¹ Pɔl Yeesu Kristi akənja ɖən na Gaja kʋʋsɔlɔ, Gaja kasamaa nɩ Efɛsɩn nɩ naa ba na Kɔŋ Yeesu n'ɩja ma. ² Gaja kʋkʋmʋ n'ʋɖaʋ fɛɛ ʋ ɖa anya laŋ n'ataya Yeesu Kristi aŋyiɖa. ³ Gaja kansala nɖa ashee atɩko yar Yeesu. Aɖʋwaa aɖʋ k'atʋ aləbarka, aŋunii buɖu mbuɖuu ba na lee Kristi ʋnyiŋu ma nɩ. ⁴ Gaja ga laa k'atʋ asul ɖoo ɖulunya kʋsəbʋ nɩ naa gɩ ɖa cɩrɩcɩrɩ a paa bəla n'atʋ akoɖən ɩnyine nɩ na. ⁵ Gaja ga cee atʋ pɩ bapur na Yeesu aŋyɩɖa, ɖaa alee naa atɩcɩno ɩkər ma. ⁶ Atʋkʋboŋu na gəŋ ʋsheeshu n'ʋkʋmʋ fɔ ashee arɛɛ a sɔlɔ nɩ ma. ⁷ Na Yeesu Kristi, gɩ wʋɖa ʋnyɩnca ʋsoŋsono laŋ kʋɖaʋ n'ʋtəɖu abɔnɔ nɖee ɩ fəl boŋo ma ashee 'amaana kaləbarka laŋ. ⁸ A yuga 'aləbarka ɖe atəbaŋunii laŋ na gʋŋafaŋa na ntɩyaashɩ. ⁹ Gaja pala n'ʋcɩnsɔlɔka gɩ yɔ bʋkɔɔ bʋ ɖa ŋkomo nɩ ma ɖaa ga sɔlɔ ma na alaa afaŋa na Kristi. ¹⁰ Kristi aleesʋra ɩ lee gakɔŋkɔŋɔ kaalei jɩ a wala ayɔkɔ nɖee ɩ na gatəna laŋ na nɖəla laŋ ma arɛ ɖɔŋkɔnɔ Kristi laŋ. ¹¹ Na Kristi, ba laa atʋ ɖaa tiibi baja ma. Gani ga cee lee n'arɛɩ nɖee a na lee aleu ɩŋʋnii na ʋnaʋ nɩ. ¹² Gaja ga tɔɔatʋ pɩ naa gɩ səla alee basəbaka ba shee Kristi ɩja ma gəŋ ma gɩ tɩ gɩ səra aŋə ʋshesheu. ¹³ Na Kristi, ɩ rəŋə ɩja kaalei ma, naa ɩ shee ŋŋuro nsoŋsono ɩja ma, anyɩnsala nɖa efanjil nɩ. ¹⁴ Ŋŋuro nsoŋsono, n lee tɔlʋma ashee atatiibi halɩ gɩ tɩ cam nɩ aŋunii na gajɩkʋmaka. ¹⁵ Na gani, n rəŋə ba lə anyʋcine kaalei n'ɩkoya Yeesu Kristi n'anyʋsɔlɔ ashee Gaja cɩrɩcɩrɩ kasamaa. ¹⁶ Kə ma pala ʋnyiŋu Gaja nsala nsheeka ashee na gəŋ cɩ gboo n na nyiŋə na shee anyɩn amɩnyiŋu nɩ. ¹⁷ N tɩ nyiŋə atɩko yar Yeesu Kristi agaja ga shee anyɩn gʋŋofaŋa naa apele anyɩn ʋyɔʋ. ¹⁸ N tɩ anyɩfolu kɩnyine ɩ kaɖa ŋkomo naa ɩ səra ayɔ ɩja nɖee nɩ a yɩɖa anyɩn ma na aɖaama katiibi Gaja kasamaa aŋunii nɩ. ¹⁹ Amɩnyiŋu nɩ, n tɩ taba ɩ yɔ ɩkashɩ k'ɩ wʋɖa ʋsəbʋ na naa gɩ shee ɩja ma, ashee kɩkashɩ ɩbʋmbɔnɔ nɖee a na lee n'alesra ma. ²⁰ N'ɩkashɩ ɖe nɩ, Gaja ga ŋənə na Kristi tam nɖee a ɖa bakono nɩ ma naa atɩ agʋnyɩsono laŋ Gaja laŋ kabuɖu. ²¹ A tɩ Kristi alən na aɖibaja baŋunii, ɩŋa n'ɩkashɩ n'ayɩɖa ɩŋunii ba tam ma. Kristi k'a jɩgɩyarɩ tam nɖe kanɖənɖən ama anyɔn na ɩtam bafɔlɩ nɩ. ²² Gaja ga ɖʋ ayɔkɔ ɩŋunii Kristi ɩkei nɩ naa ashee nɩ cɔɔcɩ ɖaa gɩŋa ma ayɔkɔ ɖe laŋ. ²³ Cɔɔcɩ a lee ka agʋlɔ naa rəŋǝ n'ayɔkɔ ɩŋunii.