¹ L puol po k sɔb yaat u mɔb k biil daal nba k b din malɔ na po. ² U din gaal maan k yet a: ³ T k daal nba kin din mal na te mɔtont n paak, k te mɔtont-i be nyiɔk nba k b din suol n puol na paak . ⁴ L daal n lebt ki tie bunbɔnn k yennu daa mɔk sial yaa dudukit sampaapo, k yinyiem n daa yentl k piin yennu. ⁵ A te l daal i tie bunbɔnn k dɔkin nan sampagbonŋ na k piin yennu. ⁶ K nyiɔk mɔnŋ n nyii k kua bunbɔnn ni l binn, k ji daa te k b kaan l daal ŋmaali ni. ⁷ Te k lii tie nyɔyann k daa be pamann ni. ⁸ A te k binba sat mɔtont na n sat mɔtont daal mɔnŋ paak kl ma ŋamme mi nyun ni bonsusuok nba k b yiu lefiatann ne dianu. ⁹ T k sanyafaal ŋmaajal na daa yentil k bin guul yiyiem k baak, k la laat l nyiɔk sanyiɔk yentu. ¹⁰ Te mɔtont-i be nyiɔk mɔnŋ paak nan waa te k b malii u mi, k te k fala nan daamii na be be n paak. ¹¹ Be poe kin din k kpo n naa puol niŋanika kin din k kpo baa malin yuo nba na. ¹² Be tien kin naa din dian u taapaaki? K bia muantin u biimi ? ¹³ Li tie kin din b kpo, n bo sii duae suo n na, k ji foi. ¹⁴ K ji bo sii guant nan kpanbala nantinŋ paak saakab nba din ŋamm maa sienyuo ŋai na. ¹⁵ K ji bo sii guant nan tondamm nba tuu gbien b ŋei nan salimmɔna nan salinpiena na. ¹⁶ Ŋanuka n bo si guant nan bik nba k b tuu malɔ kpient na ku k la yinyiemm. ¹⁷ L buol k nitont na tuu nyik bituonbiit, k binba tuu bak na tuu tan la fuon. ¹⁸ L buole k dansalii laat fuon k foi nan tintantii. ¹⁹ L buol sua kul be ni la tie bik ŋanika sakua, k daaba ji k sikint b mɔnŋ sakab buol. ²⁰ Be ka te niib be ninbaatil ni ? Be ka te niib nba be palbiil ni na yinyiemi? ²¹ B guu kuume ŋaan k l baat, b mantik luon kuume k gal mɔkint kul. ²² Ŋme si be palpienni yuo nba ku la kakuuli. ²³ Yennu e ŋmat b tuann po binbenŋ k nyikit k b be mabil ni lokil kul po. ²⁴ N be mɔnii paak n jiet dinu ni, km wuyikini yat nan nyun ne. ²⁵ Linba kul kin tiin jaŋmaanii ŋanne baatin, k linba kul kin duuki tan tie balmɔnii. ²⁶ N kin laat fuon k bia k laat palmaasil, kin da daamii k mɔk g bennu.