¹ Li nitaanli ń diidi ki sua ke Moyiisi waagi yeni li juali po jiidma, ke bi gedi ki la Haarɔn, ki yedi o, "Guani ki tagi ti po bulo, yua n baa ye ti liiga. Li ya tie Moyiisi po, ya ja n cedi ke ti ñani Ejipti diema nni, ki doni ne, tii bani yaali n tieni o." ² Ke Haarɔn jiini ba, "Tuudi mani i puoba wula tutuuda yeni i bisiaba yeni i bijaba wula tutuuda, ki taani ki cua yeni likuli na." ³ Li nitaanli kuli den tuudi btutuuda, ki taani ki teni Haarɔn. ⁴ Haarɔn den ga bi kani li wula tutuuda, ki dondi, ki tagi wula naatonbiga, ke li nitaanli yedi, "Israyeli, a tienu yua n cedi ke a ñani Ejipti diema nni, ki doni ki cua ne n yeni." ⁵ Haarɔn ń lan tieni maama, ke o maa li padbinbindli ki kpiani ki wula naabiga, ki sedi ki kpaandi, ki yedi; "Saala baa tie jaanma i O Diedo kpiagdi po." ⁶ Lan fiifaa, bi niba den yagdi ki fii ki bobni a padjuukaana, ki cua yeni mi taayema buama paabu. Lani n pendi, bi den kaliki dini, ki ñuni, ki fii ki kua mi jaancianma badu nni. ⁷ O Diedo den maadi yeni Moyiisi, "Guani ki lebdi tonma, kelima ŋan ñani ya buolu Ejipti diema nni , ke bi puodi yeni jɔgni bi yula ti tuonbiadi nni ⁸ Bi tuodi ki tudi min waani ba ya sanu. Bi tagi ki naatonbiga ki pugi ga, ki yidi ga salga. Bi maadi, "Isreyeli buolu, i tienu yua n ñani yi Ejipti diema nni ke i puodi n yeni." ⁹ Lanwani ii, O Diedo den yedi Moyiisi, "N la ya nibuolu ne, bi tie ya buolu n ki pia ŋmagdima i. ¹⁰ Mɔla wani ii, da bigni ŋan pani nni, ŋan ji ŋa nni min fiini n pabienli lan baa bipo. Lanwani ii, N ba bolni ba. Ama fini wani ii, N ba cedi ŋan tua nibuolciamu." ¹¹ Ke Moyiisi bigni ke wan baagi ki sɔngi O D Diedo o Tienu pali. O den yedi, "O Diedo, be n cedi ke a duondia pabienli a buolu po, ŋan ñani yaaba Ejipti diema nni yeni u paaciamu, ki cedi ke a nuu paalu po, ke bi puodi ki doni ne ? ¹² Be ya po i, ke Ejipti diema nni yaaba ji ba maadi, 'O den ñani ba ki bua wan waani ba falaciamo, ki kpa ba, ki bolni bi buolu ŋanduna nni i? Jiini a yama, ki duani a pabienli, ki lebdi a yama ki da bolini a buolu nani ŋan bi jagi maama yeni. ¹³ Ya tiani a tuonsɔnba Abrahama, Isaka yeni Israyeli po, ŋan den poli ki niani yaaba, ki maadi ba, 'N ba cedi i puolŋuani ń yabdi nani tanpoli ŋmabila yeni, N ba teni i puolŋuani min den den maadi ke N ba teni yi ya diema. Bi ba di lanya faali hali ya yogu n ki pia gbenma.'" ¹⁴ Lanwani ii, O Diedo den lebdi o yama, ki ŋa wan den jagi ke o ba pua o buolu yeni ya nufanu. ¹⁵ Moyiisi den lebdi ki jiidi li juali, ki muubi Yiko ñɔmaama tanpabliedmu o nuu nni. I diani den ye li tanpabliedmu faanunliedi po, mu nunŋanmu yeni mu nunbiimu po. ¹⁶ Mu tanpabmu den tie U Tienu n bobni yaamu, wani obá, i diani mo den tie wani U Tienu ń dieni yii obá mu tanpabmu yeni po. ¹⁷ Josuwe ń gbadi bi niba fuugu, nani ban den yigni yeni, ke o maadi Moyiisi, "N gbia bu tɔbu fuugu ku jongu nni." ¹⁸ Ama Moyiisi den yedi, "Li ki tie paatieba ya fuugu, li go ki tie ban paadi yaaba mo ya yigni, Mini ń gbia ya fuugu tie yani i." ¹⁹ Moyiisi ń nagi ku jongu kani, ke o la ki naatonbiga nannanli yeni bi niba ke bi jeli. Ke o pali biidi boncianla. Ke o luni wan den muubi ya tanpabmu o nuu nni ki mumudi mu li juañiali kani. ²⁰ O den taa li nitaanli ń den tagi ya wula naatonbiga, ki luni o mu nni ki juu ke ki buodi, ke o nandi bonyoma, ki yadi mi ñima nni, ki cedi ke li nitaanli ñuni ma. ²¹ Ke Moyiisi maadi Haarɔn, "Ya niba tieni a be i, ki cedi ke a tieni ya tuonbiadi ne bipo?" ²² Ke Haarɔn yedi, "Da fiindi a pabienli, n canbaa. A nan bani ya niba ne ń bobni maama ti tuonbiadi po. ²³ Bi den maadi nni, 'Tagi ti po ya bulo n baa ye ti liiga. Li ya tie Moyiisi po, yua n ñani ti Ejipti diema nni, tii bani yaali n tieni o.' ²⁴ Lanwani ii, n den guani ki jiini ba, 'Yua n pia wula kuli, wan taa, ki cua yeni li na,' Bi den teni nni wula ke n luni u mu nni, ke ki naatonbiga ne ñani u niinni. ²⁵ Moyiisi den diidi ki sua ke bi niba yula lebdi, Haarɔn den ŋa ke bi tudi u sanu, ki tieni yaali n tua sugciandi bi po bi yibalinba kani. ²⁶ Ke MOyiisi sedi ku jongu bulñɔbu kani, ki yedi, " Yua n taa O Diedo po, wan nagni n kani." Lefi cugli nni yaaba kuli den taani o kani, ki lindi o. ²⁷ O den yedi ba, "O Diedo, Israyeli Tienu yedi ya maama ne: 'Ja kuli ń bobni o jugsiega, ki lebdi cili ku jongu bulñɔbu, ki ban tuoni bulñɔtɔbu ki kpa o naataano, o dɔnli, o kuantalielo.'" ²⁸ Lefi cugli nni yaaba den tieni Moyiisi puogi ba yaali. Li daali, ya niba n den kpe den pundi niba tuda taa (3000) ²⁹ Moyiisi den maadi Lefi cugli nni yaaba, "I kua O Diedo tuonli nni dinne, kelima yuakuli kpaa o biga bii o naataano, lanwani ii, O Diedo ba puni yi o yedŋanma dinne." ³⁰ Lan fiifaa, ke Moyiisi maadi li nitaanli, "I tieni tuonbiciandi. Mɔlane, n ba guani ki do ki la O Diedo. Liki kandi n ba fidi ki mia sugli i tuonbiadi po. ³¹ Moyiisi den den guani ki lebdi O Diedo kani, ki maadi, "Hain! Li nitaanli naa tienni ti tuonbiaciandi ii, bi tagi bulo, ki tieni ga bi tienu. ³² Ama mɔla, n mia ŋa sugli ke ŋan di sugli bi biidi po. Ama a ya kan di bi po sugli ii, ŋan piini ŋan diani n yeli ya tili nni. ³³ O Diedo den maadi Moyiisi, "Ya nilo n tieni npo ti tuonbiadi, N ba piini o ya yeli n tili nni. ³⁴ Mɔla, ŋan guani ki lebdi, ŋan ciani li nitaanli min den maadi yi ya kaanu yeni. Diidi, N maleeki ba ga i liiga. Ama li pantuuli daali ya pundi, N ba tuu ba li panli kelima bi tuonbiadi po." ³⁵ Lani ń peendi ii, ke O Diedo luni u yianbiadpuodkou li nitaanli po, kelima ban tagi ya naatonbiga, ban den cedi ke Haarɔn tagi yaaga.