¹ Anyiafɛɛ k'ʋɖaʋ laŋ na Krito akʋɖa anyin alam. Galaŋ toŋo ma gɩshɛbɔ paa ma kɔɔ aɖʋ anyɩnalɔ gɩɖɔmpǝla nɩ na. ² Kiɖe ma, amʋ, pɔl, ntɩ lǝ anyɩn waa: ɩta na lee baŋ, gǝŋ ma Kristo kaa kɔɔ afɔɔshɩ anyɩn na. ³ Nfɔlɩ aciŋǝ, nlaa serɩya na shee basoroɩ ba na lee baŋ ma, waa ɖoole ashee pɩ waa: Ba kʋn gʋpɔ gʋŋunii. ⁴ Anyɩn ɩ na yɛɛ waa gʋpɔ gʋɖʋ anyɩn ɖeiɖei ma, anyin na Kristo ɩpaɖa. Kɩ kɔɔ ɖa gʋjɔɔ nɩ na. ⁵ ɩja nɖee gɩshee ma na, ŋŋuro nsoŋsono gɩtɩ saa, ɖeiɖei k'ʋkaŋtaŋna ma. ⁶ Kristo nɩ, ba lee kɩ baŋ, kǝ lee kɩ baŋ na ɩŋunii fɔɩ na ɩlee. Ama ɩja kʋ 'sheʋ na ʋsɔlʋ ɩlee kpakɩɩ. ⁷ ɩbʋŋa tɩ cu gɩshɛbɔ. Aŋa yɩɖe ka anyɩn waa ɩpaa kɔɔ anyene ɩja na. ⁸ Gɩnyiŋfɔnɔ giɖe ɩ na yɛɛ ɩ lee ma kɩɩ ɖoo na nɖee ayɩɖa anyɩn ma sul na. ⁹ Lefir cei ana pala boɖoboɖo kaŋmana fugo ¹⁰ Na nɖiyar ntɩ kantaŋ n'anyɩn waa kɩɩkɔɔ afaŋa gʋfaŋa gʋɖen afǝlǝ na ngʋɖe na. Arɛɩ ana lɩ n'anyɩn ma Gaja gatɩ ga bɔ agʋtɔ. ¹¹ Ambaja nta kɔɔ lee baŋ kawaasu, mʋlaŋ na nlee anaashika. Galaŋ anii, gʋyɔ kaŋkʋra kantala nɖee nna sikǝr arɛ ma balaa ŋjɩ. ¹² Ncɔɔtɩ yɛɛ waa: mbaɖe ba na li n'anyɩn ma, bʋ laa pɩ anyɩŋ gɩcɩɩ ca. ¹³ Galaŋ laŋ Gaja ga yɩɖa anyɩn pɩ waa. ɩɖa fɛɛ. Paa ma tɔɔ fɛɛ ɖe aɖa na lee gʋrɩlɔ kalesʋra na. Tɔɔ ma ʋsɔlʋ naa naa kaŋa na anyɩ mbawor gɩ ɖǝn ɖǝn. ¹⁴ Aɖʋwaa gʋpɔ gʋŋunii gʋ wala alee gaɖɔŋ kɔnɔ waa: "ɩsǝm asɔlɔ akʋwor ɖaa ʋsɔlɔ akʋʋlɔ ma." ¹⁵ Ama ɩ ta naa naashɛɛ anyɩŋbawor, na fǝɖǝ fǝɖǝ anyɩŋbawor, lee ma laakarɩ ɩ paa tɩ ɖur anyɩna lɔ na ¹⁶ Ntɩ lǝ waa: Sara ma ɖaa ŋŋuro nnayɛɛ ma naa ɩpaa tɩ lee gʋlɔ kalesʋra na. ¹⁷ Aɖʋwaa gʋlɔ kalesʋra ɩŋo ŋŋuro na ŋŋuro ŋɩŋo gʋlɔ kalesʋra. Baŋo bawor pɩ, gɩ ɖǝn ɖǝn. Galaŋ ngaɖee gaɖa ma na gǝŋ waa paa ma lee anyɩnʋcɩŋsɔlɔka na. ¹⁸ Ama ŋŋuro nta toŋo anyɩn gʋpɔ k'ʋkɔɔ wǝɖa ɩko anyɩnalaŋ na ¹⁹ Nyimǝ, gʋlɔ kalesʋra gɩ tɩ ŋǝɩ. ɩni nɩ gǝŋ fɔɩfɔɩ na gɩ sǝna kalesʋra, ajɩwa kalesʋra, basǝmprǝ bayɛɛka fɔɩfɔ. ²⁰ Akʋnapɛŋɛka, gɩ so, ʋwor kʋnaashɛɛ, ʋwor kʋjɩ ʋ gɩwʋlʋ, nciŋyoro, na yɛɛ aɖʋr ʋwar, na bɔ bɔ na bawor, ʋrɩpaɖʋ, ashiiri babɔnɔ. ²¹ Gɩnyɩnfɔnɔ, bʋkanshiʋ, ʋjiʋ hǝǝm, na lesʋraɖe ka gʋsʋra. Ntɩ ka ka anyɩn ɖaa ncee lǝ ma, mbaɖee ba na ɩee alesʋra ɖe ma kǝ ba ŋǝ Gaja kaayarɩtǝ katiibina. ²² Ama ŋŋuro kɩpi nɩ gǝŋ ʋsɔlʋ, ʋcinkǝrka, fɛɛ, suuru, bʋcǝma, ʋrǝma, ʋrɩsana, ʋcine, ²³ ʋsana, na gʋlɔ kʋtoŋu. Gʋpɔ gʋɖǝn kʋʋbǝla alesʋra ɖe na. ²⁴ Mbaɖee ba lee Yeesu Kristo a baja ma, ba kalbʋkɔɩ gʋlɔ gʋna na kalesʋra ɩbɔnɔ ɩŋunii. ²⁵ ɩtaji waa na ŋŋuro gɩɖa ka sara ma ŋŋuro kaasana. ²⁶ Gɩ paa wǝɖa fɔɩ kanɖawa, na taa atɩ bawor ba laakaarɩ na cel gʋcele na tɩbawor na.