ATCHAMADO_BEN-aug_act_text

Ǝta 26

¹ Agripa nú nə paulú bə̀: " woŋta xonú i hrɔn ɖə́kiwó yə ta." Í Paulú cɔ yə̀ bɔwó yi jí ì hrɔn ɖə́kia yə̀ ta: ² "Ɛfiɔ Agripa, ədo jíjɔ ŋ bə̀ ma hrɔn ɖəkinyə̀n tà ɛgba có ənyɔn cɔdə́ amə ŋuàn wó ɛgba; ³ vévétɔ́à; ɛwó ì nyi yudatɔwo kasétɔ kidə́ wó kɔnuwɔtɔgán yə́ i nan bə́ ŋ lə́ biɔ có ɛgbɔwo bə́ nan sə́ tiŋ nyɔwó nyɔngbí. ⁴ Yudatɔwó nyan sigbə́ ŋnɔn agbə́ mɔn có tiŋ ɖə́kə̀jə̀ mən lə̀ yerusalem kidə́ tiŋ dúmə. ⁵ Wó dési ŋ có gɔmə jə́jə́ i wó ɖó là nyan bə́ ŋ nɔn agbə́à sigbə́ Pharisitɔ ɛnən, habɔbɔ kə́ də̀və̀və̀ mian mawú sənsən. ⁶ Wó ka ɖokójó ŋ lɔ́là ɖobə̀ ŋ lə̀ ji ɛŋgbə́ kə́ Mawú dó nən mian dádáwó. ⁷ Ɛŋ gbə́dódó kə̀ ɛdú wuivə̀awo lə̀ nɔntə́ kpɔ i lə́ sən Mawú və́və́də́ ŋkə́kə́ kidə́ ɛzan àn. Ɛfiɔ Agripa, ɛmɔn kpɔkpɔ ŋnan í dɔ í yudatɔwó cɔ̀ ɛnyɔn də́ ə̀ŋunyən. ⁸ Ɛnú kə̀yi dɔ i lə̀ mianmən aməndəkən ŋ kadejí bə̀ Mawú la tə̀ŋ fɔn amən kúkúwó óó? ⁹ Gaɖə́kamə nyenta ŋ búí bə́ ŋ ɖolà wɔnú sugbɔ kə là có də́ Yesu nazarethetɔ ŋú. ¹⁰ Ŋ wɔ nənən nú lə Yerusaləm ŋ xɔ ŋsen có vosatɔgan wo gbɔ i tú xɔsétɔwó də́ gamən. ¹¹ Ŋ dɔntó nənwó sugbɔ lə́ ɛɖə́xohówo i zən wóji bə́ wóà nú busu nyɔn. Ŋ wɔ xomənfiən də wó sugbɔ, kə nan bə ŋti wó yomə lə̀ amənjro dúmən. ¹² Kə vɔsatɔganwó ɖə mɔn i ŋ yikɔ Damas yé i ŋ wɔ ɛnunanwó; ¹³ Ɛfiɔ, sigbə nyidɔn gawuivə̀ mən ənən án kə ŋlə́ əmɔ̀an jià, ŋ kpə kənkrən ɖəkà có jiŋkori. í kɔ wú nyidɔn, í dazó xixradé nyən kidə́ amən kə́ kprɔŋdówó. ¹⁴ Kə́ mi jən də́ anyigban mən án, ŋ sə̀ ɛgbə́ ɖəkà í í lə̀ nu ŋ lə́ hebrigbə́ mən bə́: "Saulú! Saulú! nukəijɔ̀ i ə́lə́ ci tiŋ yomən? A sənŋu nən wó bə́ nan tú afɔ tɔ̀ni nú. ¹⁵ Í ŋ nú bə́: mən i ə́nyi axotɔ? Axotɔ ɖoŋu bə́: "ɛnyin í nyi Yesu kə́ ələ́ ci yomən nən. ¹⁶ Cagbə ɛnú hinantɔà có də́ afɔ amənvə́ ji i nan kpɔŋ; ŋɖe ɖə́kinyən disa nənwó bə́ ma ɖówó nan nyí tiŋ dɔlà. Anú ənú kə́ maɖə́ disà nənwó kidə́ ənú kə́ ə́nya có ɛŋúnyən xoxoàwó nən amənwó. ¹⁷ Í ma ɖə̀wó lə́ amən kə́ gbɔ ŋ dɔwó yikɔáwó kidə́ yudatɔwó kidə́ amən kəwó ŋnni yuɖatɔwó wó lɔmən, ¹⁸ nən nan ŋkuvinənwó i ɖə́wó lə́ zubrumən va konkrənmən kidə́ satana yə́ ŋusən mən va Mawu yə́ ŋusən mən, nən wa xɔ cɔ̀cɔ̀kə̀ cɔ́ Mawú gbɔ, nən wa kpɔ toxo lə́ amə kə́ xɔ əjinyən sə́awó mə. ¹⁹ Càgbə́ Ɛnu nà tɔà, ɛfiɔ Agripa nyən danən lə̀ Mawu yə́ séwoji óó. ²⁰ Kələ́kələ́a ŋ yi Damasku, i yi Yerusalem í va yi Yoɖea nyigban bribóà ji kidə́ amə kəwó ŋ nyi yudatɔwó óó gbɔ ŋ yi i vɛ̀ xonu nənwó í nu mawu nyɔn nənwó nə watrɔ lə́ wo jiwó mən, nən wa wɔ ɛnu kə ɖəfian bə wo trɔjimə. ²¹ Ɛnu hinàn ídɔ yudatɔwó ləŋ lə́ Mawu xɔamən i ji bə́ yóà wúŋ. ²² Mawu kpədə ɛŋúnyə̀n kə̀kə̀ va nən ɛgbà, ənukə́ nan bə́ ŋgbə́ kpɔtɔ lə́ ə́tə́jí lə́ amə̀ngànwó kidə́ butɔwó mən mən i lə́ xonú có ɛnyɔnuɖə̀ə̀wo ŋú; ²³ bə́ Kristo ɖolà kpéfú, í là nyi amə kə́lə́kə́lə́ kə́ là fɔn có amən kúkú mən i là và ɖə́gbəfán ɛnyondodoà nẹn yuɖatɔwó kidə̀ amə kə́ ŋ nyi yudatɔwóa óó." ²⁴ Kə Paulú ɖə́nú bə́ ɖə̀kià nu ɛnɛn àn, Festo də́ axa bə́: "Paulú ələ́ kúcú; tɔ ŋunú nyanyan ələ́ kúcú; tɔ ŋunú nyanyan gángán lə dówó cúkú." ²⁵ Vɔà Paulú ɖoŋ bé: "búbútɔ gan Festo nyə́ ŋlə́ kúcú óó, vɔà ŋlə́ dojí nú ɛnyɔn dédé kidə́ ɛnyɔn nyɔngbí wó. ²⁶ Ɖoà, ɛnyɔn nanvó lə́ nyanyanmə̀ mən ɛfiɔ, yéi dɔ ŋ bé déé óo; ɖobé wó ŋ núí lə́ bə́bə́ mən óó. ²⁷ Ɛfiɔ Agripa, ə kadə́ ɛnyɔn nuɖə́tɔwo jià? ŋ kadə́ji bə́ ə kadə́wojí." ²⁸ Agripa nunən Paúlú bə́: "ífià ɖéé ɛji là wɔŋ ma trɔ Kristo tɔa?" ²⁹ Paulú ɖoŋu bə́: "ifia aló gabumən i a nyian, tiŋ gbə̀ɖa nən Mawu i nyi bə ɛwó kidə́ amə kə́lə́ ɖo ɛ́tóŋwó miava zu sigbə́ ənyən ɛnən, vɔa ŋkà dəgá miawo ɖə̀ sigbə́ ɛnyan ɛnən oó. ³⁰ Í ɛfiɔ, anyigbanji kpɔtɔ gan, Bernike kidə́ aməkə́ kanrinɖə̀à wó séé có jə́tə; ³¹ wó lə́ dó lə́ ɛxɔamə̀ ilə̀ nú nə wó ɖə́kiwo bə́: "ŋucú là ŋwɔ ɛnú ɖəkən kə jə́ nən gàmən yiyi óó." ³² Agripa nú nən Festo bə́: "nə ŋucú là ŋmə nú bə́ Roma yə́ fiɔgan ŋta í là có yə́ nyɔn án, wo mə gbə́ə́ ɖə̀ i à dó lə̀ gamən."