¹ Li Miali Diedo U Tienu den doagidi ki waani Amosi ya bonlekaala n tie na, diidi o den tagi i gbangbanli li moabunli n den cili ki fandi ya yogunu li den tie ban den ceni o bado po ke ya muadi n goa yuandi ki pudi ki fandi. ² Nani i gbangbanli yeni n den hmani ya moasoangidi n ye ki tinga kuli yeni. O den yedi o Diedo Li Miali Diedo: Tieni sugili. Jakoabo puolihuani baa tieni lede ki ya ye kelima bi tadi boncianla. ³ Li Miali Diedo den lebidi o yama laa bonla po. Li Miali Diedo den yedi: Laa bonla kan go tieni. ⁴ O Diedi, Li Miali Diedo den doagidi npo li naa bonlekaala. Diidi O Diedi Li Miali Diedo baa jia ti buudi leni mi fantama, mi fantama yeni baa bolini mi ñincianma ki go bolini li fuali. ⁵ N den yedi O Diedi Li Miali Diedi: Cedi ki da tieni laa bonla. Jokoaba puolihuali baa tieni lede ki ya ye? Kelima bi tadi boncianla. ⁶ Li Miali Diedo den lebidi o yama laa bonla po. ⁷ Li Miali Diedo den yedi: Laa bonla kan go tieni hali abada. Li Miali Diedo go den doagidi npo yaa bonlekaala n tie na. N den la ke O Diedo se u bilinu po ki tandi u baabu, o den kubi li bonbiigikaala o nuu nni. ⁸ Li Miadi Diedo den yedi nni, Amosi, a nua be ? N den goa ki yedi: n nua li bonbiigikaala a nuu nni. Li Miali Diedo den yedi nni: N baa biigi n nibuolu Isalele yaaba leni laa bonbiigikaale n kan go tieni bipo sugili bi tuonbiadi po. ⁹ N baa buoni I saaka puolihuani kaanciami. Isalele yaaba kaangagidihami baa bodi.N baa fii ki koani leni Jeloboami diegu leni ki jugisiega. ¹⁰ Lanwani Betela kopadiciamo Amatisia den yedi Isalele yaaba bado Jeloboami: Amosi fiindi apo mi yiema Isalele yaaba siiga. Mi diema yaaba kan fidi ki juuni laa maama kulipo. ¹¹ Kelima Amosi den yedi mine: Ku jugisiega baa bolini Jeloboami, ki gedini Isalele yaaba mo ya kaanu n foagi leni bi diema. ¹² amatisia den yedi Amosi:Li bonlekaala daano, a ca, seni ki guani a diema Jude po ki ya ban poa saawali lanpo ke bi puuni a a bonjekaala. ¹³ Ama han da go pua saawali Betela po, kelima Betela tie o bado kaangagidihamu yo. Li tie badidiegu yo. ¹⁴ Amosi den yedi Amatisia: Mii tie saawalipualo,mii didi tie saawalipuaba cagili yua mo. Ama n tie yankpaalo ki ko Sikomoli tikuanu. ¹⁵ Li Miali Diedo den ñani nni n yankulu puoli, ki den yedi nni: Gedi ki ban pua saawali n nibuolu Isalele yaaba po. ¹⁶ Moala han ceengi fini n yua n yedi ke min da pua saawali Isalele yaaba po,ki yedi ke min da maadi U Tienu n yedi yaala Isaaka puolihuani po. ¹⁷ Li tie lani yaa po ke Li Miali Diedo yedi mine: A pua baa tua poconconli u dogu nni, ki jugisiega baa bolini a bijaba leni a bisiaba. Bi baa biigi a kuani leni li bonbiigikaala ki boagidi, fini aba mo baa kpe nilandiema nne. Bi baa gedini Isalele yaaba ti yonbidi naani n foagi leni bi diema.