²² U nalinŋ ji tu k fɔk nan muu buok, k u j malii kuunpo. ²³ Ŋaan yennu malaka i baal u buol k sa sonmɔ, binba tien nan tut la na ni yennɔ, binba tuu want nua wa saa tɔkin bianŋ nba ki fo na, ²⁴ Malakaa manŋ n yeta a yennu tina ninbaɔka: Nyikin cabɔ, k wun da saa muu buotuk ni! ²⁵ K u gbanu n ji maak k gal nan wa daan tu tie bik na, nan u nasint ni na. ²⁶ Li ji saa mial yennu, k yennu sa gaal u mialuu, k ŋaan wu laununŋ nan palmann, k bia tuun ŋanmɔ fanu. ²⁷ K u sa yin yannii ni wol ni k yet a: N tun biita, n biil yennu sennii wa, ŋaan k u k dat n tubil nan ma bo janŋ nan tubd a tuu bianŋ nba na. ²⁸ Yennu nyinn n nalinŋ kuon muu diuk ni ŋaa, k n la manfuol, k ji nyi la yinyiem ! ²⁹ Gotl linba k yennu tun k tien nifosaalik ii na, u saa tun taa fuonu munle, n na ii ka taal fuonu muntaa paak, ³⁰ K fit nyin u nalin muu buok ni, k saan kuanɔ fuotib buol yinyiem ni. ³¹ Sɔb, ŋminin, ŋaan caan a tubaa soon na, k n pak maan! ³² Aii mɔk sial k ya fin pak, pakin k jiennin! ŋanni ka n bo luon k n tulaa mɔnniie. ³³ Aii kii mɔk linba k a sa pak tulin, ka ŋmin, ŋaan cenŋin! k n saa tuntaa yanfoom.