¹ Laa yogunu n baa Juda leni Jelusalema yaaba, Yaaba n den ye ti yonbidi nni n lebidi ki kpeni. ² N baa taani i nilanbuoli kuli, ki jiini ba Josafati joaloangu nni. Lankani n baa bu leni i nilanbuoli yeni, Kelima ban tieni yaala n niba Isalele yaaba yeni. N baa bu leni i nilanbuoli yeni kelima bi yayadi n niba nibuotoe nni. ³ I nilanbuoli yeni toani n niba tiatia. Bi kuadi a bonjabila ki jiadi a poconcona, ki kuadi a bonpobila ki ñuni bi daama. ⁴ Yinba, Tili leni Sidoni dogu, Yinba Filisiti tinbuona yaaba, be yaapo yi lingi nni? Yi bua ki tuu nni li panli bii? Li ya tie yeni wani n baa teni yi tuada n jiidi yi yula po. ⁵ Yi taa n halijilifa leni n wula, min den pia ya halimano ke o tie n bonmoanla ki go hani yeni. Yi tugi la ki ban bili yi budiena nni. ⁶ Yi kuadi Juda leni Jelusalema diema yaaba Gileka nibuolu po. Yi tieni yeni kelima yi bua ki foagidi ba leni bi diema.A ⁷ Ama mini Li Miali Diedo, n baa ñani ba yin ban kuadi ba naani po. N baa guani yi biadima panpaani yi yula po. ⁸ N baa kua yi bijaba leni yi bisiaba Juda yaaba po, bimo n kuadiba Sabe yaaba po, ya nibuolu n ye hali foagima yeni. Mini Li Miali Diedo n yedi yeni. ⁹ Kpaani mani ki waani li naa bonla i nilanbuoli siiga: Bogini mani bu toabu po! Fundi mani a jakoanda! Bi toatieba kuli n fii ki cuo li cenli. ¹⁰ Taa mani yi naakuuna ki maa mu jugisiemu, yi moaciandi mo n tua kpama. Baa yua n tadi n ya nua o yuli ke o tie joakoando. ¹¹ Jaligi mani ki cua, yinba nilanbuoli n gaani ki lindi kuli n taani mani ku joaloanyengu nni. Fini, Li Miali Diedo mo, han soani a toatieba ban baa baa lankani. ¹² 'I nilanbuoli n fii ki cua Josafati Joalongu kani. Lankane ke n baa kadi ki jia ti buudi leni ya nilanbuoli n gaani ki lindi kuli. ¹³ Taa mani ku moaciegu ki cie kelima ku kpaangu beni. Cua mani ki hmaa ki midi yi nani duven tiidi bonluonkaala yaala n gbie duven tuodikaanu yeni. Ti tadiciandi mo gbie, i nilanbuoli yeni biadima yabi hali ki kandi. ¹⁴ Ya niba n baa cua ti buudi joaloangu nni yaba boncianla. Li Miali Diedo n baa doagidi o pabienli ya daali ku joaloangu yeni niiini nagini. ¹⁵ U yienu leni o hmaalo biigi, a hmabila mo ya yenma bodi. ¹⁶ Li Miali Diedo duni Siyono juali po, O ye hali Jelusalema ki kpaani. Tanpoli leni ki tinga den digibi. Ama Li Miali Diedo kubi o niba, O tie tie wuonkaanu Isalele yaaba po. ¹⁷ Lane yi baa bandi ke n tie Li Miali Diedo yi Tienu, Mini yua n ye Siyono, n joagagidikaali po. N baa gua ki diedi Jelusalema cain, bi nilanba kan go diedi li kani hali abada.' ¹⁸ Laa daali mi dapanma baa bundi a juana po. Mi nahanma baa puubi mu joabimu po. Mi ñima mo baa puubi Juda kpeni kuli nni. Li ñinbunli baa pudi Li Miali Diedo diegu nni. Ki ya joagini Sitimi joaloangu. ¹⁹ Ejipiti Diema niba baa bodi, Edomi Diema mo n tua ya fanpienma n biidi cain. Kelima laa diema kuli mabini Juda yaaba, ki ku ya niba n kaa pia tagili. ²⁰ Ama Juda leni Jelusalema baa ya pia bi niba ya yogu n tu ya yogunu. ²¹ N baa tuu ya panli ke n daa den tuu, ban den ku yaaba ke baa pia tagili po. Mini Li Miali Diedo mo n baa ya ye Siyono."