¹ Fin nifosaalik bija jien bilikuu, k bil a nunŋ po, k nan seluusalem duol paak. ² A bilɔ k wui tienan duo maŋ b lekɔe nak biliku manŋ i tie nan duo na, k a maa binbintil k lii dien nan guon dauk na, k tan tuu duo na guonn yul paak, k caanb b datai kanŋ k lint, k caan dafɔkit nba gbenŋ k lint l kul po, k lii tie nan a fat duo manŋ nae. ³ K caan cangbɔnŋ , k lii tie nan guonn na k puan fin nan duo manŋ sinsiuk ni, k tol a nunŋ l po, k lii tie nan saan biil duo manŋ na e. K lii tie nyinnk wann Islaael buolu. ⁴ L puolpo, fin dual a nuu ganŋ po, k n saa paan Islaael niib biit a paak, ka saa dual lenŋ daa kobii ŋantaa nan da piinyia, k di falaa, k maan b tuonbiit paak. ⁵ N saa jii daal kul nba k a sa dual na, daal kuli tie biit nba k b tun binyenn ninŋ paake, k tie tub datu nba k b ba sa gaal. ⁶ Li tie k a gbenn l danaa, fin labit k daal a niidiitu po, k lii tie sudaa tieb tuon biit paak biak faldinu da piinna, k dayennkua sie binn yennkua paak, k si tie b tubdatu. ⁷ A ŋmant set yann k tol nunŋ nan nii kul seluusalempo, k kpak wannib b biilu po. ⁸ N saa jii ŋmii k lolaa, k l saa te k a kan fit labit yenn po n naii ka liel po, k tan tuu yoo nba k a saa gbenn danaa nba ka saa tien. ⁹ A jii paanu di yon, nan dimɔnii yon, nan tua yon, nan saajii yon k taan ŋmat k tien paanuu. ŋanne k a siidi daa kobii ŋantaa, nan daa piinyio nba k a sa dual a niiganŋ paak na. ¹⁰ A tuu saa di jiet waanminnae daal kul ni yom, k tan tuu daal gbennu. ¹¹ Nyun mun, a tuu saa nyu nyun, nan bik nyun-nyuntik munlee, daal nuak ninŋ. ¹² K a bia tuu saa jii nua binjin kuonaae k juo muu pul paanu na muu manŋ ni, k dil sianninba k sua kul saa la. ¹³ K yennu ŋam yet a: N nae k Islaael tieb mun tan sii di jiet nba mɔk jɔkint nan faa di linba na, yoo nba k n tan saa yatib bin saan be siaan nba na. ¹⁴ K n jiin a, Aaii, yabint yennu, gotil ma fiil a n nalinŋ k ban jɔkin, ma din tie bika nan mɔtaana n k ban k ŋman bɔnkobuk nba kpo, n nanii kaa k bonkobuk nba suol linba k kpiu nant. N bia k ban dii jiet nba ka yet a l kua. ¹⁵ Ŋanne k yennu ŋamm yet a: N ji saa tula naabin kuonaa e, k a tu jii k juo muu, k pul a paanuu, ŋaan nyik k ji daa jiik nua binjin kuonnaa. ¹⁶ K u ŋamm yet a: Nifosaalik bija n yaa min waan selusaalem tieb jiet tulue. Leŋ niib na sii be ninbaatil, k n numm sii mɔn nan bii bikint b jiet nba k b sii di nan nyun nba k b sii nyii nae wa k fit k k lin tuu janŋ. ¹⁷ B jiet nan nyun kul saa pɔtib, k b sii be palbiil ni, k tan kpo yiama, k maan bi tuonbiit paak.